Suðræn sveifla í St. Tropez

Franska rivíeran eða Côte d’Azur í Provence héraðinu tekur á móti okkur í allri sinni dýrð.

Ferðin byrjar í Zürich en þaðan er ekið í átt að Mílanó þar sem gist er fyrstu nóttina. Farið er til Sainte Maxime sem stendur við hinn fagra St. Tropez flóa en töfrar hans láta engan ósnortinn. Við upplifum stórbrotna fegurð Gullstrandarinnar, Corniche de l’Estérel, á leið okkar til Cannes. Komið verður til Aix-en-Provence sem er með glæsilegustu en einnig dýrustu borgum Frakklands. Suðrænn blær frönsku rivíerunnar leikur um okkur í furstadæminu Mónakó sem ógleymanlegt er að sækja heim. Við upplifum töfrandi St. Tropez flóann á siglingu til listamannabæjarins samnefnda, sem er einn frægasti bærinn við frönsku rivíeruna og heimabær leikkonunnar Brigitte Bardot. Dásamlegt verður að slaka á í rólegheitum í bænum Sainte Maxime. Við endum með trompi í bænum Annecy sem er einn fallegasti bær frönsku Alpanna en á leiðinni þangað verður stoppað í hinni sögufrægu virkisborg Avignon. 

Verð á mann í tvíbýli 266.200 kr.

Aukagjald fyrir einbýli 64.400 kr.


Innifalið

  • 11 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður á öllum hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Siglingar.
  • Vínsmökkun.
  • Hádegisverðir.
  • Þjórfé.

Valfrjálst

  • Sigling til St. Tropez ca. € 14.
  • Smálest í St. Maxime ca. € 10.
  • Höll furstafjölskyldunnar í Mónakó ca. € 12.
  • Kaktusgarðurinn í Mónakó ca. € 6.
  • Spilavítið í Monte Carlo ca. € 17.
  • Sigling á Annecy vatni ca € 16.

Kort af ferðinni

FerðalýsingPrenta ferðalýsingu

11. maí | Flug til Zürich & ekið til Mílanó

Brottför frá Keflavík kl. 07.20, mæting í Leifsstöð í síðasta lagi 2 klst. fyrir brottför. Lending í Zürich í Sviss kl. 13:00 að staðartíma. Þaðan verður ekin fögur leið í átt að Mílanó þar sem gist verður fyrstu nóttina.

12. maí | Sainte Maxime við Côte d'Azur

Eftir góðan morgunverð verður ekið að frönsku rivíerunni eða Côte d'Azur ströndinni til  yndislega bæjarins Sainte Maxime við St. Tropez flóann. Þar verður gist í 7 nætur á huggulegu hóteli nálægt ströndinni. Hótelið er með sundlaugargarði, sólbaðsaðstöðu, líkamsrækt, innisundlaug og heilsulind með tyrknesku gufubaði. 

13. maí | Corniche de l'Estérel „Gullströndin“ & Cannes

Nú verður ekin falleg leið með Corniche de l'Estérel ströndinni sem kölluð er   „Gullströndin“. Stórbrotið landslag ber fyrir augu á leiðinni til Cannes, heillandi borgar á fallegum stað. Í Cannes verður gengið að kvikmyndahöllinni og rauða dreglinum en Cannes er einmitt frægust fyrir alþjóðlegu kvikmyndahátíðina sem haldin er þar ár hvert. Síðdegis gefst frjáls tími til þess að skoða borgina, sýna sig og sjá aðra.  

Opna allt

14. maí | Stutt gönguferð í St. Maxime & frjáls tími

Eftir góðan morgunverð verður farið í stutta gönguferð um St. Maxime, sem færir okkur nær lífinu við ströndina. Þetta er einn af vinsælustu ferðamannabæjum Côte d'Azur strandarinnar og búa þar um 12.000 manns. Það má segja að bærinn hafi notið frægðar St. Tropez bæjarins sem er hinum megin við flóann og er St. Maxime nú með fínni bæjum strandarinnar. Í St. Maxime er jafnframt ein best útbúna lystisnekkjuhöfn strandarinnar. Eftir hádegi verður frjáls tími til að kanna bæinn betur á eigin vegum eða nota sér glæsilegu aðstöðuna við hótelið okkar. 

15. maí | Frjáls dagur í St. Maxime

Í dag njótum við þess að eiga frjálsan dag í St. Maxime. Hægt verður að nýta sér aðstöðuna við hótelið, kanna betur fallega miðbæjarkjarnann, líta inn í skemmtilegar verslanir og fá sér hressingu á einhverju hinna fjölmörgu veitingahúsa bæjarins. Einnig er upplagt að fá sér göngu meðfram ströndinni.  

16. maí | Furstadæmið Mónakó & spilavítin í Monte Carlo

Þennan skemmtilega dag heimsækjum við furstadæmið Mónakó, sundum kallað dvergríkið Mónakó. Byrjað verður á að skoða kaktusgarðinn en þaðan er glæsilegt útsýni yfir borgina og klettinn sem gamli bærinn var reistur á. Við höldum í skoðunarferð um klettaborgina en þar er að finna höll furstafjölskyldunnar og dómkirkjuna þar sem Grace Kelly var borin til grafar. Glæsileg bygging Grand Casino spilavítisins í Monte Carlo hverfinu verður einnig skoðuð.

17. maí | Dagur í Aix-en-Provence

Aix-en-Provence er með stærri háskólaborgum landsins og nema þar um 30.000 háskólanemar. Hægt er að segja að borgin sé með dýrustu en einnig glæsilegustu borgum landsins, umkringd fjöllum og sléttum. Á listasöfnum og í kirkjum borgarinnar má líta glæsta fortíð en einnig bera fjölmargar einkahallir sem byggðar voru í barokkstíl á 17. og 18. öld merki um glæsileikann. Í dag eru þessar einkahallir reknar sem lúxushótel. Aix, eins og hún er jafnan kölluð, er einnig þekkt fyrir gómsæta möndlukonfektið sitt, Calissons. Farið verður í skemmtilega skoðunarferð um borgina en eftir það verður frjáls tími til að kanna borgina á eigin vegum.  

18. maí | Bátsferð til St.Tropez & smálest

Við höldum í glæsilega siglingu í dag yfir til listamannabæjarins St. Tropez. Smálest ferjar okkur niður að höfn þar sem báturinn bíður okkar. Bærinn er einn aðaláfangastaður hinna ríku og frægu við frönsku rivíeruna. Brigitte Bardot býr þar og einnig halda ýmsar Hollywood stjörnur þar til í sínu orlofi. Við förum í skoðunarferð um bæinn og síðar gefst góður tími til að kanna þennan líflega bæ á eigin vegum. Mikil upplifun er að skoða lystisnekkjur fræga fólksins í höfninni. Að lokinni siglingu aftur til St. Maxime mun smálestin ferja okkur til baka á hótelið.

19. maí | Avignon & Annecy

Í dag kveðjum við þennan draumfagra stað og ökum til Annecy, perlu frönsku Alpafjallana, þar sem gist verður í 2 nætur. Á leiðinni verður stoppað í hinni sögufrægu virkisborg Avignon, m.a. við höllina sem var íverustaður páfans á 14. öld. Þar er hægt að fá sér hressingu og upplifa þessa glæsilegu borg. 

20. maí | Skemmtilegur dagur í Annecy

Við hefjum daginn á gönguferð um Annecy sem er yndisleg borg og nær að hrífa alla með sér. Bærinn, sem liggur inn á milli fjallanna, er einn þeirra elstu í frönsku Ölpunum. Yfir bænum gnæfir aldagömul höll og eru mörg húsanna í borginni frá 16.-18. öld. Eftir skoðunarferðina gefst frjáls tími. Áhugasamir geta farið í töfrandi siglingu á vatninu.

21. maí | Heimferð frá Genf

Þá er þessi glæsilega ferð á enda. Ekið verður til Genf en brottför þaðan er kl. 14:00 og lending í Keflavík kl. 15:50 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir