Írland - eyjan græna

Eire, eyjan græna Írland, býður upp á svo ótal margt sem gleður, fallegt landslag, áhugaverða sögu, söngva, sagnir og skemmtilegt kráarlíf.

Flogið verður til Dublin og þaðan ekið vestur á bóginn. Á leiðinni til Galway verður komið við í Clonmacnois klaustrinu við ána Shannon þar sem varðveittar eru merkar minjar frá frumkristni. Farið verður um Connemara skagann en þaðan koma steinarnir sem prýða marga írska skartgripi og nytjahluti. Við Kylemore stendur frægur klausturskóli í fögru umhverfi. Ekið verður um Burren svæðið og úti við ströndu Atlantshafs skoðum við Moher klettana ásamt því að taka ferju yfir Shannon fljótið frá Killmer til Torbert og Tralee. Farið verður um hrjóstrugan Dingle skaga þar sem finna má merkar og fjölbreyttar fornleifar. Skaginn komst í fréttir á Íslandi árið 1982 þegar flutningaskipið Rangá fórst þar við Dunmorehöfða. Kerry hringurinn margfrægi verður ekinn og á vegi okkar verða litskrúðug sjávarþorp, fornar byggingar og í Waterville komumst við að raun um hvers vegna Charlie Chaplin dvaldi þar mörg sumur. Við skoðum okkur um við Killarney vötnin, ökum að hafnarbænum Cobh sem verður að eilífu tengdur nafni Titanic, þaðan sem skipið hélt í sína hinstu för og komum að lokum við í borginni Cork. Ferðinni lýkur með tveggja nátta dvöl í Dublin þar sem við munum skoða okkur um áður en haldið er heim á leið.

Verð á mann í tvíbýli 214.400 kr.

Aukagjald fyrir einbýli 41.100 kr.

 
Innifalið

  • 8 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði
  • Ferja frá Killimer til Tarbert.
  • Aðgangur í Moherkletta.
  • Allar skoðunarferðir samkvæmt ferðalýsingu.
  • Morgunverður og kvöldverður allan tímann á hótelum.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Siglingar aðrar en þær sem nefndar eru sérstaklega undir innifalið.
  • Hádegisverðir.
  • Þjórfé.

Valfrjálst

  • Clonmacnoise klaustur ca € 6.
  • Kylemore klaustur ca € 8.
  • Jameson Whiskey ca € 18.
  • Titanic Cobh ca € 10.

Kort af ferðinni

FerðalýsingPrenta ferðalýsingu

26. ágúst | Flug til Dublin & ekið til Galway

Brottför frá Keflavík kl. 7:30 með Icelandair. Mæting í Leifsstöð a.m.k. 2,5 klst. fyrir brottför. Lent á Dublin flugvelli kl. 10:55 að staðartíma. Þaðan verður ekið þvert yfir Írland, um blómlegar sveitir og bæi. Á leiðinni verður litið við í klaustrinu Clonmacnoise sem stendur á einstaklega fallegum stað við bakka árinnar Shannon en þar eru merkar minjar frá frumkristni. Við höldum svo beinustu leið vestur í Galway sýslu út við vesturströndina og gistum 2 nætur í þorpinu Oranmore nálægt Galway.

27. ágúst | Connemara skaginn

Í dag verður farinn hringur norður um Connemara skagann en þaðan koma Connemara steinarnir frægu sem notaðir eru í skartgripi og ýmsa nytjahluti. Svæðið einkennist af fjölda vatna og mýra, umkringt fjöllum. Ekið verður með fram Lough Corrib vatni, gegnum Oughterard þorpið og áfram til Kylemore þar sem hinn frægi klausturskóli er í afar fallegu umhverfi. Eftir það er farið til Clifden, höfuðstaðar Connemara svæðisins, þar sem Ej Kings kráin er vel þekkt kennileiti á vesturströndinni.

28. ágúst | Moherklettarnir & ferjusigling til Tralee

Eftir morgunverð leggjum við af stað til Tralee þar sem gist verður næstu 2 nætur. Á leiðinni verður ekið í gegnum Burren landsvæðið sem einkennist af sprungnum grjóthellum sem eru mjög sérstakt gróður- og jarðfræðifyrirbæri. Úti við hafið skoðum við Moherklettana, stórbrotið bjarg sem er þverhnípt strandlengja, 200 metra há og 8 kílómetra löng. Bjargið er ein af perlum Írlands og þykir stórkostleg sýn en á góðum degi er útsýni til Aran eyjanna, sem peysurnar frægu eru kenndar við. Áfram er haldið til Killimer þar sem Shannonferjan er tekin yfir til Tarbert. Við endum þennan dag á hóteli í Tralee, sem er stærsti bær Kerry sýslunnar. Í frægu lagi er sungið um Maríu - rósina frá Tralee eða Seljadalsrósina eins og hún var nefnd í íslenskri þýðingu.

Opna allt

29. ágúst | Dingle skaginn & Dunmore Head

Þennan dag er förinni heitið út á hrjóstrugan og vogskorinn Dingle skagann. Sumir fornleifafræðingar halda því fram að fáir staðir í Vestur-Evrópu geymi eins merkar og fjölbreyttar fornminjar og hér finnast. Á þessum slóðum er mannlíf talið hafa þrifist í nærri 6000 ár. Við njótum þess að aka hring um skagann, skoða okkur um og staldra við í Dingle bænum eða á útsýnisstöðum. Á Fahan svæðinu á vestanverðum skaganum finnast sérkennileg kúluhús úr steini sem flest eru talin vera frá 12. öld en eiga sér mun eldri fyrirmyndir. Við Dunmore höfða á vesturströndinni liggja í fjörunni leyfar flaksins af Rangá sem missti vélarafl í miklum stormi árið 1982. Skipið var leiguskip Hafskipa og var í jómfrúarferðinni til Íslands frá Spáni. Suðvestast á nesinu er magnað útsýni yfir á Blasket eyjarnar. Frá Dingle höldum við aftur til Tralee.

30. ágúst | Kerry hringurinn & sumardvalastaður Charlie Chaplin

Í dag förum við svonefndan Kerry hring sem að ýmsu leyti má líkja við gullna hringinn hér heima því hann þykir ómissandi á ferðalagi um vesturhluta Írlands. Á leiðinni verða á vegi okkar hugguleg þorp eins og t.d. Milltown, Killorglin, Cahersiveen, Sneem og Waterville, uppáhalds sumardvalarstaður Charlie Chaplin. Farið verður yfir fjöllin, litið yfir landið frá útsýnisstaðnum Ladies view og haldið niður að Killarney vötnunum og samnefndum bæ en svæðið er einn fjölsóttasti ferðamannastaður Írlands. Gist eina nótt í Midleton sem er í Cork sýslu.

31. ágúst | Cork, Jameson viskísafnið & Dublin

Í dag höldum við í hafnarbæinn Cobh en þaðan héldu margir Írar á vit betra lífs í Vesturheimi þegar þrengdi að heima. Þaðan fór Titanic í sína hinstu för. Við höldum svo aftur til Midleton þar sem við skoðum viskíverksmiðjuna þar sem Jameson er búið til ásamt fleiri viskítegundum. Saga viskígerðar á Írlandi er löng og merkileg og henni fáum við að kynnast í gömlu viskígerðinni sem nú er safn. Þeir sem vilja geta fengið að smakka á þessari heimsþekktu framleiðslu. Að því loknu höldum við til Cork sem er næst stærsta borg Írlands. Þar verður staldrað við í miðbænum og gefst þá kostur á að líta í verslanir, setjast á matsölustað eða krá. Síðdegis er stefnan tekin á Dublin þar sem gist verður í tvær nætur.

1. september | Skoðunarferð um Dublin

Eftir morgunverð höldum við í skemmtilega skoðunarferð um Dublin. Á vegi okkar verður fjöldi frægra bygginga, svo sem pósthúsið við O´Connell stræti þar sem páskauppreisnin hófst árið 1916, gamla þinghúsið, Trinity háskólinn og kirkja heilags Patreks. Einnig munum við fara í stærsta garð innan borgarmarka í Evrópu. Ferðinni lýkur í miðbænum þar sem þeir sem vilja geta skoðað sig um á eigin vegum, sest á bekk og notið sumarsins í St. Stephen´s Green garðinum eða rölt um miðbæinn og fylgst með götulistamönnunum. Þeir sem kjósa geta farið í Trinity háskólann og skoðað hið fræga guðspjallahandrit og þjóðargersemi Íra, Book of Kells, og um leið gamalt og mikilfenglegt bókasafn skólans, The Long Room.

2. september | Heimferðardagur

Það er komið að heimför. Brottför með Icelandair kl. 14:40 og lending í Keflavík kl. 16:00 að íslenskum tíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Jón Baldvin Halldórsson

Jón Baldvin Halldórsson er Svarfdælingur og lærði írskar bókmenntir í Trinity háskólanum í Dublin upp úr 1980 eftir að hafa numið íslensku og uppeldis- og kennslufræði við Háskóla Íslands.  Hann var jafnframt fréttaritari Útvarpsins á Írlandi og átti síðar langan starfsferil hjá Ríkisúvarpinu sem fréttamaður, bæði á svæðisútvarpinu á Akureyri og á Fréttastofu Útvarps í Reykjavík. Áður var hann blaðamaður á Vikunni og síðan á Dagblaðinu Vísi (DV) bæði sunnan heiða og norðan.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir