Grikklandsævintýri

19. apríl – 2. maí 2019 (14 dagar)

Í þessari mögnuðu ferð munum við kynnast einstöku samspili náttúru og sögu Grikklands. Við skoðum þorpin Fira og Oia á eyjunni Santorini, þar sem húsin eru eins og bláir og hvítir sykurmolar og hanga á gígbarmi stærsta gígs í heimi. Á eyjunni Naxos njótum við þess að ganga eftir mjóum götum gamla kastalans og upplifum túrkísbláan sjóinn og náttúrufegurðina í Eyjahafinu. Merkar fornminjar verða á vegi okkar á meginlandinu og við hlustum á sögur um goð og menn, hetjur og hetjudáðir. Hof Appollós og véfréttin í Delfí töfra ferðamenn enn í dag og miðaldaklaustrin í Meteora láta engan ósnortinn. Aþena er svo heill heimur út af fyrir sig með gömlu konungshöllinni, Akademíunni, marmaraleikvangnum, Akrópólís og töfrandi gamla bænum í Plaka. Ferðinni lýkur með nokkurra daga dvöl í Vouliagmeni, strandbæ í grennd við höfuðborgina, þar sem stöðuvatn, strönd og náttúra kemur saman í fögru samspili. Strandlengja Attíku teygir sig til Sounionhöfðans en þar skoðum við hof Poseidons sem gnæfir yfir hinu dimmbláa hafi.

Verð á mann í tvíbýli 537.700 kr.

Aukagjald fyrir einbýli 119.600 kr.


Innifalið

  • 14 daga ferð.
  • Allt flug og flugvallaskattar samkvæmt ferðalýsingu.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Ferjusiglingar samkvæmt ferðalýsingu.
  • Aðgangseyrir að Akrópólis.
  • Skemmtisigling til þriggja eyja samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í klaustur og fornminjar.
  • Hádegisverðir.
  • Gistináttagjald á hótelum ca € 1-5 á nótt.
  • Þjórfé.

Valfrjálst

  • Fornminjar Delfí ca € 12.
  • Klaustur í Meteora ca € 6.
  • Útileikhús í Epidárus ca € 12.
  • Háborgin og býkúpulgröfin í Mýkenu ca € 12.
  • Hof Póseidons á Sounion ca € 8.

Kort af ferðinni

Ferðalýsing

Prenta ferðalýsingu

19. apríl | Flug til Aþenu

Flogið verður frá Keflavík til Kaupmannahafnar kl. 7:45. Mæting í Leifsstöð 2 klst. fyrir brottför. Lending í Kaupmannahöfn kl. 12:55 að staðartíma. Flogið verður áfram til Aþenu kl. 16:15 og lent þar kl. 20:25 að staðartíma. Gist verður fyrstu nóttina á hóteli í Vouliagmeni.

20. apríl | Siglt til Naxos & frjáls tími

Dagurinn hefst á bátsferð til Naxos þar sem gist verður næstu tvær nætur. Þegar allir eru búnir að koma sér fyrir á hótelinu förum við í skoðunarferð um bæinn á Naxos. Gengið verður um þröngar götur, upp í Feneyska virkið, um bogagöng og umlukta húsagarða. Haldið verður út á tangann Portarea þar sem stóra hurðin stendur enn, einu minjar um hof Appóllos sem byggt var hér á 5. öld f. Krist. Að skoðunarferðinni lokinni er hverjum frjálst að skipuleggja sinn tíma að vild, upplagt er að kíkja á kaupmenn eða njóta sjávarins og hvítrar strandlengjunnar í bæjarjaðrinum.

21. apríl | Skoðunarferð um Naxos

Eftir morgunverð förum við í skoðunarferð um eyjuna. Höldum upp í fjöll til þorpanna Halki og Apiranþos sem eru eins og tíminn hafi þar staðið í stað. Fólkið í þorpunum lifir á landinu og kyrrð og ró einkennir alla þeirra lífshætti. Í Halki eru litlar fallegar verslanir og handverksbúðir en þar getum við fylgst með hvernig Naxosbúar laga drykkinn Kitron sem er eingöngu búinn til á þessari sérstöku eyju. Þorpið Apiranþos er frægt fyrir það að þar eru allar götur og mörg hús lagðar marmara. Marmarinn var ódýrt byggingarefni og stutt yfir í stóra marmaranámu þar sem getur vel verið að við stöldrum við á leið okkar. 

Opna allt

22. apríl | Siglt til Santorini

Við hefjum daginn á að sigla yfir til Santorini sem löngum hefur verið kölluð fegursta eyja í heimi en hún sprakk í loft upp í einu mesta sprengigosi heims, árið 1628 f. Krist. Þegar við erum búin að koma okkur fyrir verður haldið í stutta gönguferð um bæinn Fira. Bærinn státar af stórfenglegu bæjarstæði en hann er staðsettur upp á 400 m háum kletti og kúra hvítkölkuð húsin sem bærinn er hvað þekktastur fyrir í klettahlíðinni á gígbarmi stærsta gígs í heimi. Í bænum er margt að skoða, þar er að finna margar minjagripaverslanir, gullsmiði og listamannabúðir. Hægt að fara í reiðtúr á asna niður að höfninni og njóta síðan stórfenglegs útsýnisins í ferð með kláfi upp hlíðina. Gist verður í tvær nætur á góðu hóteli í útjaðri bæjarins. 

23. apríl | Hápunktar Santorini

Við höldum í rútuferð um eyjuna og heimsækjum bæinn Pyrgos, fornminjauppgröftinn í Akrótiri og síðar listamannabæinn Oia sem er staðsettur á norðvesturodda Santorini. Oia er undurfagur bær þar sem myndefnið er óþrjótandi og birtan er einstök. Við þræðum mjóar götur bæjarins, göngum út í Feneyska virkið og njótum þess að vera á þessum yndisfagra stað. 

24. apríl | Siglt & keyrt til Delfí

Að morgunverði loknum höldum við af stað út á flugvöll og fljúgum um hádegisbilið til Aþenu, þaðan sem við förum með rútu til Delfí. Keyrslan þangað tekur um 3 klst með stuttu kaffistoppi á leiðinni. Til Delfi komum við seint um eftirmiðdaginn en gist verður eina nótt á góðu hóteli í bænum. 

25. apríl | Hof Appóllos & Meteora

Í dag skoðum við okkur um í Delfí en svæðið var til forna einn af helgustu stöðum Grikklands. Í hofi Appollós, spáði hin dulúðlega véfrétt fyrir almenningi og aðalsmönnum í hundruðir ára. Við skoðum hofið, leikhúsið, leikvanginn og förum svo í safnið sem hefur að geyma þá dýrgripi sem fundist hafa í jörðu í Delfí. Eftir hádegishressingu verður haldið áfram með rútu til Meteora. Komið verður á hótel rétt fyrir kvöldverð og dvalið eina nótt.

26. apríl | Meteora klaustrin & Aþena

Við hefjum daginn á því að skoða Meteora en þar er að finna sérstakt náttúrufyrirbæri af himinháum sandsteinsdröngum. Á miðöldum byggðu munkar og nunnur klaustur uppi á þessum dröngum og eru sum þeirra starfrækt enn í dag. Eftir að hafa skoðað sandsteinsdrangana og tvö af klaustrunum sem þarna standa, verður keyrt áleiðis til Aþenu, höfuðborgar Grikklands en gist verður skammt frá í strandbænum Vouliagmeni í 6 nætur.

27. apríl | Skoðunarferð um Aþenu

Aþena státar af mörgum fornminjum. Farið verður í skoðunarferð um borgina þar sem við sjáum háskólabyggingarnar, gömlu konungshöllina sem hýsir þingið í dag og ólympíuleikvanginn sem byggður var fyrir fyrstu ólympíuleika okkar tíma, árið 1896. Þar á eftir göngum við upp á Akrópólishæðina til þess að skoða hið fræga Parþenonhof. Ferðinni lýkur með frjálsum tíma í Plaka, elsta hverfi Aþenu sem er eins og eyland inni í miðri borginni með sjarmerandi verslunum, kaffihúsum og veitingastöðum.

28. apríl | Epidárus – Nafplíon - Mýkena

Að loknum morgunverði höldum við til Kórinþu þar sem við stöldrum við samnefndan skipaskurðinn sem grafinn var á síðari hluta 19. aldar. Þaðan höldum við til Epidárus, þar sem gefur að líta stærsta útileikhús Grikklands frá 4. öld f. Krist en leikhúsið státar af besta hljómburði allra fornaldarleikhúsa heimsins. Við höldum áfram til Nafplíon, lítils bæjar frá tímum Feneyjarmanna sem var fyrsta höfuðborg hins frjálsa gríska ríkis. Eftir stutt stopp og hádegishressingu höldum við leið okkar áfram til Mýkenu, þar sem við skoðum háborg Agamemnons, ljónahliðið og eina af fjöldamörgum býkúpulsgröfum svæðisins. Komið verður á hótel fyrir kvöldverð. 

29. apríl | Strandlengja Attíku & hof Poseidons

Þennan dag gefst tími til að njóta morgunsins í Vouliagmeni en síðdegis munum við keyra eftir hinni fallegu Attíkustrandlengju meðfram himinbláu hafi og þræðum litla strandbæi á leið okkar til hofs Poseidons. Hofið sem stendur á Sounion tanganum, var byggt á 5. öld f. Krist til heiðurs sjávarguðinum Poseidon. Við stefnum að því að njóta sólarlagsins á Sounion sem þykir sérlega fallegt og myndrænt. 

30. apríl | Sigling til þriggja eyja

Árla morguns verður keyrt til hafnar í Pireus og stigið um borð í skip sem siglir til þriggja eyja í Saróníska flóanum. Fyrsti áfangastaður er litla og huggulega eyjan Hydra þar sem engir bílar eru og aðeins hægt að ganga um mjóar hellulagðar göturnar eða leigja sér asna. Næst er stutt stopp á eyjunni Poros með sín óteljandi sítrónutré og snoturt þorp. Siglt verður í gegnum mjótt og fallegt sund sem skilur eyjuna frá Pelópsskaganum. Síðasti áfangastaðurinn er eyjan Aegina sem er fræg fyrir mikla ræktun á pistasíuhnetum en einnig fyrir þorpið sem er afskaplega hlýlegt í bláum og hvítum tónum. Í bakaleiðinni er skemmtun á skipinu með grískri tónlist og dönsum. 

1. maí | Frjáls dagur í Vouliagmeni

Bærinn Vouliagmeni er í einstöku uppáhaldi hjá heimamönnum en þar eru fagrar strandir og heilsulind sem upplagt er að njóta í dag. Þar er einnig að finna skemmtilega veitingastaði sem bjóða upp á gríska rétti, ásamt líflegum kaffihúsum. Stutt er til bæjarins Glyfada þar sem finna má gott úrval af verslunum fyrir þá sem vilja kíkja í búðir, ásamt kaffihúsum og veitingastöðum.

2. maí | Heimferð

Eftir þessa úrvalsferð er komin tími til að kveðja. Að loknum morgunverði höldum við út á flugvöllinn í Aþenu og fljúgum til Kaupmannahafnar kl. 13:35. Lending að staðartíma í Kaupmannahöfn kl. 15:50. Flugið til Keflavíkur verður kl. 22:20 að staðartíma og áætlaður lendingartími í Keflavík kl. 23:40.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Þóra Björk Valsteinsdóttir

Þóra Björk Valsteinsdóttir er fædd árið 1962 í Reykjavík. Að loknu stúdentsprófi frá Menntaskólanum við Hamrahlíð lá leiðin  til Grikklands þar sem að hún festi rætur og býr enn eftir 36 ár, gift og á 2 börn. Í Grikklandi nam hún m.a. grísku við háskólann í Aþenu, tók kennarapróf í ensku og fór á leiðsögumannanámskeið á vegum Aþenuháskóla. Þóra er einnig sagnfræðingur eftir að hafa stundað fjarnám í þeirri fræðigrein við Háskóla Íslands.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir