Wales - í landi rauða drekans

Stórbrotið landslag, velska og keltnesk menning eru aðaleinkenni áfangastaðar okkar, Wales. Ferðast verður um Norður-Wales, áhugaverðir staðir skoðaðir og komið í fallega bæi og borgir. Flogið verður til Manchester og ekið þaðan til borgarinnar Chester, þar sem gist verður fyrri hluta ferðarinnar. Chester stendur við ána Dee, austan við landamæri Wales. Í borginni eru merkilegar minjar frá tímum Rómverja, ásamt fornfrægum miðaldabyggingum. Farið verður í dagsferðir um Norður-Wales, m.a. til Llandudno, Conwy, Bangor og Bala, ásamt því að fara um Snowdonia þjóðgarðinn. Í Liverpool, borg Bítlanna, verður farið á ýmsa staði tengda þessari heimsfrægu hljómsveit. Ekið verður um borgina og hún skoðuð. Ferðin endar í Manchester en þar verður gist í tvær nætur. Boðið verður upp á skoðunarferð um borgina en einnig gefst frjáls tími til að skoða borgina á eigin vegum. 

Verð á mann í tvíbýli 139.900 kr.

Aukagjald fyrir einbýli 26.600 kr.


Innifalið

  • 6 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Hádegisverðir.
  • Þjórfé.

Valfrjálst

  • Chester Cathedral ca £ 4.
  • Conwy kastali ca £ 10.
  • Bítlasafnið í Liverpool ca £ 17.

Kort af ferðinni

FerðalýsingPrenta ferðalýsingu

26. maí | Flug til Manchester & Chester

Flogið er til Manchester, brottför frá Keflavík kl. 8:00 en mæting í Leifsstöð í síðasta lagi 2 klst. fyrir brottför. Við lendum í Manchester kl. 11:45 og ökum rúmlega klukkustundar leið til Chester. Í þessari tæplega 80 þúsund manna borg er fjöldi bygginga frá miðöldum og borgarmúrarnir þar sennilega best varðveittu í Englandi. Við kíkjum á þessa aldagömlu borgarmúra, sjáum merkilegan svart-hvíta arkitektúrinn sem prýðir mörg hús í miðbæ Chester. Við heimsækjum dómkirkjuna, Chester Cathedral, einstaka byggingu sem upphaflega var byggð sem klaustur árið 1092. Seinna reis svo kirkja í rómönskum stíl en frá 1250 tók við merkilegt 250 ára tímabil en á því reis sú magnaða bygging í gotneska stílnum sem við skoðum. Þaðan ekið á hótel þar sem við gistum í þrjár nætur.

27. maí | Llandudno & Bangor

Í dag verður haldið í skoðunarferð til Norður-Wales. Ekið til Llandudno sem er fallegur strandbær sem hefur ekki að ástæðulausu hlotið nafngiftina drottning velskra sumarleyfisstaða. Í Llandudno verður ekið að kalksteinshöfða sem rís 207 m beint upp úr sjónum. Ákveðið verður á staðnum hvort farið verður upp á höfðann.  Þaðan er stórkostlegt útsýni og ekki síður áhugavert dýra- og plöntulíf en við gætum m.a. rekist á hinn einstaka Kashmiri geitastofn sem fluttur var til Englands sem gjöf frá persneska konunginum til Viktoríu drottningar á krýningarathöfn hennar árið 1837. Frá Llandudno verður ekið til hins sögufræga bæjar Conwy, gengið um gamla miðaldarkjarnann og Conwy kastali heimsóttur. Síðan verður ekið um háskólaborgina Bangor sem er elsta borgin í Wales en hún er jafnframt ein minnsta borg Bretlands. Síðan ekið um fallegar sveitir á náttstað í Chester.

28. maí | Snowdonia þjóðgarðurinn

Áfangastaður dagsins er Snowdonia þjóðgarðurinn en hann dregur nafn sitt af Snowdon fjallinu sem er hæsta fjall Wales (1085 m). Háir fjallgarðar einkenna þjóðgarðinn er þar má líka finna straumharðar ár, fossa, skóga og stöðuvötn. Að loknum góðum morgunverði er ekið til Ruthin og þar verður áð um hríð, fá sér kaffi, rölta um bæinn og skoða mannlífið. Nafnið fær bærinn úr velsku. Rhudd merkir rauður og din er virki. Kastali sem hér var byggður á árunum 1277-84 stendur einmitt á rauðum sandsteini. Ökum áfram um landbúnaðarhéruð og komum næst í umræddan þjóðgarð þar sem margt er að sjá. Förum um smáþorp og náttúru sem sums staðar svipar til Íslands. Við komum í gamlan námubæ, Blaenau Ffestinog þar sem við fáum okkur hádegishressingu  og skoðum okkur um.  Einhvern tíma var hér aldeilis líf í tuskunum. Áfram er haldið og enn um skemmtileg svæði, fjöll og firnindi uns komið er í bæinn Dolgellau þar sem margt er að sjá. Umhverfið er einstaklega fallegt, stutt er í afar vinsæl útivistarsvæði þar sem göngusvæði er mikið notað, menn ríða út, stunda flúðasiglingar og fjallaklifur. Sögufrægir staðir finnast bæði í sveitinni umhverfis bæinn svo og í honum sjálfum. Vinsæl tónlistarhátíð hefur verið haldin í bænum um nokkurra ára skeið. Hér skoðum við, fáum okkur síðdegishressingu áður en snúið er til baka á náttstað. Á leiðinni til Chester er komið við í Bala, þorpi í þjóðgarðinum en síðan taka fallegar sveitir við síðasta spottann.  

Opna allt

29. maí | Á slóðir Bítlanna - Liverpool

Í dag höldum við til Liverpool þar sem við förum í skoðunarferð um borgina og kíkjum m.a. á St. George‘s Hall og hina sprengdu kirkju, St. Luke, sem var eins og viðurnefnið gefur til kynna sprengd upp árið 1941 og stendur núna sem minnismerki um þá sem létust í seinni heimstyrjöldinni. Að sjálfsögðu bregðum við okkur á slóðir Bítlanna og ökum Mathew götu þar sem finna má hinn heimsþekkta Cavern klúbb. Komið við á Bitlasafninu í Royal Albert Dock við höfnina. Líkt og í öllum borgum Englands eru þekkt knattspyrnulið í Liverpool. Tvö þar í borg eru býsna áberandi í efstu deild. Með öðru þeirra, Everton, leikur íslenskur landsliðsmaður. Á leið okkar út úr borginni gefst tækifæri til að aka hjá leikvöngum þessara liða og þaðan áfram til næstu stórborgar, Manchester þar sem gist verður í tvær nætur.

30. maí | Manchester – skoðunarferð & frjáls dagur

Að loknum morgunverði verður boðið upp á skoðunarferð í rútu um þessa forvitnilegu borg þar sem m.a. verður litið á dómkirkjuna, ráðhúsið og fleiri áhugaverða staði í Manchester. Eftir hádegið gefst hverjum og einum tími til að skoða borgina á eigin vegum, kíkja á söfn, líta inn til kaupmanna eða skoða mannlífið á einu af kaffihúsum bæjarins.

31. maí | Heimferðardagur

Hópurinn fluttur af hóteli á flugvöll. Brottför frá Manchester kl. 13:05 og er lending áætluð í Keflavík kl. 14:50 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Árni Snæbjörnsson

Árni Snæbjörnsson er fæddur árið 1946 að Stað í Reykhólasveit og ólst þar upp. Hann er búfræðingur og búfræðikandídat (B.Sc) frá Hvanneyri og lauk framhaldsnámi (M.Phil) í landbúnaðargreinum frá Landbúnaðarháskólanum í Edinborg 1977.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir