Hjólað um Brugge

Ævintýralegi miðaldabærinn Brugge í Belgíu er einstök perla sem allir ættu að heimsækja að minnsta kosti einu sinni á ævinni og sjá fornar byggingar, steinlögð stræti, vatnavegi og markaðstorg. Hér er veisla fyrir augun hvert sem litið er. Fegurðin teygir sig út til landsbyggðarinnar í kring, heillandi þorp, rómantískir kastalar, ár og síki. Við hjólum að þorpinu Damme, heimsækjum Knokke við Norðursjó og borgina De Haan á leið okkar um flatlendið. Hér eru góðir hjólastígar hvarvetna og því tilvalið að fara allra sinna ferða hjólandi. Fararstjórinn, sem er þaulreyndur hjólagarpur, mun í samstarfi við innlendan staðarleiðsögumann leiða hópinn um svæðið og fræða fólk um staðhætti.

Hjólaðir verða um 50 – 70 km á dag og áherslan verður á að njóta, ekki þjóta. Gist verður á 4* hóteli í útjaðri Brugge sem er sérlega vel staðsett fyrir allar hjólaleiðir.

Verð á mann í tvíbýli 218.800 kr. 

Aukagjald fyrir einbýli 39.400 kr.

Innifalið

  • 8 daga ferð.
  • Flug með Icelandair og flugvallaskattar.
  • Ferðir á milli flugvallarins í Brussel og hótelsins í Brugge.
  • Gisting í tveggja manna herbergi með sturtu/ baði á 4 stjörnu hóteli.
  • Morgunverður allan tímann á hóteli.
  • 6 kvöldverðir á hóteli.
  • Hjólaprógramm í 5 daga.
  • Innlend leiðsögn í hjólaferðum.
  • Íslensk fararstjórn.

Ekki innifalið

  • Leiga á 21 gíra hjóli með lás og tösku í 6 daga 14.700 kr.
  • Leiga á rafhjóli með lás og tösku í 6 daga 29.300 kr.
  • Aðgangseyrir inn á söfn, í hallir og kirkjur.
  • Hádegisverðir.
  • Einn kvöldverður á frídegi.
  • Þjórfé.

Undirbúningur

Þetta er létt til miðlungserfið hjólaferð sem ætti að henta flestu hjólafólki. Dagleiðirnar spanna um 50-70 km. Ferðahraðinn er ekki meiri en svo að auðvelt er að upplifa umhverfið og njóta þess sem fyrir augu ber. Við ráðleggjum gestum okkar að fara í nokkrar lengri dagsferðir og festa kaup á gelhnakk eða hjólabuxum. Fararstjóri mun boða farþega sína í stutta hjólaferð eða ferðir hér heima áður en haldið verður utan. Því fylgir mikil ánægja að æfa fyrir hjólaferð af þessu tagi og farþegar njóta sjálfrar ferðarinnar betur ef þeir æfa og undirbúa sig vel fyrir ferðina.

Kort af ferðinni

FerðalýsingPrenta ferðalýsingu

Flug til Brussel

Flogið verður með Icelandair til Brussel þann 7. september. Brottför frá Keflavík kl. 7:40 en mæting í Leifsstöð í síðasta lagi 2 klst. fyrir brottför. Lending í Brussel kl. 12:45 að staðartíma. Gera má ráð fyrir að rútuferðin frá flugvellinum á gististað tak um 1,5 klst. Þann 14. september ferjar rúta okkur til Brussel en þaðan verður flogið kl. 14:00. Lending á Íslandi kl. 15:15 að staðartíma.

Tillaga að dagleiðum

Ólafur Örn Haraldsson, fararstjóri ferðarinnar, er reyndur hjólamaður og mun hann hafa innlendan hjólaleiðsögumann sér til stuðnings. Eftirfarandi eru leiðarlýsingar til viðmiðunar fyrir fimm hjóladaga auk eins hvíldardags. Fararstjóri mun í samráði við staðarleiðsögumann taka endanlegar ákvarðanir um val á dagleiðum eftir aðstæðum og hentugleika hverju sinni.

Dagleið 1 | Þorpin í Flanders

Þennan hjóladag munum við fara um fallegu sveitahéruðin í kring og sjá mikið af huggulegum sveitaþorpum, eins og t.d. Damme með sinn sögulega miðbæ. Damme er einnig þekkt fyrir listilega matargerð. Landslagið á þessu svæði einkennist af grænum engjum, vatnavegum, vindmyllum og trjágöngum en allt er þetta á flatlendi. 

  • Vegalengd: ca. 60 km
Opna allt

Dagleið 2 | D´Aertrycke og Wijnendaele kastalar

Ásamt því að halda áfram að njóta þessa græna landslags munum við sjá mjög áhugaverða kastala þennan dag. Sá fyrri er D´Aertrycke sem byggður var árið 1869 en hinn er Wijnendaele kastali sem er átta alda gamall. Wijnendaele er meira að segja með virkissíki og stendur á eyju í því miðju. 

  • Vegalengd: ca. 70 km

Dagleið 3 | Skipaskurðurinn frá Brugge til Ghent

Þessi friðsæla hjólaleið í trjágöngunum meðfram skipaskurðinum er einstaklega þægileg. Á leiðinni verður litið við í Male kastala sem áður fyrr hýsti æðstu ráðamenn á hverjum tíma en er nú klaustur. Saga hans nær allt aftur til 9. aldar en þá var hann reistur til að verjast mætti tíðum innrásum víkinga úr norðri. Þá var kastalinn lítið annað en voldugur turn úr timbri en á 12. öld var mikil bygging reist úr steini. Þjóðverjar sáu gagnsemi staðarins í heimstyrjöldunum tveimur því í þeim báðum hernámu þeir kastalann.

  • Vegalengd: ca. 50 km.

Dagleið 4 | Ostend

Nú verður hjólað gegnum sveitahéruðin að stærsta hafnarbæ Belgíu. Hafnarborgin Ostend myndaðist á 12. öld sem þorp og sjávarpláss á eynni Tsterep nálægt mynni árinnar Yser. Seinna á sömu öld var eyjan tengd meginlandinu og smám saman, með frekari fyllingu og stækkandi bæ hvarf eyjan. Frakkar hertóku Niðurlönd á sínum tíma og það leiddi til talsverðrar hnignunar, borgin varð ekki lengur eftirsótt hafnarborg. Frakkar byggðu þar mikla herstöð og snemma á 19. öld voru þar virki tvö, annað stendur enn og er kennt við Napoleon. Í dag er borgin vinsæll baðstrandabær með hvítar sandstrandir, sandhóla og melgresi, þar búa liðlega 70 þúsund íbúar. Skemmtilegur hjólastígur liggur meðfram strandlengjunni en þetta er vinsæll sumardvalarstaður.

  • Vegalengd: ca. 65 km.

Dagleið 5 | Lissewege og De Haan

Lissewege er huggulegt sveitaþorp sem byggt er á votlendi. Síki rennur í gegn um miðju þorpsins og húsin eru byggð á eikarstoðum. Mikið er um listamenn í þessum bæ. Áfram er haldið til De Haan en það er einstaklega heillandi strandbær með listilegum byggingum frá Belle Epoque tíma 19. aldar.

  • Vegalengd: ca. 55 km.

Frídagur

Nú er komið að frídegi ferðarinnar. Farþegar geta hjólað hvert sem þeir kjósa á eigin vegum, t.d. er vanur hjólreiðamaður um klukkustund að hjóla frá hóteli til baðstrandabæjarins Blankenberge út við Norðursjó. Þar er margt að sjá og vel má þar eyða broti úr degi áður en hjólað er til baka. Þeir sem kjósa að hvíla alveg geta skoðað Brugge nánar. Áhugasamir um listir og menningu ættu t.d. að skoða Brugse Vrije, þangað er rúmlega 30 mín. gangur frá hóteli um borgina. Þá er hugmynd að fara jafnvel með lest til háskólabæjarins Ghent sem státar af heillandi miðaldabyggingum í miðbænum.

Myndir úr ferðinni

Fararstjórn

Ólafur Örn Haraldsson

Ólafur Örn hefur stundað fjallamennsku hérlendis og erlendis og klifið mörg háfjöll þ.á m. Mont Blanc, Kilimanjaro, Aconcagua hæsta fjall Suður Ameríku og lægri fjöll í Nepal. Einnig var hann í fyrstu skíðaleiðangrum Íslendinga yfir Grænlandsjökul og á Suðurpólinn. Ólafur Örn hefur ferðast um ýmis lönd utan Evrópu s.s. N. og S. Ameríku, nokkur lönd Afríku, Nepal, Buthan, Mijanmar (Burma), Azerbasjan, Kosovo, Síberíu o.fl. 
 
Ólafur Örn hefur verið alþingismaður og þjóðgarðsvörður á Þingvöllum og er nú forseti Ferðafélags Íslands. Hann er kvæntur Sigrúnu Richter og eiga þau þrjá syni, Harald, Örvar og Hauk.

Hótel

Hotel Velotel Brugge

Gist verður á 4* hótelinu Velotel Brugge í útjaðri borgarinnar, en hótelið er sérlega vel staðsett fyrir aðgengi að hjólastígum svæðisins. Um 2,2 km eru að miðbæ Brugge. Herbergin eru rúmgóð og parketlögð. Þau eru að sjálfsögðu með baði/sturtu, minibar, sjónvarpi, öryggishólfi og loftkælingu. Ókeypis þráðlaus nettenging er á öllu hótelinu. Einnig er gufubað og líkamsræktaraðstaða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir