Páskar í Flórens & Caprí

Flórens, Sorrento, Amalfíströndin, eyjan Caprí og Assisi eru sannkallaðar draumaperlur Ítalíu en kynngimögnuð fegurð þessara staða umvefur okkur í þessari glæsilegu ferð. Ferðin byrjar í Brixen í Suður-Tíról á Ítalíu en þaðan förum við til hinnar fögru borgar Flórens,  eða La Bella eins og hún er oft nefnd, sem er ein glæsilegasta lista- og menningarborg Ítalíu. Í Flórens upplifum við skemmtilega daga á meðan við fræðumst um sögu, listir og mannlíf borgarinnar. Þessi menningarborg er einstök og hreint ótrúlegt að slíkur fjöldi listaverka sé varðveittur á einum og sama staðnum. Verk listamanna á borð við Leonardo da Vinci og Michelangelo, auk svo margra annarra, gæða borgina slíkum töfrum að enginn fer héðan ósnortinn. Nú bíður okkar hinn dásamlegi Napólíflói og Sorrento, eftirsóttasti ferðamannabær hans, þar sem við njótum ljúfra daga. Á leið okkar þangað verður komið til Pompei þar sem finna má eina af frægustu fornminjum veraldar. Boðið verður upp á ævintýralega siglingu til sæbrattrar klettaeyjunnar Caprí þar sem siglt verður í Bláa hellinn og farið með stólalyftu upp á hæsta fjall eyjunnar, Monte Solaro. Við bæði siglum og ökum með Amalfíströndinni, sem er ein fallegasta strönd Ítalíu, og miðalda virkisborgin Assisi býður okkar í allri sinni dýrð. Þessi glæsilega ferð endar svo í Innsbruck, höfuðstað Tíróls í Austurríki. 

Verð á mann í tvíbýli 366.600 kr. 

Aukagjald fyrir einbýli 68.800 kr.

Innifalið

  • 14 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgunverður allan tímann á hótelum.
  • 10 kvöldverðir á hótelum.
  • Allar skoðunarferðir með rútu samkvæmt ferðalýsingu.
  • Sigling og ferð með smárútum meðfram Amalfíströndinni.
  • Ferja til og frá Caprí og litlir strætisvagnir um Caprí.
  • Íslensk fararstjórn.

Ekki innifalið

  • Þrír kvöldverðir í Flórens.
  • Aðgangseyrir í söfn, hallir og kirkjur.
  • Kláfar eða stólalyftur upp á fjöll.
  • Vínsmökkun.
  • Hádegisverðir.

Valfrjálst

  • Aðgangur að fornminjum í Pompei ca € 15.
  • Blái hellirinn ca € 28.
  • Stólalyfta upp á Monte Solaro fjallið á Caprí ca € 11.

Kort af ferðinni

FerðalýsingPrenta ferðalýsingu

8. apríl | Flug til München & Brixen

Brottför frá Keflavík kl. 7:20 og mæting í Leifsstöð í síðasta lagi 2 klst. fyrir brottför. Lending í München kl. 13:05 að staðartíma. Þaðan er ekin falleg leið um Alpana suður á bóginn, gegnum Brennerskarð og niður til Brixen í Suður-Tíról á Ítalíu þar sem gist verður fyrstu nóttina.

9. apríl | Brixen & Flórens

Eftir góðan morgunverð verður ekið til borgarinnar Flórens sem staðsett er í hinu víðfræga héraði Toskana. Flórens er með glæsilegustu lista- og menningarborgum Ítalíu og ein af fjölsóttustu borgum veraldar. Lega borgarinnar er með eindæmum fögur en hún stendur báðum megin við fljótið Arno. Í Flórens verður gist í 3 nætur á hóteli í miðbænum, aðeins örfáum skrefum frá demöntum listasögunnar.

10. apríl | Skoðunarferð í Flórens

Við hefjum daginn á glæsilegri skoðunarferð um Flórens með heimamann í fararbroddi sem mun leiða okkur í allan sannleikann um sögu og mannlíf borgarinnar. Fáar borgir komast í hálfkvisti við Flórens en ótrúlegt er að slíkur fjöldi fágætra listaverka finnist á jafn litlu svæði. Að skoðunarferðinni lokinni gefst hverjum og einum tími til að kanna borgina betur á eigin vegum og fá sér hressingu.

Opna allt

11. apríl | Frjáls dagur í Flórens

Hver kannast ekki við snillinga á borð við Leonardo da Vinci, Michelangelo, Botticelli, Galileo Galilei, Dante og Machiavelli? Allir mörkuðu þeir spor sín í menningar- og listasögu Flórens. Í dag er upplagt að skoða sig betur um í töfrandi borginni og verja t.d. drjúgum tíma á Galleria deglia Uffezi listasafninu, sem er eitt glæsilegasta listasafn landsins. Það var áður stjórnsýsluhús en er nú málverkasafn með 4.500 myndum sem sýna þróun menningar í Flórens og málaralistar í Feneyjum. Svo má ekki gleyma glæsilegustu höll borgarinnar, Palazzo Pitti, og yndislegum garði hennar. Kaupmenn borgarinnar eru á sínum stað og leggja sitt af mörkum til að gera þetta að ógleymanlegum degi.

12. apríl | Fornminjar í Pompei & Sorrento

Nú kveðjum við Flórenz og ökum til Sorrento við Napólíflóa, eins fallegasta flóa landsins. Sorrento er hrífandi bær í bröttum hlíðum en í hlíðum hans vaxa ólífu-, appelsínu- og sítrónutré og þess má geta að Limoncello líkjörinn frægi kemur frá þessu svæði. Á leiðinni þangað verður stoppað í Pompei þar sem skoðaðar verða einhverjar frægustu fornminjar veraldar. Rústir gömlu Pompei eru eitt stórkostlegasta dæmið um fornleifauppgröft heillar byggðar og mun heimamaður leiða okkur í allan sannleikann um söguna. Eftir það heldur ferðin áfram til Sorrento þar sem gist verður í 5 nætur á góðu hóteli.

13. apríl | Dagur í Sorrento við Napólíflóa

Dagurinn er tilvalinn til afslöppunar. Fararstjórinn býður upp á stutta skoðunarferð um bæinn og eftir það er upplagt að kanna dásamlegt umhverfið í Sorrento, eins eftirsóttasta ferðamannabæjarins á Sorrento skaganum. Í bænum er fjöldinn allur af einstaklega heillandi, þröngum, gömlum götum, fögrum kirkjum og glæstum byggingum.

14. apríl | Sigling til Caprí

Nú höldum við í siglingu til Caprí, perlu Napólíflóans. Við skoðum fallegu eyjuna, siglum að Bláa hellinum, Grotta Azzurra, og förum upp til Caprí og Anacapri þar sem við njótum stórfenglegs útsýnis. Áhugasömum gefst tækifæri til að fara með stólalyftu upp á fjallið Monte Solaro. Jafnframt verður hægt að fá sér hressingu og líta á kniplinga og alls kyns handunnar vefnaðarvörur, dúka, klæði og fatnað.

15. apríl | Sigling & rúta með Amalfíströndinni

Haldið verður í töfrandi dagsferð um Amalfíströndina þar sem fegurðin er svo sannarlega einstök. Við hefjum ferðina á siglingu meðfram ströndinni til hins dásamlega bæjar Amalfí, þar sem við stígum á land og skoðum okkur um. Á rölti um bæinn sjáum við glæsilega dómkirkju frá 10. öld, heillandi veitinga- og kaffihús og litlar verslanir sem gaman er að kíkja inn í. Því næst verður ekið til bæjarins Ravello sem stendur í um 350 m hæð en þaðan gefur að líta ægifagurt útsýni yfir alla strandlengjuna, eins langt og augað eygir. Þar er einnig að finna hina gullfallegu höll Rufoli, þar sem tónskáldið Richard Wagner var gestkomandi um tíma og fékk þar innblástur að óperu sinni Parsifal. Ekið verður með smárútum til baka eftir Amalfíströndinni, milli smábæja sem hanga utan í klettabrúninni. Hvarvetna gefur að líta dásamlegt landslag á þessari fallegustu strandlengju Ítalíu. Við mælum eindregið með því að gestir gæði sér á grilluðum fiski í hádeginu en það er einn helsti sérréttur íbúa svæðisins.

16. apríl | Rólegheit & slökun í Sorrento

Þennan dag gefst heill dagur til þess að slaka á og njóta þess að vera á þessum yndislega stað. Sorrento er líflegur og skemmtilegur bær, þar er margt að skoða og tilvalið að kíkja í verslanir og á kaffi- og veitingahús. Einnig er hægt að slaka á við sundlaug hótelsins eða ganga niður að strandlengjunni.

17.apríl | Orvieto & Assisi

Nú kveðjum við þennan yndislega stað eftir töfrandi daga. Ekin verður heillandi leið til Assisi í Umbria héraði þar sem gist er í 2 nætur. Á leiðinni þangað verður stoppað í fallega bænum Orvieto sem byggðist upp á flötum móbergsstapa. Þar gefum við okkur tíma til að fá okkur hressingu og skoða fallegu dómkirkjuna en bærinn er einnig frægur fyrir hvítvínið sitt.

18. apríl | Ljúfur dagur í Assisi

Helgi staðurinn Assisi er yndislegur virkisbær frá miðöldum í miðju Umbria héraði og er bærinn á heimsminjaskrá UNESCO. Hér var heilagur Frans frá Assisi fæddur sem var predikari og boðaði meinlætislíf og höfnun veraldlegra gæða. Hann stofnað hér reglu heilags Frans og reglu heilagrar Klöru frá Assisi. Við fetum í fótspor þeirra og skoðum kirkjurnar San Francesco og Santa Chiara. Eftir það verður góður tími til að skoða sig um í þessum fallega, gamla miðaldabæ og kanna líf bæjarbúa á eigin vegum.

19. apríl | Assisi & Innsbruck

Nú kveðjum við Assisi eftir yndislega daga. Við leggjum snemma af stað og nú verður stefnan tekin á Brennerskarðið. Þetta er ein fallegasta leiðin yfir Alpana og yfir til Innsbruck, höfuðstaðar Tíról í Austurríki, sem er umvafinn mikilli fjalladýrð. Þar verður gist í 2 nætur á góðu hóteli í miðbænum.

20. apríl | Skoðunarferð um Innsbruck & frjáls tími

Ljúfur dagur í Innsbruck sem var ein af borgum Habsborgaranna, einnar valdamestu ættar Evrópu um aldir og ber miðaldahluti borgarinnar þess greinilega merki. Blómatími Habsborgaranna var á 15. öld undir stjórn Maximilians I en hann lét byggja eitt helsta aðdráttarafl borgarinnar, húsið með gullþakinu, sem stendur við eitt fallegasta torgið í Tíról. Við höldum í stutta skoðunarferð um borgina en að henni lokinni verður hægt að kanna borgina á eigin vegum, líta inn til kaupmanna í Maria-Theresien-Straße eða setjast inn á notalegt kaffihús.

21. apríl | Heimferð frá München

Nú er komið að heimferð eftir þessa glæsilegu ferð. Ekið verður út á flugvöllinn í München og er brottför þaðan kl. 14:05 og áætluð lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Blái hellirinn

Blái hellirinn

Stytta eftir Michelangelo í Flórens

Stytta eftir Michelangelo í Flórens

Uffizi safnið

Uffizi safnið

Flórens

Flórens

Flórens

Flórens

Innsbruck

Innsbruck

Caprí

Caprí

Caprí

Caprí

Caprí

Caprí

Pompeii

Pompeii

Caprí

Caprí

Amalfí ströndin

Amalfí ströndin

Assisi

Assisi

Dómkirkjan í Orvieto

Dómkirkjan í Orvieto

Blái hellirinn
Stytta eftir Michelangelo í Flórens
Uffizi safnið
Flórens
Flórens
Innsbruck
Caprí
Caprí
Caprí
Pompeii
Caprí
Amalfí ströndin
Assisi
Dómkirkjan í Orvieto

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir