Undurfagra Valencia & Alicante

Dagurinn hefst á því að kynnast þessari yndislegu borg, Valencia, sem oft er kölluð borg paellunnar en paella er einn af þekktustu réttum spænskrar matargerðar. Við byrjum á þægilegri rútuferð þar sem við fræðumst um sögu þessarar lista- og vísindaborgar. Hér sjáum við heillandi byggingar frá gotneska- og barrokktímabilinu í bland við módernískar. Förum einnig í gönguferð um gamla bæinn þar sem við skoðum meðal annars dómkirkju hins heilaga kaleiks. Eftir það gefst frjáls tími til að skoða sig betur um og þá er tilvalið að fara að gömlu silkikauphöllinni, La Lonja, sem er frá 15. öld og er á heimsminjaskrá UNESCO. Einnig er hægt að skoða enn betur fallega miðbæjarkjarnann sem á sér meira en 2000 ára sögu, áhugaverðu söfnin eða útivistarsvæðið Río Turia með margverðlaunuðu sjávarlífssafni.

Eftir góðan morgunverð höldum við í náttúruþjóðgarðinn Albufera, sem er um 2.800 hektara ferskvatnssvæði, það stærsta á Spáni. Hér eiga yfir 300 fuglategundir athvarf allt árið um kring og þá sérstaklega vatnafuglar, þeirra á meðal flamingó fuglinn. Til að upplifa þessa miklu vatnaperlu og komast örlítið nær fuglalífinu förum við í bátsferð og njótum ógleymanlegrar náttúrufegurðarinnar. Eftir bátsferðina fáum við að smakka á hinum þekkta rétti Spánverja, dýrindis paellu.

Í dag heimsækjum við Sagunto sveitarfélagið sem er staðsett norður af Valencia, nálægt Costa del Azahar við Miðjarðarhafið. Sagunto er m.a. þekkt fyrir rómverska leikhúsið frá 50 e. Kr. en gamli bærinn, með sínum litlu og þröngu hliðargötum, og gyðingahverfið, sem staðsett er í elsta hlutanum, eru einkar sjarmerandi. Hver gatan á fætur annarri er þrungin sögu og gönguferð um svæðið tekur mann nánast aftur til miðalda. Við höldum svo áleiðis að hellinum Coves de Sant Josep og förum þar í siglingu á neðanjarðará þar sem við dáumst að tilkomumiklum hellamálverkum og dropasteinshellum. Á leiðinni til baka heimsækjum við hinn fallega náttúrugarð Sierra Calderona.

Guadalest er sérstaklega líflegur bær í miðju náttúruverndarsvæði. Bærinn er undurfagur og stendur á fjalli með óborganlegu útsýni. Hægt er að fara í stutta gönguferð í þjóðgarðinum eða einfaldlega njóta þess að vera í þessum fallega bæ sem kemur svo sannarlega á óvart. Á heimleiðinni bíður okkar heimsókn til eins af þekktustu vínsvæðum héraðsins þar sem við fræðumst um tegundir vínberjanna og sögu vínræktunarinnar. Hápunkturinn verður að sjálfsögðu smökkun á afurðunum ásamt dæmigerðum tapasréttum.

Nú höldum við til Alicante og á leiðinni verður ekin skemmtileg leið í áttina að fallegum smábæjum við Miðjarðarhafsströndina. Við höldum svo til Calpe, eins fallegasta bæjarins á Costa Blanca ströndinni, með sínum tignarlegum klettum og fögru útsýni yfir flóann. Á rölti okkar um bæinn má sjá leifar gamalla múra, rómverskra rústa og Torreón de la Peca turninn sem var hluti af varnarvirki borgarinnar gegn sjóræningjum Miðjarðarhafsins á 16. öld. Gist verður í fjórar nætur á góðu SPA hóteli miðsvæðis í Alicante með sundlaug og heilsulind og innan seilingar er góð strönd.

Alicante er borg, sem leynir á sér. Borgin hefur ekki bara fallegan miðbæjarkjarna, sem rekur sögu sína aftur til Fönikumanna heldur er hún einnig mikil menningarborg með stórmerkilegum sögu- og listasöfnum. Mikið úrval er af skemmtilegum verslunum og svo stendur borgin líka við dásamlega hvíta sandströnd á miðri Costa Blanca strandlengjunni. Á 15. öld fór borgin að dafna eftir að hafa gengið í gegnum miklar farsóttir, styrjaldir og hungursneyð. Enn þann dag í dag er mikill uppgangur í og við Alicante og má þar aðallega þakka öflugri uppbyggingu hafnarinnar sem og mikilli aukningu innan ferðaþjónustunnar. Við skoðum okkur um í borginni og heimsækjum helstu kennileiti hennar eins og Santa Barbará kastalann í Santa Cruz hverfið sem er ævaforn kastali sem gnæfir yfir borginni upp á 170 metra háum kletti. Útsýnið þaðan er yfir stóran hluta Costa Blanca og eins til svipmikilla fjalla inni í landi. Einnig er gaman að kíkja á aðalmarkaðinn í borginni en hann hefur verið starfræktur í sömu byggingunni frá árinu 1922 og þar má finna ógrynni fjölbreyttra sölubása.

Í dag höldum við til hinnar fornu borgar Elche en eins og svo margar borgir á þessu svæði Spánar á Elche sér mikla og merkilega sögu. Við heimsækjum gamla hluta borgarinnar og skoðum m.a. klaustrið Santa Lucía en þar í kjallaranum er að finna forn arabísk böð með þremur hvelfdum herbergjum, köldu, miðlungs og heitu. Sá sem heimsækir Elche verður að skoða Elche Palm Grove eða pálmalundinn sem geymir yfir 200 þúsund pálmatré. Hann er sá stærsti sinnar tegundar í Evrópu og hefur verið á heimsminjaskrá UNESCO síðan árið 2000. Á rölti okkar um bæinn verða á vegi okkar litlar tjarnir, skúlptúrar og alls kyns suðrænar plöntur. Við höldum síðan til borgarinnar Cartagena sem er þekkt fyrir sínar fallegu módernísku byggingar og ríka tapas menningu. Á leiðinni til þangað stoppum við í stórmerkilegum smábæ, Orihuela, sem er þekktastur fyrir að vera heimabær skáldsins Miguel Hernandez. Í bænum hafa merkir listamenn málað veggi húsanna í hverfi skáldsins og státar það af einhverjum mestu og margir segja bestu útilistaverkum í Evrópu.

Eftir viðburðarríka daga er komið að því að slappa af. Það er yndislegt að kynna sér borgina betur með því að kíkja á söfn, rölta um gamla bæinn, heimsækja verslanir eða setjast á þægilegt kaffihús. Einnig er hægt að nýta sér þau þægindi sem hótelið okkar hefur upp á að bjóða.

Nú er yndisleg ferð senn á enda og komið að heimferð. Brottför frá Alicante kl. 23:45 og áætluð lending í Keflavík er kl. 02:15 að staðartíma, aðfaranótt 21. september.

Fararstjóri getur fært dagskrárliði á milli daga eftir þörfum þegar komið er á staðinn.