Sveitasæla á Englandi

20. – 25. júní 2018 (6 dagar)

Við bjóðum spennandi ferð til Norður-Englands þar sem skoðaðar verða ýmsar náttúruperlur, farið um þjóðgarða Yorkshire og á slóðir norrænna manna og fornra minja.  Flogið verður til Manchester, ekið um Wakefield og gömul kolanáma heimsótt, þaðan verður farið til Harrogate, þar sem gist verður í þrjár nætur. Annan daginn verður farið til Stamford Bridge og Jórvíkur á söguslóðir norrænna víkinga og fornra minja. Í Jórvík verður farið á Jorvik Viking Centre og rifjuð upp ferð Egils Skallagrímssonar til Jórvíkur, þar sem hann orti hið þekkta kvæði Höfuðlausn. Næstu tvo daga verður farið um Jórvíkurdalina, sem að hluta til eru þjóðgarðar. Þar verður komið við í skemmtilegum þorpum og bæjum og sögustaðir heimsóttir, s.s. kastali, fornminjar og kunnir staðir úr sjónvarpsþáttum. Í Manchester verður boðið upp á skoðunarferð fyrri hluta dags, m.a. á Vísinda- og iðnaðarsafnið, en síðan gefst tími eftir hádegi sem hver getur ráðstafað að vild. Að morgni síðasta dags er frjáls tími, en um kl. 11:00 verður lagt af stað á flugvöllinn til heimferðar. 

Verð á mann í tvíbýli 139.900 kr.

Aukagjald fyrir einbýli 31.300 kr.


Innifalið

  • 6 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Hádegisverðir.
  • Þjórfé.

Valfrjálst

  • National Coal Mining Museum for England ca. £9.
  • Stamford Bridge ca. £19.
  • Víkingasafnið York ca. £10.
  • Dómkirkjan York ca. £15.
  • Rievaulx Abbey ca. £6. Bolton Castle ca. £8.
  • Vísinda- og iðnaðarsafnið í Manchester ca. £8.

Kort af ferðinni

Ferðalýsing

Prenta ferðalýsingu

20. júní | Flug til Manchester, Wakefield & Harrogate

Flogið er til Manchester árla dags, brottför frá Keflavík kl. 8:00 en mæting í Leifsstöð í síðasta lagi 2 klst. fyrir brottför. Við lendum í Manchester kl. 11:35 og ökum beint til Wakefield skammt frá Leeds. Þar heimsækjum við gamla kolanámu og fræðumst um þann þátt í atvinnulífi Breta sem á sér langa sögu. Við sjáum aðbúnað og aðstæður í námunni og heyrum um hvernig hestar, m.a. íslenskir hestar, komu við sögu og hvers vegna þeir voru eftirsóttir til notkunar í námum. Síðdegis verður ekið til Harrogate og gist þar í þrjár nætur. 

21. júní | Stamford Bridge & York

Við ökum frá Harrogate til Stamford Bridge og fræðumst um innrás norskra víkinga á svæðið undir stjórn Haralds harðráða 25. september 1066. Áfram höldum við til hinnar fornu víkingaborgar, Jórvíkur eða York, en þar heimsækjum við Dómkirkjuna og Jorvik Viking Centre. Á árunum 1976 – 1981 unnu enskir fornleifafræðingar kappsamlega að uppgreftri fornminja í York. Í ljós kom heill bær norrænna manna frá 9. og 10. öld. Víkingasafnið, sem nú varðveitir þessar minjar, býður upp á merkilega ferð aftur í tímann til þeirra ára þegar norrænir menn bjuggu hér. Tímavélin nemur staðar á tilteknum degi í október árið 948. Gestir frá 21. öld eru komnir í Lundgötu þar sem íbúar vinna sín daglegu störf. Hér er selt og keypt, hér angar hverfið af 10. aldar mat, fötum og húsdýrum og er upplifunin engri lík. Þegar við höfum dvalið í heimi norrænna manna á 10. öld um hríð er frjáls tími til að skoða borgina betur. 

22. júní | Whitby – Skoðunarferð í þjóðgarð

Farið er í dagsferð til Whitby. Ekið verður um hluta Jórvíkurþjóðgarðs, um Thirsk til Rievaulx Abbey, sem er fornfrægt og aflagt klaustur. Þaðan er farið til Goathland, sem er áhugaverður staður, en hér voru sjónvarpsþættirnir Heartbeat myndaðir og hér er lestarstöðin fræga í Hogwarts sem kom við sögu í kvikmyndunum um Harry Potter. Næst verður ekið til Whitby, sem er vinsæll baðstrandarbær, en á heimleiðinni verður farið um Guisborough og um Osmotherley. Á leið okkar um enskar sveitir verða ýmis smáþorp á vegi okkar og munum við sjálfsagt heimsækja svo sem eina krá á einum þessara staða.

Opna allt

23. júní | Wensleydale og þjóðgarðinn - Hawes – Skipton

Við yfirgefum nú Harrogate og höldum til Manchester um annan hluta Jórvíkurþjóðgarðs. Farið er um Ripon, ekið um bæinn og jafnvel staldrað við í morgunkaffi. Á leiðinni heimsækjum við Bolton Castle, hann hefur í gegnum tíðina verið afar vinsæll tökustaður kvikmynda.  Því næst heimsækjum við litla markaðsbæinn Hawes, en þar eru framleiddir hinir frægu Wensleydale ostar sem rekja uppruna sinn til franskra munka frá 13. öld. Í Hawes eru verslanir, krár og veitingastaðir. Áður en við komum til Manchester verður staldrað við í miðbæ Skipton stutta stund. 

24. júní | Manchester – frjáls dagur

Að loknum morgunverði höldum við í skemmtilega skoðunarferð um þessa forvitnilegu borg og meðal annars munum við líta á Vísinda- og iðnaðarsafnið. Eftir hádegið gefst hverjum og einum tími til að skoða borgina á eigin vegum, kíkja á söfn eða í verslanir, allt eftir hentugleika og áhuga hvers og eins.

25. júní | Heimferðardagur

Hópurinn fluttur af hóteli á flugvöll. Brottför frá Manchester kl. 13:25 og er lending áætluð í Keflavík kl.15:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Árni Snæbjörnsson

Árni Snæbjörnsson er fæddur árið 1946 að Stað í Reykhólasveit og ólst þar upp. Hann er búfræðingur og búfræðikandídat (B.Sc) frá Hvanneyri og lauk framhaldsnámi (M.Phil) í landbúnaðargreinum frá Landbúnaðarháskólanum í Edinborg 1977.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir