Gardavatn & Feneyjar

27. september – 7. október 2018 (11 dagar)

Gardavatn hefur verið einn vinsælasti áfangastaður Íslendinga til margra ára, enda meðal allra fegurstu staða á Ítalíu. Sjálfur Goethe líkti staðnum við himnaríki og skal engan undra.

Við hefjum ferðina á því að aka upp í stórbrotin Alpafjöllin, suður á bóginn og gistum í bænum Brixen í Tíról í tvær nætur. Torbole tekur á móti okkur við hið sægræna Gardavatn, en bærinn stendur á fallegum stað við norðurhluta vatnsins og er vinsæll ferðamannastaður. Í ferðinni munum við fara í áhugaverðar skoðunarferðir, yndislega siglingu á Gardavatni til bæjanna Limone og Malcesine, fara til Feneyja og heimsækja eina elstu borg Norður-Ítalíu, Veróna. Við höldum til Seefeld í Tíról eftir góða daga við Gardavatn og njótum þar náttúrunnar milli hárra og tignarlegra fjalla síðustu daga ferðarinnar. Við heimsækjum Innsbruck, höfuðstað Tíról og komum við í Mittenwald, þar sem við skoðum myndskreyttu húsin í þeim huggulega bæ.

Verð á mann í tvíbýli 229.900 kr.

Aukagjald fyrir einbýli 42.200 kr.


Innifalið

  • 11 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn á söfn, í hallir og kirkjur.
  • Kláfar eða stólalyftur upp á fjöll.
  • Strætisvagnaferð í Veróna.
  • Siglingar og vínsmökkun.
  • Hádegisverðir.
  • Þjórfé.

Valfrjálst

  • Kláfur upp á Pordoi ca. € 15.
  • Sigling í Feneyjum ca. € 16.
  • Sigling á Gardavatni, ca. € 13.
  • Kláfur frá Malcesine upp á Monte Baldo ca. € 20.
  • Aðgangur að hringleikahúsinu í Verona ca. € 8.
  • Hádegisverður og vínsmökkun í Rovereto ca. € 18.
  • Kláfur upp á Rosshütte ca € 18.

Kort af ferðinni

Ferðalýsing

Prenta ferðalýsingu

27. september | Flug til München & Brixen

Brottför frá Keflavík kl. 7:20. Mæting í Leifsstöð um 2 klst. fyrir brottför. Lending í München kl. 13:05 að staðartíma. Byrjum á því að fara inn til München, fá okkur hressingu og líta á mannlíf borgarinnar. Eftir nokkra dvöl í borginni verður síðan ekið upp í Alpafjöllin til Brixen í Tíról og gist í 2 nætur á hóteli í miðbænum.

28. september | Dólómítafjöllin

Eftir morgunverð í Brixen verður haldið til fjalla. Ekin verður stórbrotin og yndisfögur leið um Dólómítana, Alpafjöll Ítalíu. Farið verður með kláf upp á Pordoi, sem er í ca. 3.000 m hæð, en þar er mikilfenglegt útsýni yfir ítölsku-, austurrísku- og svissnesku Alpana, sem enginn má láta framhjá sér fara. Komið aftur til Brixen seinni hluta dags. 

29. september | Dagur í Brixen & Torbole á Ítalíu

Brixen er ein af perlum Suður-Tíról. Eftir morgunverð verður farið í gönguferð um elsta hluta borgarinnar, en hún er höfuðstaður Eisackdalsins og liggur við rætur fjallsins Plose. Í þessum 20.000 manna, huggulega bæ finnast gamlar götur, brýr, kirkjur og söfn. Þar mætst árnar tvær Eisack og Rienz sem ásamt umlykjandi vínekrum og aldingörðum gera Brixen að einstaklega heillandi og fallegum stað. Eftir hádegið kveðjum við borgina og leggjum af stað til Torbole við Gardavatn þar sem við munum gista í fimm nætur. 

Opna allt

30. september | Skoðunarferð & frjáls dagur

Dagurinn verður rólegur, en að loknum morgunverði förum við fótgangandi í skoðunarferð um bæinn Torbole. Að henni lokinni er frjáls tími til að skoða sig um í þessum snotra bæ, ganga litlar og þröngar götur hans, staldra við í verslunum, rölta meðfram ströndinni þaðan sem er einstakt útsýni yfir vatnið. Hægt að taka strætó til næsta bæjar Riva del Garda. Einnig er kjörið að njóta aðstöðunnar á hótelinu, annaðhvort í sundlaugargarðinum eða í heilsulindinni.

1. október | Dagsferð til Feneyja

Fyrir höndum er langur en stórskemmtilegur dagur. Við leggjum snemma af stað og  ökum til Feneyja. Á rölti um borgina, meðfram síkjum og yfir brýr, verður á vegi okkar allt það sem gerir Feneyjar að eftirsóttasta ferðamannastað álfunnar. Við Canal Grande gefur að líta einar 200 glæsilegar hallir og við Markúsartorgið stendur Markúsarkirkjan, ein merkilegasta kirkjubygging veraldar, sem byggð er í austrænum stíl og minnir helst á höllina úr ævintýrinu Þúsund og ein nótt. Síðdegis mun hverjum og einum gefast tími til þess að skoða þessa fallegu borg betur, njóta mannlífsins og jafnvel líta inn á söfn. Komið verður aftur á hótel undir kvöld.

2. október | Sigling, Limone & Malcesine

Farið verður í ljúfa siglingu á Gardavatni. Haldið til Limone, eins fallegasta bæjarins við vatnið og þar áð í dágóða stund. Þaðan verður siglt yfir sægrænt Gardavatnið yfir til Malcesine, sem er sögufrægur ferðamannabær við austurströnd vatnsins. Í Malcesine gefum við okkur góðan tíma, fáum okkur hressingu og skoðum okkur um í bænum. Áhugasamir geta farið með kláf upp á á Monte Baldo, hæsta fjallið við Gardavatn, en þeir sem kjósa heldur að vera á jafnsléttu geta litið inn í mjög áhugaverðan gamlan kastala sem er að finna í bænum. Frá Malcesine verður ekið til baka á hótelið.

3. október | Dagsferð til Veróna

Dagsferð til Veróna er einn hápunktur ferðarinnar, enda er borgin sú fallegasta og elsta á norður - Ítalíu. Veróna er borg menningar og lista, en frægust er hún sem sögusvið leikrits Shakespeare um Rómeó og Júlíu. Farið verður í skoðunarferð um borgina og staldrað við helstu staði þessarar merku borgar, svo sem þriðja stærsta hringleikahús veraldar, Arena, og kryddtorgið, en þar stendur fjöldi fagurra bygginga og minnisvarða. Allur miðbær borgarinnar eins og hann leggur sig er á skráður á heimsminjaskrá UNESCO og ekki að ástæðulausu.

4. október | Rovereto & Seefeld

Nú kveðjum við Gardavatn og höldum til Austurríkis. Á leiðinni komum við í forna  smábæinn Dro og lítum þar inn á einn stærsta skómarkað Norður-Ítalíu. Þaðan liggur leið okkar í kastala fyrir ofan Rovereto, þar sem við fáum stutta leiðsögn um höllina, snæðum léttan hádegisverð að hætti íbúanna í dalnum og aldrei að vita nema við fáum smá smakk af afurðum vínbænda héraðsins. Áfram verður ekið yfir Brennerskarðið til Seefeld, þar sem við gistum næstu þrjár nætur.

5. október | Frjáls dagur í Seefeld

Í dag tökum við það frekar rólega, hefjum daginn á staðgóðum morgunverði og höldum síðan í stutta skoðunarferð um Seefeld, sem er með eftirsóttustu ferðamannabæjum Tíról. Bærinn er umkringdur þverhníptum fjöllum, en áður fyrr var hér mikið vatnasvæði og ber nafn bæjarins það með sér. Eftir stutta göngu með fararstjóranum er frjáls tími það sem eftir lifir dags. Hér er margt hægt að gera, fara með hestvagni um bæinn, ganga hringinn í kringum vatnið eftir þægilegri gönguleið sem og fara með kláfi upp í Rosshütte sem er í 1.784 m hæð. Þar er að finna gott veitingahús og er upplagt að fá sér kaffi og svo sem eina tertusneið.

6. október | Dagsferð til Innsbruck & Mittenwald

Á dagskránni í dag er heimsókn til Innsbruck, höfuðstaðar Tíról, sem er umvafinn mikilli fjalladýrð. Innsbruck var ein af borgum Habsborgaranna, einnar valdamestu ættar  Evrópu um aldir og ber miðaldahluti borgarinnar þess greinilega merki. Blómatími Habsborgaranna var á 15. öld undir stjórn Maximilians I, en hann lét byggja eitt helsta aðdráttarafl borgarinnar, húsið með gullþakinu, sem stendur við eitt fallegasta torgið í Tíról. Við höldum í stutta skoðunarferð um borgina, en að henni lokinni verður hægt að kanna borgina á eigin vegum, líta inn til kaupmanna í Maria-Theresien-Straße eða setjast á kaffihús. Á bakaleiðinni verður komið við í bænum Mittenwald, sem á sér engan líka, en þar er að finna ótal lítil myndskreytt hús, dásamlegan bæjarlæk og skemmtilegar verslanir. Bærinn er frægur fyrir smíði strengja- og plokkhljóðfæra og stendur minnisvarði af Matthias Klotz, upphafsmanni fiðlusmíði í Mittenwald, fyrir utan fiðlusafn bæjarins. 

7. október | Heimferð

Eftir indæla og skemmtilega ferð verður ekið til München. Brottför þaðan kl. 14:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hlín Gunnarsdóttir

Hlín Gunnarsdóttir fæddist árið 1956 í Reykjavík en á ættir að rekja bæði vestur á firði og í Mýrdalinn. Hún lærði leikmynda og búningahönnun i Tórínó á Ítalíu á árunum 1978 - 82 og bjó þar alls í 12 ár eða til ársins 1987. Hlín starfaði í sjö sumur sem fararstjóri á Rimini á vegum Samvinnuferða-Landsýnar og þegar hún fluttist heim skellti hún sér í Leiðsöguskólann og starfaði eftir það sem leiðsögumaður á sumrin með erlenda ferðamenn, aðallega ítalska ferðamenn á Íslandi.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir