Tallinn maraþon

Skemmtileg hlaupahátíð með öllum vegalengdum í heillandi borg. Tallinn maraþonið stimplaði sig inn sem stærsti íþróttaviðburður Eistlands árið 2018 þar sem 23.940 hlauparar tóku þátt í hlaupahátíðinni. Á síðasta ári tóku 5000 erlendir hlauparar frá 67 þjóðlöndum þátt. Tallinn í Eistlandi er einstaklega heillandi borg sem lætur engan sem þangað kemur ósnortinn. Borgin er ein best varðveitta miðaldaborg í Norður-Evrópu þar sem söfn, dómkirkjur, borgarhlið, borgarveggir, klaustur og hallir segja sína sögu frá fyrri öldum. En þrátt fyrir ríkan miðaldablæ býður borgin upp á líflega miðborgarstemningu með nýtískulegum verslunarhúsum, forvitnilegum litlum verslunum í gamla bænum og úrval af börum og veitingahúsum.

Flogið verður til Helsinki og farið í stutta skoðunarferð um borgina áður en tekin er ferja yfir til Tallinn þar sem gist verður miðsvæðis í borginni í 4 nætur. Boðið er upp á 10 km hlaup á laugardeginum 7. september en maraþon í fullri lengd og hálfmaraþon á sunnudeginum 8. september. Á sunnudagskvöldið fer hópurinn saman út að borða og fagnar sigrum helgarinnar.

Verð á mann í tvíbýli 134.900 kr.

Aukagjald fyrir einbýli 32.300 kr.

Með bókun í ferðina öðlast farþegar rétt á öruggri skráningu í Tallin maraþonið, athugið að þátttökugjaldið er ekki innifalið pakkanum.


Innifalið

  • 5 daga ferð.
  • Flug með Icelandair og flugvallarskattar.
  • Ferjuferð fram og til baka milli Helsinki og Tallinn
  • Gisting í 2ja manna herbergi með baði.
  • Morgunverður.
  • Kvöldverður að loknu hlaupi.
  • Ferðir til og frá flugvelli að höfn og skoðunarferð um Helsinki.
  • Ferðir til og frá höfn í Tallinn.
  • Íslensk fararstjórn.
  • Undirbúningsfundur með farastjóra.

Ekki innifalið

  • Þátttökugjöld í hlaupið.
  • Hádegis- og kvöldverðir ( nema kvöldverður að loknu hlaupi ).
  • Forfalla- og ferðatryggingar.

Þátttökugjald í hlaupið

Maraþon 10.400 kr.
Hálfmaraþon 7.600 kr.
10 km hlaup 4.300 kr.

Með bókun í ferðina öðlast farþegar rétt á öruggri skráningu í maraþonið í Tallinn, athugið að þátttökugjaldið er ekki innifalið í pakkanum. 

 
Innifalið í þátttökugjaldi

  • Tímaflaga fyrir hlaupið.
  • Hlaupanúmer með nafni þínu og þjóðfána (42,2 og 21,1 km).
  • Rafrænt viðurkenningarskjal.
  • Verðlaunapeningur.
  • Hlaupabolur fyrir þá sem hlaupa maraþon (ekki hálft maraþon og 10 km).
  • Þjónusta við drykkjarstöðvar.
  • Farangursgeymsla og þvottaþjónusta.
  • Skyndihjálp á leiðinni ef þörf er á.
  • Akstur að marki fyrir þá sem ekki hlaupa alla leið.

Flogið til Helsinki - Siglt til Tallinn

Flogið verður með Icelandair til Helsinki þann 6. september. Brottför frá Keflavík kl. 7:30 en mæting í Leifstöð í síðasta lagi 2 klst. fyrir brottför. Lending í Helsinki kl. 13:50 að staðartíma. Eftir stutta skoðunarferð um miðborg Helsinki tekur við tveggja tíma sigling yfir til Tallinn, áætlaður komutími þar um kl. 21:30. Á heimferðardegi þann 10. september er einnig byrjað á ferjuferð til baka kl. 10:30, komið til Helsinki um 12:30 en flug heim kl. 15:35 og lent í Keflavík kl. 16:00 að staðartíma.

Kort af ferðinni

FerðalýsingPrenta ferðalýsingu

Maraþon 8. september 2019

Tallinn maraþonið er fjölmennasti hlaupaviðburðurinn sem haldin er á Eystrasaltslöndunum með 24 þúsund þátttakendum. Boðið er upp á 10 km hlaup á laugardaginn 7. september en maraþon í fullri lengd og hálfmaraþon á sunnudeginum 8. september. Tallinn hlaupahátíðin var fyrst haldin árið 2000 og árið 2010 var í fyrsta sinn hægt að hlaupa heilt maraþon. Á síðasta ári tóku 5000 erlendir hlauparar frá 67 þjóðlöndum þátt.

Maraþonleiðin er eftir alþjóðlegum stöðlum og er tiltölulega flöt og auðfarin. Meðalhiti á þessum árstíma er 10-15°C. Hlaupið hefst í Rotermann Quarter í miðbæ Tallinn, milli gamla miðbæjarins og hafnarinnar. Þetta svæði var áður verksmiðjuhverfi í niðurníðslu en einkennist nú af nútíma arkitektúr. Hverfið er gott dæmi um þær breytingar sem hafa átt sér stað á borginni síðasta áratuginn. Hlaupið verður í gegnum stóran hluta borgarinnar og meðfram sjónum en marga áhugaverða staði mun bera fyrir augu á þeirri leið. Þar má t.d. nefna borgarmúrana, ráðhúsið, Estonian Open Air byggðasafnið sem má líkja við Árbæjarsafnið, litríku tréhúsin við Kalamaja, Blatic station markaðinn, Kalamaja garðinn, Partarei virkið, rússnesku menningarmiðstöðina og borgarhliðið Viru.

Tallinn

Þessi fallega og rómantíska borg er um 800 ára gömul, með þröngum steinlögðum götum og byggingum allt frá 11. öld. Tallinn er ein best varðveitta miðaldaborg í Norður-Evrópu og er á heimslista UNESCO en þrátt fyrir ríkan miðaldablæ hennar er hún einnig með alþjóðlegt yfirbragð, enda hefur borgin tekið miklum breytingum á síðustu árum. Þessi 400.000 manna borg hefur upp á margt að bjóða. Hér má t.d. skoða 16. aldar virkisvegginn sem umlykur gamla bæinn, hina tignarlegu kirkju og turn heilags Ólafs og Kadriorg höllina með sínum stórfenglega blómagarði sem Pétur mikli lét útbúa fyrir eiginkonu sína Katrínu árið 1718. Fara má upp á Dómkirkjuhæðina (Toompea) sem skartar mörgum af fallegustu byggingum borgarinnar en þaðan er einnig langbesta útsýnið yfir borgina og langt út á haf. Einnig er hægt að nýta tímann til að kíkja á veitinga- og kaffihús, líta inn til kaupmanna eða einfaldlega slaka á og njóta þess sem fyrir augu ber. Fyrir þá sem hafa áhuga á að kíkja á söfn þá er ómissandi að skoða KUMA listasafnið.

Myndir úr ferðinni

Fararstjórn

Sævar Skaptason

Sævar Skaptason hefur alla tíð verið mikið fyrir útivist. Hann byrjaði að starfa við ferðaþjónustu árið 1981 og var þá skálavörður í skála Ferðafélagsins í Langadal, Þórsmörk, til ársins 1986. Yfir sumartímann árin 1989 og 1990 starfaði hann einnig sem skálavörður í Landmannalaugum. Frá árinu 1998 hefur Sævar verið framkvæmdastjóri Hey Iceland - Bændaferða (áður ferðaþjónusta bænda).

Hótel

Hotel Park Inn by Radison Tallin

Gist verður á 4* hótelinu Park Inn by Radison nálægt elsta hluta miðbæjarins og 1 km frá höfninni. Fjöldi verslana og veitingastaða er í næsta nágrenni. Hótelið er mjög nýtískulegt og innréttað í sterkum litum. Öll herbergin eru með baði/sturtu, hárþurrku, míníbar og sjónvarpi með gervihnattastöðvum. Á hótelinu er gufubað og nuddpottur, sem þarf að bóka aðgang að fyrirfram í móttökunni. Aukagjald er tekið fyrir.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir