Svartfjallaland

Nú er komið að því að kanna nánar þessa yndislegu bæjarperlu, Budva. Við förum í áhugaverða skoðunarferð á gönguferð um þennan 11.000 manna bæ með sínum litlu, þröngu götum og virkisveggjum. Vísindamenn eru á því að bærinn hafi áður verið eyja sem er nú orðin hluti meginlandsins. Samkvæmt fornum fræðum er Budva einn elsti bærinn við Adríahafið og umhverfið er einstakt. Bærinn fór mjög illa í jarðskjálfta árið 1979 en endurreisn hefur tekist með ágætum. Eftir gönguna verður frjáls tími það sem eftir er dags til að njóta náttúrufegurðar staðarins og þess sem bærinn og hótelið hafa upp á að bjóða.

Á döfinni er spennandi dagur. Að loknum morgunverði er stefnan tekin á Kotorflóann og ekið til þorpsins Perast þaðan sem farið verður í siglingu yfir á heillandi litla eyju sem kallast María á kletti. Síðan siglum við aftur til Perast og dáumst að landslaginu á leiðinni til Kotor borgar. Elsti hluti Kotor er á heimsminjaskrá UNESCO en borgin er dulúðleg og töfrandi með gömlum virkisveggjum sem við upplifum á rölti um borgina. Eftir það er upplagt að fá sér hádegishressingu og njóta þess að vera á þessum fagra stað.

Nú er gott að eiga frjálsan dag og njóta þess að taka því rólega. Hægt er að fara í göngu með ströndinni, taka sér sundsprett í sjónum eða fara á baðströndina sem er stutt frá okkur. Einnig er gaman að rölta um gamla bæinn og líta inn á kaupmenn bæjarins.

Sérhver Svartfellingur myndi segja: „Ef þú hefur ekki komið til Cetinje þá hefur þú ekki komið til Svartfjallalands“ og því verður þessi borg, ein mikilvægasta borg landsins, vandlega skoðuð. Glæsilegar byggingar skreyta hana, þar á meðal klaustrið þar sem biskupar Svartfjallalands réðu ríkjum öldum saman. Vlaška heitir dómkirkjan, ein elsta bygging borgarinnar, og við skoðum að sjálfsögðu hrífandi konungshöllina Nicola. Cetinje var höfuðborg landsins í tæp 400 ár. Eftir góða stund þar verður ekið til höfuðborgarinnar Podgorica, sem eitt sinn var kölluð Titograd, en þar fer öll stjórnsýsla landsins fram. Við skoðum þar stærsta vínkjallara landsins, Sipcanik, sem nær yfir rúma tvo hektara. Þarna var áður aðalherflugvöllur landsins sem meðal annars var notaður af NATO og þá voru vínkjallararnir flugvéla- og vopnageymslur. Það er mikil upplifun að koma hingað en um 11 milljónir plöntur sjá framleiðslunni fyrir vínþrúgum. Okkur verður boðið í mjög glæsilega vínsmökkun.

Skadar vatn er eitt af náttúruundrum landsins. Þetta stöðuvatn hefur alla tíð verið utan alfaraleiðar en það er á landamærum Svartfjallalands og Albaníu. Hér er hrífandi landslag sem við njótum á siglingu um vatnið frá litla fiskiþorpinu Virpazar. Vatnið er sérstakt m.a. vegna þess að á botni þess eru um 30 uppsprettulindir, sem heimamenn kalla augu. Dýpsta lindin er á 60 m dýpi og úr henni streymir hreint og kristaltært vatn af kalksteinsbotninum. Vatnið er heimasvæði óteljandi dýrategunda, m.a. á þriðja hundrað fuglategunda, og á vatnsyfirborðinu vaxa vatnaliljur. Við einkaströndina Pjesacac er beðið eftir okkur með grillaðan fisk á skemmtilegum veitingastað við vatnið. Að hádegisverði loknum gefst tækifæri til að fara í gönguferð eða taka sundsprett í vatninu en síðan er siglt til baka til Virpazar þar sem rútan bíður okkar. Upplagt að taka með sundföt og baðhandklæði.

Nú eigum við dag í rólegheitum og njótum þess að vera á þessum fagra stað. Tilvalið að fara á ströndina eða nota þessa frábæru aðstöðu við hótelið.

Við hefjum daginn á því að ganga stuttan spöl frá hótelinu að höfninni í Budva. Siglum þaðan með þessari einstöku strönd og njótum dásamlegs umhverfis. Förum fram hjá St. Nicola eyjunni, litla sjávarþorpinu Przno, sjáum drottninga- og kóngaströndina og heillandi hóteleyjuna Sveti Stefan. Við snæðum hádegisverð á afar fallegum stað í landi sem er með einkaströnd og gefst tækifæri þar til að taka sundsprett eða njóta þessar náttúrufegurðar sem leikur um okkur. Eftir það líðum við áfram í draumalandslagi og góðum félagsskap til Budva. Upplagt að taka með sundföt og baðhandklæði.

Í dag er frjáls dagur til að njóta náttúrufegurðarinnar sem umleikur okkur. Nú er tími til að slaka á, líta inn til kaupmanna bæjarins, fara á ströndina eða slappa af á hótelinu.

Í dag förum við loks til sögufrægu borgarinnar Split sem telst með merkustu borgum landsins. Þar má finna Diokletian höllina og enn fremur glæsilegar byggingar og minjar frá tímum Rómverja en elsti hluti borgarinnar hefur verið á heimsminjaskrá UNESCO síðan árið
1979. Borgin er því eins og lifandi safn, sem iðar af mannlífi. Við förum í stutta skoðunarferð um borgina en eftir það verður gefin frjáls tími fram að því að við röltum saman að ferjustað þar sem skipið bíður okkar um kvöldið. Frá Split verður siglt yfir til Ancona. Gisting með morgun- og kvöldverði um borð í skipinu.

Eftir morgunverð á skipinu komum við til Ancona kl. 7:00. Nú verður stefnan tekin á hina líflegu og sögufrægu borg Bologna í Norður-Ítalíu þar sem gist verður í eina nótt. Langa yfirbyggða göngugatan er skemmtileg, fallegar byggingar frá miðöldum og endurreisnartímanum prýða borgina sem og skökku turnarnir sem eru tákn borgarinnar. Hér verður gefinn tími til að kanna líf bæjarbúa, líta í verslanir borgarinnar og fá sér hressingu áður en ekið verður á hótel.

Öll ævintýri taka enda og nú er komið að heimferð eftir yndislega daga. Að morgunverði loknum er ekið til heimsborgarinnar Mílanó. Brottför þaðan kl. 15:10 og lent í Keflavík kl. 17:25 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.