Íslendingaslóðir í Vesturheimi

Brottför af hóteli að loknum morgunverði og byrjað á að skoða Icelandic State Park, byggðasafn norðarlega í íslensku byggðinni. Þaðan er ekið að landamærum Bandaríkjanna og Kanada. Á leiðinni er komið við í smábænum Cavalier þar sem tækifæri gefst til að fá sér eitthvað snarl. Síðan er farið yfir landamærin og stefnan tekin á Gimli þar sem gist verður í þrjár nætur.

Þessum degi er varið við hátíðarhöldin á Gimli í Nýja-Íslandi. Fyrsta þjóðminningarhátíð Íslendinga í Norður-Ameríku var haldin í Milwaukee 2. ágúst 1874. Tilefni hennar var ný stjórnarskrá sem afhent var Íslendingum á Þingvöllum þennan sama dag. Íslendingar í Winnipeg urðu fyrstir til að gera hátíðina að árlegum viðburði og var hún haldin í almenningsgörðum borgarinnar til ársins 1932. Þá var ákveðið að flytja hana til Gimli og þar hefur hún verið síðan. Enginn íslenskur viðburður í Norður-Ameríku er eins vel þekktur og Íslendingadagurinn á Gimli. Árlega sækja hátíðina þúsundir gesta alls staðar að úr álfunni. Hvernig minnast afkomendur vesturfaranna upprunans á Íslandi? Það er gaman að fylgjast með heimamönnum, taka þá tali og heyra með þeirra orðum hvaða hug þeir bera til Íslands og smakka hjá þeim vínartertu. Tryggðin við land og þjóð er ótrúleg.

Skoðunarferð um þessa merkilegu nýlendu Íslendinga í Vesturheimi. Frá Winnipeg er ekið á landtökustaðinn á Víðirnesi, suður af Gimli. Þaðan er ekið um Árnes, Hnausa til Árborgar, en bærinn sá stendur við Íslendingafljót. Þar er skemmtilegt byggðasafn sem minnir um margt á Árbæjarsafn. Allmargar byggingar sem fluttar hafa verið úr sveitunum í kring mynda lítið þorp sem gaman er að skoða með íslenskumælandi safnvörðum. Þar verður snæddur hádegisverður en svo heldur ferðin áfram. Farið verður til Riverton, sem einnig stendur við Íslendingafljót. Hér eru áhugaverðir minnisvarðar sem allir tengjast íslensku landnámi. Loks er haldið til Mikleyjar sem nú kallast Hecla Provincial Park. Hér settust Íslendingar að árið 1876 og þeim sem það gerðu vegnaði vel. Þeir komust upp á lag með að veiða í vatninu og gerði það gæfumuninn.

Við hefjum daginn á því að aka til Winnipeg þar sem gist verður næstu nótt. Við komuna þangað verður haldið í skoðunarferð um Winnipeg. Eftir það gefst tækifæri til að kynnast borginni betur eða eyða stund með vinum og vandamönnum. Upplagt að skoða Manitoba Museum, þar sem saga sléttunnar er sögð á einkar áhugaverðan hátt, eða fara á nýja mannréttindasafnið. Rölta að svo búnu niður í The Forks sem er mikið svæði við ármót Assiniboine og Rauðár. Hér stunduðu frumbyggjar viðskipti öldum saman og hér myndaðist fyrsti byggðarkjarni hvítra á sléttunni. Á svæðinu eru söfn, ótal smáverslanir og fjöldi veitingastaða.

Í dag verður Kanada kvatt og ekið til Fargo í Norður-Dakóta í Bandaríkjunum. Við ökum í suður og komum við í fríhöfn við landamærin. Hér verður dvalið í stutta stund, tækifæri gefst til að skipta kanadískum peningum í bandaríska og kannski kaupa einhvern minjagrip áður en farið verður yfir landamærin. Komum til Grand Forks þar sem snæddur verður hádegismatur. Ökum suður sléttuna til Fargo og gistum eina nótt.

Við kveðjum Norður-Dakóta þennan morgun og ökum inn í Minnesota. Stefnan tekin á Minneapolis en áður en þangað er komið er áð á nokkrum stöðum. Á einum slíkum í Alexandria er farið á matstað og þar snæddur hádegisverður. Að honum loknum er ekið til Minneapolis þar sem gist verður eina nótt.

Flug heim til Íslands er um kvöldið þannig að ýmislegt má gera þennan lokadag ferðar. Rýma þarf herbergi kl. 11:00 en þá er hægt að koma töskum fyrir í læstum sal. Hótelið er beint á móti Mall of America. Skutlur hótels byrja að selflytja hópinn á flugvöll kl. 16:00. Flug til Íslands er kl. 19:25.

Flugvél Icelandair frá Minneapolis lendir um kl. 6:35 að morgni í Keflavík.

Fararstjóri getur fært dagskrárliði á milli daga eftir þörfum þegar komið er á staðinn.