Róm & Amalfíströndin

4. – 16. júní 2018 (13 dagar)

Róm, Sorrento, Amalfíströndin og eyjan Caprí eru sannkallaðar draumaperlur Ítalíu, en kyngimögnuð fegurð þessara staða umvefur okkur í ferðinni.

Hún hefst á flugi til Mílanó, en þaðan heimsækjum við hina fögru Rómaborg, sem var fyrsta borg heimsins til að ná einni milljón íbúa. Í borginni skoðum við Forum Romanum, Kólosseum, Panþeon, Vatíkanið og Péturskirkjuna. Næst heimsækjum við einn fallegasta flóa landsins, hinn dásamlega Napólíflóa og Sorrento, eftirsóttasta ferðamannabæ hans, þar sem við njótum ljúfra daga í slökun og notalegheitum. Boðið verður m.a. upp á ævintýralega siglingu til Caprí, sæbrattrar klettaeyju þar sem siglt verður í Bláa hellinn og farið með stólalyftu upp á hæsta fjall eyjunnar, Monte Solaro. Við siglum bæði og ökum með Amalfíströndinni, sem er ein fallegasta strönd Ítalíu og komum til Pompei, sem geymir frægustu fornminjar veraldar. Ferðin endar í bænum Marina di Massa í Toskana þar sem boðið verður upp á siglingu eftir Cinque Terra ströndinni með viðkomu í Porto Venere, Monterosso og Riomaggiore.

Verð á mann í tvíbýli 329.900 kr.

Aukagjald fyrir einbýli 63.600 kr.

 
Innifalið

  • 13 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Ferja til og frá Caprí.
  • Sigling & ferð með smárútum meðfram Amalfíströndinni.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Vínsmökkun.
  • Hádegisverðir.

Valfrjálst

  • Aðgangur að fornminjum í Pompei ca. € 13.
  • Blái hellirinn ca. € 28
  • Stólalyfta upp á Monte Solaro fjallið á Capri ca. € 11.
  • Sigling Cinque Terre ca € 24.

Kort af ferðinni

Ferðalýsing

Prenta ferðalýsingu

4. júní | Flug til Mílanó

Brottför frá Keflavík kl. 13:50, mæting í Leifsstöð í síðasta lagi 2 klst. fyrir brottför. Lending í Mílanó kl. 19:40 að staðartíma. Gist verður í nágrenni flugvallarins fyrstu nóttina.

5. júní | Heimsborgin Róm

Leið okkar liggur til hinnar einstöku Rómaborgar. Hún var byggð á sjö hæðum og var á blómaskeiði sínu fyrsta borg heims til að ná einni milljón íbúa. Gist verður í 3 nætur í þessari sögufrægu borg.

6. júní | Skoðunarferð um Rómarborg

Á dagskránni í dag er fróðleg skoðunarferð um hina fornu Rómaborg og munum við staldra við á helstu stöðum borgarinnar. Meðal þess sem skoðað verður er Piazza Venezia, Kapítólhæð, Forum Romanum, Palatínhæð og munum við koma að Kólosseum, Treví brunninum og Spænsku tröppunum. Einnig verður frjáls tími til að kynnast borginni og mannlífinu eins og hverjum og einum lystir. 

Opna allt

7. júní | Péturskirkjan og frjáls dagur í Róm

Eftir morgunverð verður haldið að Vatíkaninu og Péturskirkjunni, meistaraverkum síns tíma. Þeir sem vilja geta farið upp í kúpul kirkjunnar. Frjáls tími verður eftir hádegi og verður þá hægt að skoða Sixtínsku kapelluna og safn Vatíkansins á eigin vegum. Í boði verður að aka inn í miðbæinn fyrir þá sem vilja skoða sig betur um í borginni og þar er upplagt að líta í verslanir, fá sér ítalskan hádegisverð á einhverjum veitingastaðnum og njóta þess sem borgin hefur upp á að bjóða. 

8. júní | Sorrento

Nú kveðjum við Róm og ökum til Sorrento við Napólíflóa, eins fallegasta flóa landsins. Sorrento er hrífandi bær í bröttum hlíðum og vinsæll hjá ferðamönnum. Í hlíðum bæjarins vaxa ólífu- appelsínu- og sítrónutré, en þess má geta að Limoncello líkjörinn frægi kemur frá þessu svæði. Gist verður 6 nætur í Sorrento á góðu hóteli. 

9. júní | Dagur í Sorrento við Napólíflóa

Dagurinn er tilvalinn í afslöppun, en einnig er upplagt að kanna dásamlegt umhverfið í Sorrento, sem er einn eftirsóttasti ferðamannabær við Amalfíströndina. Í bænum er fjöldinn allur af einstaklega heillandi þröngum, gömlum götum og afskaplega fögrum kirkjum. 

10. júní | Sigling til Caprí

Í dag höldum við í siglingu til Caprí, perlu Napólíflóans. Við skoðum eyjuna, siglum að bláa hellinum Grotta Azzurra og förum upp til Anacapri þar sem við njótum stórfenglegs útsýnis. Áhugasömum gefst einnig tækifæri til að fara með stólalyftu upp á fjallið Monte Solaro. Jafnframt verður hægt að fá sér hressingu og líta á kniplinga og alls kyns handunnar vefnaðarvörur, dúka, klæði og fatnað.

11. júní | Sigling & rúta með Amalfíströndinni

Haldið verður í töfrandi dagsferð um Amalfíströndina þar sem fegurðin er svo sannarlega einstök. Við hefjum ferðina á siglingu meðfram ströndinni til bæjarins Amalfí, perlu strandarinnar, þar sem við stígum á land og skoðum okkur um. Á rölti um bæinn sjáum við glæsilega dómkirkju frá 10. öld, hrífandi veitinga- og kaffihús og litlar verslanir sem gaman er að kíkja inn í. Því næst verður ekið til bæjarins Ravello sem stendur í um 350 m hæð, en þaðan gefur að líta ægifagurt útsýni yfir alla strandlengjuna, eins langt og augað eygir. Þar er einnig að finna hina stórfallegu höll Rufoli, þar sem tónskáldið Richard Wagner var gestkomandi um tíma og fékk þar innblástur að óperu sinni Parsifal. Ekið verður með smárútum til baka eftir Amalfíströndinni milli smábæja sem hanga utan í klettabrúninni. Hvarvetna gefur að líta dásamlegt landslag á þessari fallegustu strandlengju Ítalíu. Við mælum eindregið með því að gestir gæði sér á grilluðum fiski í hádeginu, sem er einn helsti sérréttur íbúa svæðisins.

12. júní | Fornminjar í Pompei

Ekið verður til Pompei þar sem skoðaðar verða einhverjar frægustu fornminjar veraldar. Rústir gömlu Pompei eru eitt stórkostlegasta dæmið um fornleifauppgröft heillar byggðar og mun heimamaður leiða okkur í allan sannleik um söguna. Áður en ekið verður aftur á hótel er upplagt að fá sér örlitla hádegishressingu. Þegar komið er á hótelið gefst góður tími til að nýta aðstöðu þess, eða jafnvel skoða sig betur um í bænum.

13. júní | Rólegheit & slökun

Þennan dag gefst heill dagur til þess að slaka á og njóta þess að vera á þessum yndislega stað.  Sorrento er líflegur og skemmtilegur bær, þar er margt að skoða og tilvalið að kíkja í verslanir eða á kaffi- eða veitingahús. Einnig er hægt að slaka á við sundlaug hótelsins eða ganga niður að strandlengjunni.

14. júní | Marina di Massa

Þá kveðjum við þennan góða stað eftir notalega daga. Ekin verður heillandi leið í gegnum Toskana hérað til Marina di Massa þar sem gist verður í 2 nætur. Á hótelinu er hótelgarður með útisundlaug. Hótelið er staðsett við baðströndina. Í bænum kennir einnig margra grasa menningar og mannlífs, sem gaman er að kynna sér í rólegheitunum.

15. júní | Marina di Massa eða sigling úti fyrir Cinque Terre

Frjáls dagur til að slaka á í Marina di Massa sem er yndislegur strandbær við Versillia ströndina. Áhugasamir geta haldið í ævintýralega siglingi úti fyrir Cinque Terre ströndinni, einu stórfenglegasta svæði ítölsku rivíerunnar. Lagt er upp frá Marina di Massa og siglt til bæjanna Porto Venere, Riomaggiore, hjá Manarola og Corniglia til Vernazza og Monterosso. 

16. júní | Mílanó & heimferð

Eftir glæsilega ferð er komin tími til að kveðja. Við hefjum daginn á morgunverði en svo verður ekið til heimsborgarinnar Mílanó. Þar verður farið í stutta göngu með farastjóranum og síðar gefst tími til að fá sér létta hressingu, líta inn til kaupmanna og skoða sig betur um á eigin vegum. Upplagt er að fá sér kvöldverð áður en ekið verður út á flugvöll. Brottför þaðan kl. 20:40 og lent í Keflavík kl. 22:55 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir