Gauksklukkur & Rínarfossar

16. - 23. september 2017 (8 dagar)

Mikil náttúrufegurð blasir við okkur í þessari heillandi ferð um Svartaskóg, Sviss og Alsace héraðið í Frakklandi. Gist verður í bænum Weil am Rhein í Þýskalandi, en steinsnar frá hótelinu er lengsta göngubrú í heimi, Þriggjalandabrúin, sem liggur yfir til Frakklands og Sviss.
 
Í ferðinni munum við kynna okkur helstu aðdráttaröfl þessara þriggja landa á þessu yndislega svæði. Farið verður í skemmtilegar skoðunarferðir að fegurstu stöðum Svartaskógar, að Schluchsee vatni sem er hæsta uppistöðulón Þýskalands og til bæjarins St. Blasien þar sem við skoðum merkilega dómkirkju. Í Strassburg verður farið í siglingu á ánni Ill sem rennur um borgina. Við förum með kláfi upp á Feldberg, hæsta fjall Svartaskógar og að hinu töfrandi Titisee vatni. Bærinn Schaffhausen í Sviss sem stendur við bakka Rínarfljótsins verður heimsóttur og þar lítum við kraftmestu fossa meginlands Evrópu, Rínarfossa. Við stöldrum við í Zürich við samnefnt vatn, höldum um blómlega vínheraðið Alsace, en þar eru lítríkir bæir eins og Colmar og ævintýrabærinn Riquewihr. Freiburg, borg Svartaskógar, verður einnig sótt heim og við ferðumst um hinn svonefnda Gauksklukkuveg.

Verð á mann í tvíbýli 177.700 kr.

Aukagjald fyrir einbýli 26.900 kr.


Innifalið

  • 8 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun og kvöldverður á hótelinu.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Siglingar og ferjur.
  • Hádegisverðir.
  • Þjórfé.

Valfrjálst

  • Kláfur upp á Feldberg fjall ca. € 10.
  • Sigling á ánni Ill ca. € 13.
  • Vínsmökkun ca. € 15.

Kort af ferðinni

Ferðalýsing

Prenta ferðalýsingu

16. september | Flug til Zürich & Weil am Rhein

Brottför frá Keflavík kl. 7:20. Mæting í Leifsstöð 2 klst. fyrir brottför. Lending í Zürich að staðartíma kl. 13:00 og þaðan ekið til Weil am Rhein sem er 30.000 manna bær í suðurhluta Svartaskógar, rétt við landamæri Sviss og Frakklands. Þar verður gist í 7 nætur á góðu hóteli rétt við árbakka Rínar.

17. september | Schluchsee, St. Blasien, Feldberg & Titisee

Við hefjumst handa við að kynna okkur alla dýrð nágrennisins. Schluchsee vatnið myndaðist undir jökli en var gert að uppistöðulóni fyrir um 80 árum og er í dag vinsælt útivistarsvæði. Bærinn St. Blasien heitir eftir stofnanda klaustursins þar á 18. öld, en þetta er sérlega líflegur og skemmtilegur bær. Dómkirkja St. Blasien ber þriðja stærsta kúpul í Evrópu og er fræg fyrir stórkostlegan hljómburð. Feldberg er hæsta fjall Svartaskógar, en þar gefst okkur kostur á að fara upp á toppinn í kláfi og virða fyrir okkur hrífandi útsýni yfir hæðir Svartaskógar og alveg til Alpanna. Við komum að huggulega þorpinu Titisee sem stendur við samnefnt vatn. Þetta er vinsæll áfangastaður, enda einn af draumastöðum Svartaskógar.

18. september | Strassburg

Strassburg er einstaklega áhugaverð borg með sjarmerandi gömlum húsum og vatnavegum. Þessi höfuðstaður Alsace héraðsins stendur í Frakklandi rétt við landamæri Þýskalands. Áhugasamir geta farið í skemmtilega siglingu á ánni Ill sem rennur um borgina, en þar sést glöggt hvernig gljáandi ný háhýsi eins og Evrópubyggingin kallast á við eldri hluta borgarinnar með sögulegu bindingsverkshúsunum. Eftir bátsferðina gefst frjáls tími til að næra sig og kynna sér borgina betur. Upplagt er að rölta um listamannahverfið, Petite France eða litla Frakkland, skoða sögufrægu Münsterkirkjuna, en inni í kirkjunni er mjög merkilegt stjörnu- og sólúr, eða líta inn til kaupmanna.

Opna allt

19. september | Frjáls dagur

Nú hagar hver deginum sem vill. Tilvalið að fara í göngu meðfram ánni eða á Þriggjalandabrúnni og kanna þetta dásamlega umhverfi. Áhugasamir geta teka strætó inn í miðbæ Weil am Rhein, eða jafnvel til Basel í Sviss. Einnig er hægt að fara í yndislega siglingu til Basel frá hótelinu sem tekur einungis um hálftíma. Basel er einstaklega lífleg og skemmtileg borg og þar ætti hver að geta fundið eitthvað við sitt hæfi. Í borginni eru fjöldinn allur af söfnum, galleríum, hrífandi gömlum byggingum og minnismerki um forna tíð. Hún er einnig þekkt fyrir aðlaðandi verslanir og tískuhús, en þó hún sé mikil nútímaborg hefur tekist einstaklega vel að varðveita gamla bæinn, sem talinn er með fallegri í Evrópu. Síðdegis heldur báturinn frá Basel aftur á hótel. Einnig er hægt að velja um skemmtisiglingu með hádegisverði inniföldum. Fararstjórinn verður ykkur til halds og trausts og getur hjálpað ykkur að panta siglingu fyrirfram.

20. september | Schaffhausen, Rheinfall & Zürich

Dagurinn hefst á akstri til bæjarins Schaffhausen í Sviss, sem stendur við bakka Rínarfjótsins. Í bænum standa nokkrar af tilkomumestu miðaldabyggingum landsins, allar ríkulega skreyttar. Eftir skoðunarferð í bænum verður haldið áfram að Rínarfossunum sem staðsettir eru skammt frá bænum. Fossarnir eru afar mikið sjónarspil, þeir eru kraftmestu fossar í mið-Evrópu og falla um 23 metra milli stórskorinna klettadranga. Þegar við höfum virt þessa 15 þúsund ára náttúruperlu nægilega fyrir okkur, höldum við til heimsborgarinnar Zürich, sem er stærsta borg Sviss og stendur við samnefnt vatn. Þessi glæsilega borg er mistöð bankamála og annara viðskipta og státar af mjög fallegum miðbæ. Farið verður í stutta skoðunarferð en síðan gefst frjáls tími.

21. september | Vínslóðin í Alsace, Colmar & Riquewih

Í dag munum við aka hina frægu Vínslóð í gegnum Alsace héraðið. Ekið verður í gegnum mörg hugguleg þorp, en fyrsti viðkomustaður okkar er bærinn Colmar. Þessi einstaklega fallegi bær er þekktur fyrir listileg bindingsverkshús, kræklóttar þröngar götur og ekki síst listamannahverfið, sem kallað er litlu Feneyjar og er eitt fallegasta hverfi bæjarins. Að sama skapi verðum við vitni að einstökum ævintýrablæ bæjarins Riquewihr, sem er með vinsælli ferðamannabæjum svæðisins. Bærinn er staðsettur í hjarta Alsacehéraðsins og býr yfir einstökum arkitektúr í nánast óbreyttri mynd síðan á 16. öld. Á svæðinu fer fram háklassa vínrækt svo svo afurðin drýpur af hverju strái, því er upplagt að enda góðan dag á heimsókn í vel valinn vínkjallara og bragða á framúrskarandi afurð svæðisins.

22. september | Freiburg & Klukkuvegurinn í Svartaskógi

Freiburg hefur verið háskólaborg frá fornu fari, en þessi borg hinna frjálsu á sér langa sögu. Sögulegar miðaldabygginar setja svip sinn á borgina og margt er að skoða og dást að. Á bakaleiðinni verður ekinn hluti af Klukkuveginum, en þar eru framleiddar heimsfrægar gauksklukkur og munum við heimsækja eina smiðjuna til að sjá hvernig klukkurnar eru búnar til og heyra frásagnir af uppruna þeirra. Að því loknu er upplagt að fara á Schwarzwald Café og bragða á hinni frægu Schwartzwäldertertu.

23. september | Heimferð frá Zürich

Nú verður haldið heim með fullt að frábærum minningum í farteskinu. Ekið verður til Zürich að morgunverði loknum. Brottför þaðan kl. 14:00 og lending í Keflavík kl. 15:50 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Strassburg

Strassburg

St. Blasien

St. Blasien

Schluchsee

Schluchsee

Strassburg

Strassburg

Zürich

Zürich

Colmar

Colmar

Colmar

Colmar

Riquewihr

Riquewihr

Klukkuveggurinn í Svartaskógi

Klukkuveggurinn í Svartaskógi

Strassburg
St. Blasien
Schluchsee
Strassburg
Zürich
Colmar
Colmar
Riquewihr
Klukkuveggurinn í Svartaskógi

Fararstjórn

Ester Helgadóttir

Ester Helgadóttir er fædd árið 1961 og er alin upp í kringum flugið. Hún sótti háskólanám til Frakklands í Strasbourg.  Þar nam hún frönsku og franskar bókmenntir og stundaði síðan nám í Landfræði (Gégraphie-Géographie Physique), sem hún lauk með Meistaragráðu. Hún bjó 17 ár í Strasbourg og starfaði við ýmis störf, m.a. við íslenskukennsku fyrir byrjendur í Háskólanum í Strasbourg og þýðingar fyrir Arte sjónvarpsstöðina.  Síðustu árin hennar í Strasbourg starfaði hún hjá Fastanefnd Íslands við Evrópuráðið.  Árið 2000  færði hún sig aðeins norðar og settist að í Luxembourg og þar býr hún enn. Í Luxembourg starfaði hún hjá Cargolux Airlines International, í flugrekstrardeildinni í um 16 ár.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir