Suður-Frakkland & Spánn

Við hefjum daginn á skemmtilegri gönguferð um Tossa de Mar og förum upp í elsta hluta bæjarins, klettabæinn Vila Vella sem er umkringdur borgarmúrum og turnum frá 14. öld. Þaðan er stórfallegt útsýni yfir gjörvalla klettaströnd Tossa. Að koma inn í Vila Vella er eins og að ferðast aftur í tímann en enn er búið í nokkrum gömlu húsanna innan virkisveggjanna. Að gönguferð lokinni gefst hverjum og einum frjáls tími til að kanna bæinn á eigin vegum og svo er einnig upplagt er að nota frábæra aðstöðu hótelsins.

Barcelona, höfuðborg Katalóníu, er með fegurstu borgum álfunnar. Hún er þekkt fyrir byggingar arkitektsins Gaudí en þær skreyta borgina hvert sem litið er. Borgin er mjög gömul og saga hennar merkileg en fegurð hennar og gestrisni íbúanna gera dvölina einstaka. Af merkum byggingum eftir Gaudí má nefna kirkjuna La Sagrada Familia, húsin Casa Battló og Casa Milá og garðinn Güell en þessi verk Gaudí eru öll komin á heimsminjaskrá UNESCO. Gotneska hverfinu má ekki gleyma og kirkjunni við hafið sem er dásamleg og margir þekkja úr bók Ildefonso Falcones. Einnig verður tími til að kanna líf bæjarbúa og líta inn á líflega kaupmenn borgarinnar.

Að loknum morgunverði verður farið í siglingu til Lloret de Mar, eins vinsælasta ferðamannabæjarins á ströndinni. Þetta er mjög snotur bær sem gaman er að rölta um. Þar er að finna fallegu kirkjuna Sant Roma frá 16. öld. Einnig er hægt að fara í góða göngu eftir ströndinni að miðaldavirkinu Sant Joan frá 11. öld. Lloret de Mar er einn af verslunarbæjum Costa Brava strandarinnar svo hægt er að líta inn á kaupmenn bæjarins. Eftir góðan tíma í bænum er siglt til baka.

Dagsferð í Montserrat klaustrið sem var stofnað á 9. öld og stendur í 720 m hæð í katalónsku hæðunum. Útsýnið frá klaustrinu er stórbrotið og fjallasýnin ólýsanleg. Um hádegisbil fáum við að hlýða á nokkur lög hjá hinum fræga drengjakór klaustursins, Escolania de Montserrat. Í kórnum eru 50 drengir á aldrinum 9-14 ára sem syngja þar daglega.

Frjáls dagur til að hvíla sig, njóta lífsins, láta dekra við sig á heilsulind hótelsins eða kanna umhverfið í rólegheitum. Í bænum kennir margra grasa menningar- og mannlífs, sem gaman er að kynna sér í rólegheitunum.

Skemmtilegur dagur í bænum San Feliu de Guixols sem stendur við snotra vík á Sant Pol sandströndinni. Bær þessi er einn sá áhugaverðasti á Costa Brava ströndinni. Þar er skemmtilegur útimarkaður fram yfir hádegi en mikið líf og fjör einkennir bæinn. Eftir ljúfan tíma þar og hádegishressingu verður ekin töfrandi leið til baka eftir Costa Brava þar sem við upplifum ótrúlega náttúrufegurð við klettaströndina sem er á milli Sa Felíu og Tossa de Mar.

Eftir yndislega daga á Spáni, kveðjum við Tossa de Mar og ökum dásamlega leið yfir til Annecy. Líkt og í Feneyjum einkenna falleg síki þessa glæsilega borg sem gefa henni einstakan blæ. Annecy er ein elsta borg frönsku Alpanna. Borgin er eins og gimsteinn í kórónu fjallanna sem umlykja hana. Hér gistum við í tvær nætur á góðu hóteli í miðbænum en þaðan er örstutt í verslanir og að vatninu. Á leiðinni þangað verður komið til sögufrægu borgarinnar Avignon í Provence héraði í Frakklandi, sem er rómuð fyrir fegurð og þar gefum við okkur tíma til að skoða okkur um og fá okkur hressingu.

Að loknum morgunverði höldum við í gönguferð um Annecy sem er ein elsta borg frönsku Alpanna. Borgin er eins og gimsteinn í kórónu fjallanna sem umlykja hana. Staðsetning hennar við vatnið og síkin sem renna inn í borgina gera hana að undursamlegum stað. Yfir bænum gnæfir aldagömul höll og eru mörg húsanna í borginni frá 16. - 18. öld. Eftir skoðunarferðina gefst frjáls tími til að kanna borgina betur á eigin vegum. Áhugasamir geta farið í heillandi siglingu á Annecy vatni, þar sem náttúrufegurðin lætur engan ósnortinn.

Eftir glæsilega ferð verður ekið til Zürich. Brottför þaðan kl. 14:05 og lending í Keflavík kl. 15:55 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.