Bled vatn & Rósahöfnin

22. september – 2. október 2018 (11 dagar)

Náttúran í kringum Bled vatn er með sanni hrífandi fögur og lætur engan ósnortinn. Í ferðinni siglum við á Bled vatni út í eyjuna Blejski otok, njótum útsýnisins og heimsækjum þar einstaklega fallega Maríukirkju sem á sér aldagamla sögu. Á leið okkar til Rósahafnarinnar eða Portorož, sem verður aðaláfangastaður ferðarinnar, skoðum við okkur um í hinum víðfrægu Postojna dropasteinshellum. Í Portorož gistum við fimm nætur. Þaðan höldum við í siglingu til Izola og Piran, sem eru tvær af perlum Slóveníu, stöldrum við í bænum Rovinj í Króatíu og heimsækjum vínbónda í Pazin. Hafnarborgin Koper í Slóveníu verður heimsótt ásamt borginni Hrastovlje, en hún er þekkt fyrir heilaga þrenningarkirkju, sem skartar mjög merkilegum freskum, þ.á.m. þeirri frægustu er kallast Dauðadans. Eftir góða daga í Portorož sækjum við tónlistarborgina Salzburg í Austurríki heim, en hún er ein af fallegustu borgum landsins. Þar gistum við þrjár síðustu næturnar, skoðum borgina, förum í Arnarhreiðrið og að vatninu Königssee, sem er eitt fallegasta vatn Þýskalands.

Verð á mann í tvíbýli 219.900 kr.

Aukagjald fyrir einbýli 42.600 kr.


Innifalið

  • 11 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Siglingar og vínsmökkun.
  • Hádegisverðir.
  • Þjórfé.

Valfrjálst

  • Sigling út í Blejski Otok eyju ca. € 14.
  • Aðgangseyrir í Maríukirkjuna ca. € 6.
  • Bled kastali ca. € 8.
  • Postojna dropasteinshellar ca. € 21.
  • Sigling til Piran og Izola ca. € 18.
  • Léttur hádegisverður í Pazin ca. € 13.
  • Aðgangur Arnarhreiðrið ca. € 16.
  • Kláfur upp í Salzburgkastala ca. € 11.

Kort af ferðinni

Ferðalýsing

Prenta ferðalýsingu

22. september | Flug til München & ekið að Bled vatni

Brottför frá Keflavík kl. 7:20. Mæting í Leifsstöð um 2 klst. fyrir brottför. Lending í München kl. 13:05 að staðartíma. Þaðan verður ekið að Bled vatni í Slóveníu sem er með fegurstu perlum Alpanna og þar gist í tvær nætur.

23. september | Eyjan Blejski Otok & Bled kastalinn

Eftir morgunverð höldum við í siglingu á vatninu út í eyjuna Blejski Otok, en þar er hugguleg Maríukirkja með frægri óskabjöllu. Eftir bátsferðina verður ekið upp að Bled kastalanum, miðaldakastala sem stendur í 139 m hæð á hamri við norðurbakka vatnsins. Kastalinn er talinn vera elsti kastali Slóveníu og er eitt mesta aðdráttarafl landsins. Þaðan gefur að líta stórkostlegt útsýni yfir svæðið. Síðdegis gefst einnig frjáls tími til að taka það rólega og njóta borgarinnar Bled og umhverfi hennar. 

24. september | Rósahöfnin & Postojna dropasteinshellarnir

Þá verður ekið til Portorož í Slóveníu eða Rósahafnarinnar svokölluðu, þar sem gist verður í fimm nætur. Á leiðinni þangað verður komið til Postojna, en þar eru hinir víðfrægu dropasteinshellar. Umhverfi hellanna er mjög fallegt og hægt að skoða sig um í minjagripaverslunum, kíkja á veitingastaði og kaffihús. Við tökum okkur góðan tíma til að kanna svæðið og njóta.

Opna allt

25. september | Sigling til Piran & Izola

Haldið verður í siglingu til sjávarþorpanna Izola og Piran, sem eru sannkallaðar perlur Istríastrandarinnar. Í Izola stígum við örstutt í land, en höldum svo ferðinni áfram til Piran, yndislegs bæjar sem áhugavert er að skoða. Þar fæddist fiðluleikarinn og tónskáldið Tartini, en minnisvarði um hann stendur á hinu glæsilega Tartini torgi. Eins er gaman að skoða Georgskirkjuna, sem stendur tignarleg á fallegum stað á ströndinni.

26. september | Frjáls dagur í Portorož

Þennan dag ætlum við að njóta þess að vera á þessum fagra stað. Tilvalið er að nýta sér aðstöðu hótelsins til afslöppunar og einnig er dásamlegt er að ganga eftir strandlengjunni yfir til Piran, en þar er margt sem gaman er að kynna sér í rólegheitunum. 

27. september | Dagsferð til Króatíu & Rovinj

Á dagskránni í dag er heimsókn til Króatíu sem tekur á móti okkur í allri sinni dýrð. Áður en við ökum til Rovinj, yndislegs listamannabæjar við Istríaströndina, verður ekið til Pazin, þar sem við snæðum léttan hádegisverð hjá vínbónda. Úti fyrir Rovinj eru 22 eyjar, stærst þeirra er eyjan Sveta Katharina og sést hún vel frá gamla bænum. Við höldum í göngu upp að kirkju heilagrar Euphemiu, en þaðan er glæsilegt útsýni yfir þessa litríku gömlu borg. Einnig munum við halda niður listamannagötuna og um elsta hluta bæjarins. Tími gefst til kanna umhverfið sem og fá sér svaladrykk.

28. september | Hrastovlje & Koper

Ekinn verður spotti inn í land til þorpsins Hrastovlje. Þar stendur þekkt kirkja heilagrar þrenningar, sem byggð var í rómantískum stíl á 12. og 13. öld. Kirkjan er heimsfræg fyrir freskur sínar sem þekja innveggi hennar, en þekktust þeirra er eflaust Dauðadansinn frá 15. öld. Að skoðuninni lokinni verður ekið til Koper, fallegs bæjar og einu hafnarborgar Slóveníu. Koper er ein af borgunum sem byggðar voru upp af Feneyjarveldinu og er torgið með hertogahöllinni og borgarturninum á Titov torginu skýrt dæmi um stórveldið. Eftir stutta skoðunarferð verður gefinn frjáls tími til að fá sér hressingu og líta inn í stóra verslunarhúsið sem er aðeins fyrir utan elsta hluta bæjarins.

29. september | Salzburg

Nú kveðjum við Portorož og höldum til Austurríkis. Á leiðinni verður ekið um Trieste, Palmanova, Udine um Villach til Spittal an der Drau, en þar verður stoppað til að fá sér hádegishressingu. Áfangastaður dagsins er fæðingarborg Mozarts, Salzburg, þar sem gist verður í þrjár nætur.  Borgin er þekkt fyrir byggingar í barokkstíl og hefur verið á heimsminjaskrá UNESCO síðan árið 1996, en Salzburg er í hugum margra hin sannkallaða perla Austurríkis. 

30. september | Arnarhreiðrið & Köningssee

Í dag heimsækjum við Berchtesgaden þar sem Arnarhreiðrið er staðsett. Bormann, einkaritari Hitlers, lét byggja það og færa Hitler að gjöf frá ríkinu á 50 ára afmæli hans, en Hitler sjálfur valdi byggingarstaðinn og varð hinn 1.834 m hái tindur, Kehlstein, fyrir valinu. Á leiðinni til baka verður áð við vatnið Köningsee, sem er einn eftirsóttasti ferðamannastaður Þýskalands og þekktur fyrir einstaka náttúrufegurð.

1. október | Dagur í Salzburg

Við hefjum daginn á skoðunarferð um borgina, skoðum Mirabellgarðinn og göngum eftir Getreidegasse sem er með elstu og þekktustu götum borgarinnar, en þar er að finna mjög áhugavert Mozartsafn. Einnig verður haldið upp í kastalann Hohensalzburg, en þar var hluti kvikmyndarinnar Söngvaseiðs eða Sound of Music tekinn upp. Stórkostlegt útsýni er þaðan yfir Salzburgerland og borgina. 

2. október | Heimferð

Það er komið að heimferð og er stefnan tekin á München. Brottför þaðan kl. 14:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Soffía Halldórsdóttir

Soffía Halldórsdóttir er fædd og uppalin í Svarfaðardal. Hún lauk kennaraprófi í einsöng og tónmennt frá Tónlistarskólanum í Reykjavík á árunum 1991-92 og kenndi síðan tónmennt við grunnskóla Reykjavíkur í nokkur ár. Soffía hugðist taka sér frí frá kennslu í eitt ár og fór til Prag, þar sem hún stundaði nám í tékknesku við Karlsháskólann. Dvölin í Prag varð öllu lengri en áætlað var í fyrstu eða samtals ellefu ár, en Soffía flutti aftur heim til Íslands haustið 2009.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir