Konungleg sigling á Rhône & Saône

6. – 17. maí 2018 (12 dagar)

Stórglæsileg fljótasigling um dásamleg héruð Suður-Frakklands og Provence hérað eftir ánum Rhône og Saône.

Siglingin byrjar í Chalon-sur-Saône í Búrgúnda héraðinu með skipinu MS Mistral og siglt suður til Martigues við Miðjarðarhafið. Á leið okkar kynnumst við hrífandi fögru landslagi, fallegum borgum, köstulum, litríkum þorpum og fræðumst um sögu og menningu þeirra. Auk töfrandi siglingu eftir ánum, verður fјölmargt skoðað í landi m.a. gamla, rómverska borgin Mâcon og við njótum fegurðar Búrgúnda og Beaujolais vínhéraða með viðkomu í Hameau du vín safninu. Lyon, borgin við ármót Rhône og Saône er einstaklega töfrandi og á siglingu verður áð við bæinn Tain l’Hermitage við frægustu vínakra Frakklands. Við siglum eftir Ardèche gilinu, sem nefnt er Grand Canyon Frakklands og er það einstök upplifun. Í Provence héraði heimsækjum við borg páfans, Avignon og fetum í fótspor Van Gogh listamanns í borginni Arles. Við hrífumst af heillandi héraðinu Camargue og Saintes Maries de la Mer, sem er yndislegur pílagrímsbær sígauna. Siglingu okkar lýkur í Martigues við Miðjarðarhafið en til að kóróna upplifunina endum við ferðina við ítölsku Riveruna í bænum Diano Marina með viðkomu í furstaríkinu Mónakó. 

Verð á mann í tvíbýli 377.300 kr. 

Aukagjald fyrir einbýli 78.200 kr.

Innifalið

  • 12 daga ferð.
  • Flug og flugvallarskattar
  • Gisting í 2ja manna herbergi með baði á hótelum í upphafi og lok ferðar
  • Morgun- og kvöldverður allan tímann á hótelum
  • Allar skoðunarferðir með rútu samkvæmt ferðalýsingu
  • 7 daga fljótasigling frá Chalon-sur-Saône til Martigues með MS Mistral
  • Gisting í 6 nætur á MS Mistral í káetum með sturtu / salerni
  • Morgun-, hádegis- og kvöldverður á MS Mistral
  • Allir drykkir með máltíðum á skipinu, vín, bjór, vatn og kaffi espresso
  • Móttökudrykkur á skipinu og allir drykkir á bar
  • Gala kvöldverður síðasta kvöldið á skipinu
  • Aðgangseyrir í vínsafnið Hameau du Vin og vínsmökkun
  • Íslensk fararstjórn

Ekki innifalið

  • Aðgangseyrir inn í söfn, hallir og kirkjur.
  • Siglingar, hádegisverðir og vínsmökkun (fyrir utan það sem tekið er fram í innifalið).
  • Þjórfé.

Valfrjálst

  • Furstahöllin í Mónaco ca. € 8.
  • Monte Carlo spilavítið ca. € 14.

Kort af ferðinni

Ferðalýsing

Prenta ferðalýsingu

6. maí | Flug til Parísar & Fontainbleau

Brottför frá Keflavík kl. 7:40. Mæting í Leifsstöð í síðasta lagi 2 klst. fyrir brottför. Lending í París kl. 12:55 að staðartíma. Þaðan verður ekið út fyrir borgina og gist fyrstu nóttina í bænum Ury, sem er í útjaðri Fontainebleau, en þar stöldrum við og skoðum höllina Fontainebleau sem sett var á heimsminjaskrá UNESCO árið 1981. 

7. maí | Chalon sur Saône & sigling á ánni Saône

Við hefjum þennan góða dag á rólegum morgunverði. Að honum loknum verður lagt af stað í suðurátt og ekin fögur leið til Chalon sur Saône. Vegna legu borgarinnar og fjölmargra vatnaleiða í kring, lá rómverska verslunarleiðin þar á tímum Rómverja. Borgin var ein mikilvægasta viðskiptaborg miðalda, en er nú þekktust fyrir að vera ein af verslunarborgum Búrgúndí vínhéraðsins. Chalon er fæðingarborg Niépce Nicéphore, sem var uppfinningamaður og einn af frumkvöðlunum á sviði ljósmyndunar. Þar bíður okkar fljótaskipið MS Mistral sem er sannkallað fljótandi eðalhótel og verðum við boðin velkomin í smávegis athöfn áður en kvöldverður hefst.

Á fljótaskipinu verður gist í þægilegum velbúnum káetum með tveimur rúmum, sturtu/salerni, loftkælingu, hárþurrku, sjónvarpi, öryggishólfi og útsýnisgluggum. Uppi á sóldekki er allt til alls, bæði legubekkir sem og borð og stólar. Um borð er setustofa með bar, les- og sjónvarpsstofa og veitingasalur. Á kvöldin er þjónað til borðs. Fullt fæði er innifalið, drykkir með mat á meðan á siglingu stendur og einnig á barnum. Á meðan á kvöldverði stendur tekur MS Mistral stefnuna niður ána Saône til Macon. Þar sjáum við í hina frægu, löngu vínakra Côtes du Rhône, Beaujolais og Maconnais.

8. maí | Mâcon & ljúf sigling til Lyon

Eftir morgunverð gefst tími til að rölta um elsta hluta hinnar fornu, rómversku borgar Mâcon. Ráðhúsið og fleiri byggingar minna á blómatíma hennar sem höfuðborg Saône-et-Loire svæðisins. Þarna er að finna eitt elsta apótek landsins frá 1761 og það er sannarlega þess virði að skoða. Borgin gegndi lykilhlutverki í starfi frönsku andspyrnuhreyfingarinnar í seinni heimstyrjöldinni og var fyrsta borgin á frísvæðinu milli Parísar og Lyon. Á meðan við borðum hádegisverð á skipinu líðum við áfram á ljúfri siglingu til Belleville og upplifum töfrandi náttúrufegurð á leið fram hjá Côtes du Rhône, Maconnais og Beaujolais vínökrum. Eftir hádegisverð er skoðunarferð í landi. Ekið verður um Beaujolais vínræktarhéraðið og skoðum áhugavert vínsafn, Hameau du Vin í Romanèche-Thorins. Við kveðjum að sjálfsögðu ekki svæðið án þess að smakka hin frægu vín héraðsins. Skipið bíður okkar í Belleville og siglingin heldur áfram til Lyon. Kvöldverður mun snæddur um borð, en skipið kemur til hafnar að kvöldi og liggur við festar hjá Lyon yfir nóttina.

Opna allt

9. maí | Lyon, sigling hjá Vienne & Tain-l'Hermitage

Eftir morgunverð höldum við í skoðunarferð um Lyon, sem er önnur fjölmennasta borg landsins. Við skoðum elsta hluta borgarinnar, St. Jean, sem stendur á tanganum við ármót Rhône og Saône. Torgin Place des Terreaux og Place Bellecour í St. Jean teljast með stærstu torgum Evrópu. Hádegisverður er snæddur um borð og siglingin heldur áfram suður ána Rhône til vínbæjarins Tain-l’Hermitage. Leiðin er rómantísk og fögur, siglt verður hjá gömlu, rómversku borginni Vienne, en borgin geymir umtalsverðar minjar frá tímum Rómverja, s.s. hof Ágústusar. Við siglum áfram og við tekur Condrieu héraðið, hjarta Côtes du Rhône sem þekkt er fyrir einstaklega gjöfula vínakra. Kvöldverður verður snæddur um borð. Skipið kemur að kvöldi til bæjarins Tain l’Hermitage, en þar eru einu frægustu vínakrar Frakklands. Þarna liggur skipið við festar yfir nóttina og er upplagt að fara í bæjarrölt um Tain l’Hermitage eftir kvöldverð.

10. maí | Sigling til Avignon & Ardèche gilið

Að morgni heldur heillandi siglingin áfram, framhjá kastalanum La Voulte, Tournon og háskólaborginni Valensa til St. Etienne des Sorts. MS Mistral leggur að landi á meðan við borðum hádegisverð. Eftir hádegi verður siglt eftir hinu stórfenglega Ardèche gili, sem er 300 m hátt og 30 km að lengd, en mikill kraftur árinnar Ardéch hefur sorfið sig inn í bergið, myndað hella, boga og skör sem s.s. Pont-d-Arc, sem er 34 m á hæð. Á leið okkar njótum við stórkostlegs útsýnis yfir þetta villta landslag. En nú höldum við til skips og ljúflega siglum við áfram, framhjá Roquemaure, Pont-St-Esprit og Donzère-Mondragon, en þar verður farið um stóran skipastiga. Áður voru þarna miklar flúðir en fljótið hefur verið tamið með sterkum varnargörðum og skipastigum. Þessi gamla leið frá Miðjarðarhafi til norðurhluta Evrópu var sú eina sem lá ekki yfir fjallgarða. Á þessum slóðum stigu Rómverjar sín fyrstu skref til yfirráða í Gallíu og skildu alls staðar eftir sig ummerki. Komið verður seint um kvöldið að landi í Avignon en frá ánni skín borgin eins og glitrandi perla.

11. maí | Sigling um Provence hérað, Avignon & Arles

Eftir morgunverð verður haldið í skemmtilega skoðunarferð um Avignon. Borgarmúrarnir um gamla bæinn hafa varðveist með eindæmum en innan hans er að finna fjölda sögufrægra staða. Við munum staldrað við nokkra þeirra á göngu okkar um borgina, s.s. Palais des Papes, höllina sem var íverustaður páfans á 14. öld, dómkirkjuna og það sem eftir er af brúnni Saint-Bénézet. Á meðan við snæðum hádegisverð á skipinu léttum við akkerum og siglum töfrandi leið til Arles. Síðdegis gefst tími til að skoða sig um í þessari einstöku borg, sem er ein af perlum Suður-Frakklands. Á ljúfri göngu verður komið að hinu margrómaða rómverska hringleikahúsi, safni Van Gogh, en listamaðurinn dvaldi í bænum um tíma og málaði þar mörg sín þekktustu verk, þ.á.m. Gula kaffihúsið. Skipið liggur hér í höfn í nótt.

12. maí | Camargue, sigling frá Port St Louis & Martigues

Í dag förum við með rútunni í ljúfa ferð um Camargue svæðið, sem er friðlýst vatnasvæði myndað af framburði Rhône. Þar má sjá hópa af flamingóum, svörtum nautum og hvíta, arabíska hesta. Á þessari leið verður komið við í bænum Saintes Maries de la Mer, sem er pílagrímsbær evrópskra sígauna. Eftir það verður ekið til Port St. Louis vestur af Marseille, þar sem hádegisverður bíður okkar um borð. Nú leggur skipið af stað í hrífandi siglingu út í Fos flóann, gegnum þröngan skipaskurð til Martigues við Rhônedelta, sem minnir töluvert á Feneyjar, þar sem áin rennur út í Miðjarðarhafið. Um kvöldið njótum við glæsilegs hátíðarkvöldverðar og skemmtiatriða á veitingastað skipsins og eigum góða stund saman.

13. maí | Diano Marina við ítölsku rivíeruna

Í dag er komið að því að kveðja áhöfnina á fljótaskipinu MS Mistral eftir sannkallaða dýrðardaga. Að loknum morgunverði förum við frá skipi og nú verður stefnan tekin á bæinn Diano Marina við ítölsku rivíeruna. Þar verður gist í 3 nætur á góðu hóteli við svonefnda blómaströnd, en hún dregur nafn sitt af einstakri blómaræktun þar um slóðir. 

14. maí | Frjáls dagur í Diano Marina

Rólegheit og slökun eru á dagskrá okkar í dag. Upplagt er að kanna umhverfið á eigin vegum, en einnig er hægt að nota frábæru aðstöðuna við hótelið og taka lífinu með ró.

15. maí | Furstadæmið Mónakó

Í dag heimsækjum við furstadæmið Mónakó, sundum kallað dvergríkið. Byrjað verður á að skoða kaktusgarðinn, en þaðan er glæsilegt útsýni yfir borgina og klettinn, sem gamli bærinn var reistur á. Við höldum í skoðunarferð um klettaborgina, en þar er að finna höll furstafjölskyldunnar og dómkirkjuna þar sem Grace Kelly var borin til grafar. Einnig verður komið við í Monte Carlo hverfinu þar sem glæsileg bygging Grand Casino spilavítisins er og að sjálfsögðu lítum við þar inn.

16. maí | Ekið til Zürich

Nú verður ekið upp í tignarleg Alpafjöllin til Zürich, þar sem gist verður síðustu nóttina á hóteli nálægt flugvellinum.

17. maí | Heimferð frá Zürich

Nú er komið að leiðarlokum, að morgunverði loknum verður ekið á flugvöllin í Zürich. Brottför þaðan kl. 14:00 og áætluð lending í Keflavík kl. 15:50 að staðartíma.

Fararstjóri getur fært milli daga eftir því sem þörf þykir þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir