Lago Maggiore & Chamonix

Heimsborgin Mílanó ætlar að taka á móti okkur í dag með öllum sínum töfrum. Margt er hægt að skoða í þessari glæsilegu borg m.a. dómkirkjuna sem er eitt af meistaraverkum gotneskrar byggingarlistar en einnig er hægt að fara upp á þak kirkjunnar. Einnig má nefna Scala óperuna og listasafnið Brera, svo minnst sé á eitt af söfnum borgarinnar en þau eru fjölmörg. Það er alltaf gaman að skoða elsta yfirbyggða verslunarhúsið, Galleria Vittorio Emanuele II, sem var byggt á 18. öld en þar uppi er fjöldinn allur af veitingahúsum. Ekki má gleyma að Mílanó er ein af aðal tískuborgum heims og kaupmenn láta sig ekki vanta hér. Eftir gönguna með fararstjóra verður frjáls tími til að kanna borgina á eigin vegum, sýna sig og sjá aðra.

Dagurinn byrjar á siglingu yfir til Isola Bella sem er ein Borromee eyjanna. Fegurð hennar er ólýsanleg en hún ber nafn Isabellu eiginkonu Carlo III. Borromeo ættin byggði höll á eyjunni sem er þekkt fyrir að hafa verið gististaður Napóleons og eiginkonu hans, Jósefínu. Það er mjög skemmtilegt að skoða höllina, svo ekki sé talað um garðinn umhverfis hana, stórglæsilegur lystigarður á nokkrum hæðum. Eftir það verður siglt til eyjunnar Pescatori sem tilheyrir Borromee eyjunum en búseta hefur verið stöðug þar frá 14. öld. Mannlífið á eyjunni heillar en tilvera eyjarskeggja byggist á fiskveiðum í Lago Maggiore vatni. Þar er upplagt að fá sér hádegishressingu áður en siglt verður til baka.

Nú er komið að því að kveðja Stresa og verður stefnan tekin á Chamonix sem stendur við rætur hæsta fjalls Vestur-Evrópu, Mont Blanc. Á leið okkar þangað upplifum við enn eitt ævintýrið þegar við komum til Täsch og förum þaðan í stutta lestarferð til bæjarins Zermatt. Leið lestarinnar liggur á milli þriggja hæstu fjalla Evrópu, Dom, Matterhorn og Monte Rosa. Útsýnið frá Zermatt yfir á Matterhorn fjallið er hreint stórfenglegt. Í bænum er engin bílaumferð og gömlum húsum hefur verið haldið mjög vel við en fjósin hafa vikið fyrir Rolex og Gucci verslunum. Við komum til með að eiga góðan tíma í þessum yndislega bæ. Síðan verður ekið til til Chamonix en hér ætlum við að gista í tvær nætur.

Einn hápunktur ferðarinnar verður í dag í Chamonix, sem er bær fjalladýrkenda og þekktur skíðabær en fyrstu vetrarólympíuleikarnir voru haldnir hér árið 1924. Frá miðbænum gengur útsýniskláfur upp í 3.842 m hæð á Aiguille du Midi en þaðan er stórkostlegt útsýni yfir á Mont Blanc, Chamonix og dalina fyrir neðan. Hér er gott að vera vel klæddur. Við byrjum á því að taka kláfinn upp og njóta þess að sjá yfir töfraheim Alpafjallanna. Frá aðalbyggingunni gengur lyfta á flesta útsýnispallana en einnig eru þarna veitingastaðir með afar fögru útsýni. Eftir þessa dásemd verður hægt að njóta Chamonix bæjarins fram að kvöldverði á hótelinu okkar.

Þá er þessi glæsilega ferð á enda runnin og nú verður ekið til Genf. Brottför frá Genf er kl. 14:00 og lending í Keflavík kl. 15:50 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.