21. - 30. september 2024 (10 dagar)
Gardavatn hefur verið einn vinsælasti áfangastaður Íslendinga til margra ára, enda meðal allra fegurstu staða á Ítalíu. Sjálfur Goethe líkti staðnum við himnaríki og skal engan undra. Við hefjum ferðina á því að aka suður á bóginn upp í stórbrotin Alpafjöllin og gistum eina nótt í ljúfa bænum Brixen í Suður-Tíról .Riva del Garda tekur því næst á móti okkur við hið sægræna Gardavatn en bærinn stendur á fallegum stað við vatnið og er einn vinsælasti ferðamannastaður svæðisins. Í ferðinni munum við fara í áhugaverðar skoðunarferðir, yndislega siglingu á Gardavatni til bæjanna Limone og Malcesine, eiga ævintýralegan dag í Feneyjum og heimsækja Veróna, eina elstu borg Norður-Ítalíu. Við höldum til Seefeld í Tíról eftir góða daga við Gardavatn en á leiðinni þangað verður stoppað hjá vínbónda í Rovereto þar sem við snæðum léttan hádegisverð í miðaldakastala. Í Seefeld njótum við náttúrunnar milli hárra og tignarlegra fjalla síðustu daga ferðarinnar. Við heimsækjum Innsbruck, höfuðstað Tíról, og komum við í Mittenwald í Þýskalandi þar sem við skoðum litlu myndskreyttu húsin en að koma þar er eins og að lenda í miðju ævintýri.