Fljótasigling á Rín

Við líðum eftir Rín, einu stærsta fljóti Evrópu, og virðum fyrir okkur einstaka fegurð Rínardalsins. Daglega bíða okkar nýir og spennandi áfangastaðir en á fögrum bökkum Rínar eru ótal sögufrægir staðir sem við munum fræðast um. Eftir flug til Frankfurt ökum við að ánni Main þar sem við stígum um borð í fljótaskipið MS Gérard Schmitter. Við gistum allar fimm nætur ferðarinnar um borð í þessu glæsilega skipi og eru allar máltíðir innifaldar. Í vínþorpinu Rüdesheim er fjöldinn allur af huggulegum bindingsverkshúsum í gömlum stíl sem unun er að virða fyrir sér. Á siglingu okkar niður fljótið ber vínakra, kastala og hallir fyrir augu og við sjáum m.a. Loreley klettinn, ármótin við Mósel, hina frægu dómkirkju í Köln og borgirnar Nijmegen og Amsterdam. Amsterdam er oft nefnd Feneyjar norðursins og munum við gefa okkur góðan tíma til að skoða þessa litríku og líflegu borg, bæði fótgangandi og á siglingu um síkin. Flogið verður heim frá Amsterdam en tilvalið er að framlengja ferðina og dvelja á eigin vegum í borginni eitthvað lengur. 

Verð á mann í tvíbýli 238.800 kr.

Aukagjald fyrir einbýli 63.200 kr.

Aukagjald fyrir káetu á miðju þilfari er 25.900 kr. á mann í tvíbýli.
Ekki er hægt að fá einbýli á miðju þilfari.

Aukagjald fyrir káetu á efra þilfari er 34.500 kr. á mann í tvíbýli.
Ekki er hægt að fá einbýli á efra þilfari.


Innifalið

  • 6 daga ferð
  • Flug með Icelandair og flugvallarskattar.
  • Rútuferð frá flugvellinum í Frankfurt.
  • Gisting á skipinu MS Gérard Schmitter í 5 nætur.
  • Morgun-, hádegis- og kvöldverður alla daga um borð.
  • Drykkir með máltíðum á skipinu, vín, bjór, vatn og kaffi.
  • Allir drykkir á barnum um borð (fyrir utan drykki á sérseðli).
  • Hátíðarkvöldverður 29. september um borð í skipinu.
  • Skoðunarferð með leiðsögumanni í Amsterdam og Düsseldorf.
  • Sigling með útsýnisbátum um síkin í Amsterdam.
  • Rútuferð út á flugvöll í Amsterdam.
  • Íslensk fararstjórn.

Ekki innifalið

  • Þær máltíðir sem ekki eru tilgreindar undir innifalið.
  • Aðgangseyrir annar en nefndur er undir innifalið.
  • Forfalla- og ferðatryggingar.
  • Þjórfé.

Kort af ferðinni

FerðalýsingPrenta ferðalýsingu

25. september | Flug til Frankfurt & farið um borð í MS Gérard Schmitter

Brottför er frá Keflavík kl. 7:30 en mæting er í Leifsstöð a.m.k. 2,5 klst. fyrir brottför. Lent í Frankfurt kl. 13:15 að staðartíma. Ekið verður frá Frankfurt niður að ánni Main en þar stígum við um borð í fljótaskipið MS Gérard Schmitter. Við munum gista fimm nætur um borð í þessu glæsilega skipi í þægilega vel búnum káetum með tveimur rúmum og útsýnisglugga. Þjónað er til borðs í hádeginu og á kvöldin en á morgnana er hlaðborð. Á meðan á siglingu stendur eru flestir drykkir innifaldir bæði með mat og á barnum í gestasalnum. Uppi á sóldekki eru legustólar til reiðu. Þegar við höfum komið okkur fyrir hittum við ferðafélagana og áhöfn í móttökuathöfn og snæðum kvöldverð um borð.

26. september | Rüdesheim

Fljótaskipið er nú búið að festa landfestar í Rüdesheim. Við borðum staðgóðan morgunverð um borð og förum svo í land í Rüdesheim, sem m.a. er þekkt fyrir bindingsverkshúsin sín. Við heimsækjum verksmiðju Asbach Uralt vínbrennslunnar og fáum þar leiðsögn um svæðið og kynnumst framleiðsluferlinu á þessu þekkta víni. Eftir það býðst okkur að fara í nýstárlega vínsmökkun. Á leið okkar aftur að skipinu er tilvalið að kanna betur hina líflegu Drosselgasse. Þessi gata varð heimsfræg á sínum tíma fyrir andrúmsloftið sem skapaðist þegar tónlistin ómaði út á götu frá tónlistarmönnum sem spiluðu á fjölmörgum börum í götunni. Að loknum hádegisverði leggur skipið af stað í siglingu um rómuðustu svæði hins sögufræga Rínardals. Einn hápunktur dagsins er Loreley kletturinn, sem er þekktur fyrir þjóðsöguna um lokkaprúðu hafmeyjuna Loreley sem sat uppi á klettinum og leiddi fiskimenn í dauðann með seiðandi söng sínum. Þessi saga hefur verið yrkisefni margra skálda, m.a. Heinrich Heine. Við siglum fram hjá hinni 2000 ára gömlu borg Koblenz, sem er staðsett við ármót Mósel og Rínar. Skaginn sem myndast við ármótin er kallaður þýska hornið eða „Deutsches Eck“. Á stuttri siglingu áfram til Kölnar mun ævintýralega kastala og virki bera fyrir augu.

27. september | Köln & Düsseldorf

Í morgunsárið tekur gamli bærinn í Köln á móti okkur. Eftir morgunverð gefst tækifæri til að rölta um þröngar gamlar götur þessarar elstu stórborgar Þýskalands en saga hennar spannar allt að 2000 árum. Við skoðum einnig hina frægu Kölnardómkirkju, sem er stærsta gotneska kirkja Norður-Evrópu. Köln er í dag kunn fyrir stórar og skemmtilegar karnival hátíðir. Bjórunnendur ættu að smakka hinn fræga Kölnarbjór, Kölsch. Að loknum hádegisverði verður siglt til Düsseldorf en borgin er meðal annars þekkt fyrir falleg og þéttvaxin kastaníutré. Düsseldorf er mikil menningarborg og þykir verslunarglöðu fólki einkar gott að versla þarna. Einnig er gamli bæjarhlutinn afar líflegur og skemmtilegur. Innlendur staðarleiðsögumaður mun leiða okkur um áhugaverðustu svæði borgarinnar. Á meðan við snæðum kvöldverð um borð í skipinu verða landfestar leystar og við siglum fram hjá Emmerich og í áttina að Hollandi.

Opna allt

28. september | Nijmegen í Hollandi & Amsterdam

Skipið hefur nú lagt að í Nijmegen. Árdegis gefst tækifæri til að rölta um þessa elstu borg Hollands. Hún var mennta- og menningarsetur fyrr á öldum, aðsetur Karlunga og síðar Hansaborg. Meðal þess markverðasta sem sjá má í borginni er Karólínska kapellan frá 11. öld, hin gotneska kirkja St. Stevens og ráðhúsið. Eftir hádegi leggjum við aftur af stað og siglum m.a. fram hjá Arnhem og Utrecht og komum á síðasta áfangastaðinn okkar, Amsterdam, um kvöldmatarleytið. Eftir kvöldverð um borð verður boðið upp á kvöldsiglingu í útsýnisbát með glerþaki um síki miðborgarinnar og við kynnumst lifandi og fallega upplýstri Amsterdam í kvöldbúningnum.

29. september | Amsterdam

Að morgunverði loknum fáum við að kynnast Amsterdam með innlendan staðarleiðsögumann í fararbroddi, sem sýnir okkur það markverðasta sem „Feneyjar norðursins“ hafa upp á að bjóða. Að skoðunarferð lokinni gefst tími til að kynna sér þessa stórbrotnu borg á eigin vegum. Hér flýgur tíminn áfram við að skoða ótal rómantísk síki og litrík, heillandi hús sem halla sér hvert að öðru. Áhugasamir geta litið á kaffihús af ýmsu tagi eða heimsótt stórfengleg listasöfn. Um kvöldið er hátíðarkvöldverður um borð í MS Gérard Schmitter.

30. september | Heimferðardagur

Nú er komið að leiðarlokum. Haldið verður með rútu út á flugvöll í Amsterdam að loknum morgunverði. Brottför kl. 14:00 og áætluð lending í Keflavík kl. 15:10 að staðartíma.

Myndir úr ferðinni

Fararstjórn

Sigrún Sól Ólafsdóttir

Sigrún Sól Ólafsdóttir er fædd árið 1968 á Selfossi þar sem hún ólst upp, en lagðist snemma í ferðalög víða um heim og býr nú ýmist í Berlín eða á Íslandi ásamt þremur sonum sínum. Sigrún er leikkona, leikstjóri og leiðsögumaður að mennt og starfaði við leiklist í mörg ár. Hún lauk mastersnámi í Hagnýtri menningarmiðlun frá Háskóla Íslands árið 2012 og fór í framhaldsnám í menningarsamskiptum til Berlínar í Þýskalandi árið 2012 - 2013. Hún rekur nú eigið fyrirtæki sem sérhæfir sig í námskeiðahaldi og leikaravali fyrir kvikmyndir og auglýsingar. Sigrún starfar einnig sem leiðsögumaður á Íslandi og á Grænlandi, bæði með ensku- og þýskumælandi ferðamenn.

Skip

MS Gerard Schmitter

MS Gérard Schmitter, sem er í eign franska skipa-félagsins CroisiEurope, var tekið í notkun árið 2012. Skipið er 110 metra langt, 11,40 metrar á breidd og með 88 káetum á þremur hæðum. Lyfta er á milli hæða og á skipinu er að finna setustofu með bar og glæsilegum veitingastað. Á sóldekkinu eru sæti og legubekkir. Allar káeturnar eru með glugga, sjónvarpi, hárblásara, öryggishólfi og baðherbergi með sturtu. 

Hér má sjá myndir og lesa nánar um skipið.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir