Draumasigling um Feneyjar

Á þessari glæsilegu siglingu um Feneyjar með fljótaskipinu MS Michelangelo gefst einstakt tækifæri til þess að kynnast Feneyjum, einni mest heillandi borg Evrópu. Borgin hefur löngum verið kölluð drottning Adríahafsins og ekki að ástæðulausu. Á rölti um eyjuna sjálfa verður á vegi okkar allt það sem gerir hana að einum eftirsóttasta ferðamannastað álfunnar. Við Canal Grande gefur að líta einar 200 glæsihallir, á Markúsartorginu stórkostlega stendur Markúsarkirkjan sem er eins og höllin úr ævintýrinu 1001 nótt. Á siglingu um lónið Veneto sjáum við þéttbyggðar eyjar, kirkjur, hallir og sjómannaskýli og kynnumst einnig forvitnilegu lífi eyjaskeggja. Siglt verður til eyjunnar Murano þar sem kristall hefur verið framleiddur frá örófi alda og yfir á eyjuna Burano sem fræg er fyrir blúndu-kniplingana sína og við skoðum á leið okkar þar um. Við upplifum ljúfa siglingu um Veneta lónið og förum í land í gamla fiskiþorpinu Chioggia þaðan sem við heimsækjum hina skemmtilegu háskólaborg Padua sem kemur töluvert á óvart. Þetta glæsilega ævintýri endar í fjallabænum Seefeld í Tíról í Austurríki. Komið verður til Garmisch-Partenkirchen og farið í kláfi upp á hæsta fjall Þýskalands, Zugspitze í 2.963 m hæð. 

Verð á mann í tvíbýli 288.800 kr.

Aukagjald fyrir einbýli 63.600 kr.

 
Innifalið

  • 9 daga ferð.
  • Flug með Icelandair og flugvallarskattar.
  • Hótelgisting í 2ja manna herbergi með baði á hótelum.
  • Morgun- og kvöldverður á hótelum.
  • Gisting á skipinu MS Michelangelo í 2ja manna klefa með sturtu / salerni í 4 nætur/5 daga.
  • Morgun-, hádegis- og kvöldverður á skipinu MS Michelangelo.
  • Móttökudrykkur á skipinu.
  • Allir drykkir á meðan á siglingu stendur, vín, bjór, sterkir drykkir, vatn, gos, kokteilar, kaffi og kökur.
  • Hátíðarkvöldverður á skipinu þann 11.maí.
  • Allar skoðunarferðir með rútu samkvæmt ferðalýsingu.
  • Íslensk farastjórn.

Ekki innifalið

  • Aðgangseyrir inn í söfn, hallir og kirkjur.
  • Aðrar siglingar og ferjur.
  • Vínsmökkun, hádegisverðir og þjórfé.

Valfrjálst

  • Kláfur upp á Zugspitze ca € 58.

Kort af ferðinni

FerðalýsingPrenta ferðalýsingu

7. maí | Flug til München & Brixen

Brottför frá Keflavík kl. 7:20 og mæting í Leifsstöð í síðasta lagi 2,5 klst. fyrir brottför. Lending í München kl. 13:05 að staðartíma. Þaðan er ekin falleg leið um Alpana suður á bóginn, gegnum Brennerskarð og niður til Brixen í Suður-Tíról á Ítalíu þar sem gist verður fyrstu nóttina.

8. maí | Riva del Garda & Feneyjar

Á leið okkar til Feneyja verður stoppað í bænum Riva del Garda við Gardavatn en þar gefum við okkur góðan tíma til að fá okkur hressingu og skoða okkur um. Við komuna til Feneyja bíður okkar fljótaskipið MS Michelangelo í stórhöfninni. Eftir að hafa verið boðin velkomin með drykk og áhöfnin hefur kynnt sig, eigum við notalega kvöldstund. Á meðan á kvöldverði stendur leysir skipið landfestar og siglir inn til Feneyja í nágrenni Markúsartorgsins. Feneyjar eru byggðar á 118 eyjum sem tengdar eru saman með 400 brúm. Undirstaða borgarinnar er á staurum sem reknir eru um 15-20 metra niður á botn síkjanna og standa svo þétt saman að þeir mynda fleka. Gist verður um borð í skipinu í 4 nætur. Eftir kvöldverð verður hægt að ganga inn á Markúsartorgið eða slaka á í setustofu skipsins við ljúfa tóna. 

9. maí | Skoðunarferð um Feneyjar & frjáls tími

Í dag höldum við í áhugaverða skoðunarferð um Feneyjar með heimamann í fararbroddi.  Auður og íburður blasir hvarvetna við í borginni. Við röltum um hellulagðar og hlykkjóttar götur, yfir fjöldamargar brýr og á vegi okkar verða stórfenglegar sögulegar byggingar eins og hertogahöllin sem er ein glæsilegasta bygging borgarinnar. Við skoðum líka Markúsartorgið þar sem Markúsarkirkjan stendur. Hún er ein merkilegasta kirkjubygging veraldar, byggð í austrænum stíl og minnir á höllina úr ævintýrinu 1001 nótt. Við komum að hinni frægu Rialto brú sem liggur yfir Grand Canal skurðinn en hann mun vera 3,8 km langur og 900 m breiður og við hann standa hvorki fleiri né færri en 200 hallir. Skoðunarferðin endar við MS Michelangelo þar sem okkar bíður hádegisverður. Eftir hádegi er frjáls tími til að kanna borgina á eigin vegum og gefst þá færi á að fara upp í borgarturninn eða upp á svalir Markúsarkirkjunnar. Áhugavert er að virða fyrir sér íburð hertogahallarinnar en höllin geymir málverkið Paradís eftir Tinderetto sem mun vera eitt stærsta málverk í heimi. Upplagt er að fá að fljóta með einhverjum af fjölmörgum gondólaræðurunum um þröng en heillandi síki borgarinnar en margir hverjir skemmta farþegum sínum einnig með söngnum O sole mio, sem hlýtur að vera einstök upplifun. Að loknum góðum tíma í borginni bíður okkar glæsilegur kvöldverður á fljótaskipinu.

Opna allt

10. maí | Sigling um Veneta lónið, eyjarnar Murano & Burano

Um morguninn verður lagt í siglingu um Veneta lónið sem liggur umhverfis Feneyjar og er skilið frá Adríahafinu með rifi. Á siglingunni verða á vegi okkar þéttbyggðar eyjar, kirkjur, hallir og sjómannsskýli og munum við einnig kynnast forvitnilegri sögu og lífi eyjaskeggja. Að loknum hádegisverði leggjum við að bryggju í Feneyjum, skiptum yfir í minni fljótabáta og siglum yfir á eyjuna Murano. Eyjan er heimsþekkt fyrir framleiðslu á kristal, sem staðið hefur yfir óslitin frá árinu 1291. Á eyjunni er einnig að finna fjölda verslana og verksmiðja. Að skoðun lokinni höldum við för okkar áfram yfir á eyjuna Burano sem þekkt er fyrir framleiðslu á blúndu-kniplingum. Við kynnumst framleiðslunni, kíkjum í verksmiðjurnar ásamt því að upplifa heillandi mannlífið á eyjunni, ganga þröngar götur og skoða okkur um. 

11. maí | Sigling um Veneta lónið til Chioggia & borgin Padua

Á meðan á morgunverði stendur leysir skipið landfestar og siglir yfir Veneta lónið. Í dag verður farið í land í gamla fiskiþorpinu Chioggia en þaðan verður haldið í rútu til hinnar fornu háskólaborgar Padua. Í borginni skoðum við okkur um með innlendan leiðsögumann í broddi fylkingar og fræðumst um viðburðaríka sögu einnar elstu borgar Ítalíu. Rúta ferjar okkur svo aftur landleiðina til Feneyja en í kvöld verður efnt til hátíðarkvöldverðar og skemmtikvölds í einum af sölum skipsins og mun kvöldið líða við tónlist og dans prúðbúinna gesta.

12. maí | Innsbruck & Seefeld í Tíról

Þá er komið að því að kveðja áhöfnina á MS Michelangelo og yfirgefa skipið eftir dásamlega daga í Feneyjum. Ekið verður norður til Seefeld í Tíról í Austurríki þar sem gist verður í 3 nætur. Á leiðinni verður stoppað í Innsbruck, höfuðstað Tíról, sem er umvafinn mikilli fjalladýrð. Innsbruck var ein af borgum Habsborgaranna, einnar valdamestu ættar Evrópu um aldir og ber miðaldahluti borgarinnar þess greinilega merki. Blómatími Habsborgaranna var á 15. öld undir stjórn Maximilians I en hann lét byggja eitt helsta aðdráttarafl borgarinnar, húsið með gullþakinu, sem stendur við eitt fallegasta torgið í Tíról. Við höldum í stutta skoðunarferð um borgina en að henni lokinni verður hægt að kanna borgina á eigin vegum, líta inn til kaupmanna í Maria-Theresien-Straße eða setjast inn á kaffihús.

13. maí | Kláfur upp á Zugspitze & Garmisch-Partenkirchen

Í dag verður farið með lest og kláfi upp á hæsta fjall Þýskalands, Zugspitze í 2.963 m hæð. Þaðan er stórkostlegt útsýni yfir þýsku og austurrísku Alpana. Á leiðinni til baka verður stoppað í Garmisch-Partenkirchen sem er yndislegur og frægur skíðabær með fallegum myndskreyttum húsum. Þar verður tími til að kynna sér líf bæjarbúa, líta inn á kaupmenn bæjarins eða láta fara vel um sig á skemmtilegum kaffihúsum, áður en ekið verður til Seefeld. 

14. maí | Frjáls dagur í Seefeld

Í dag tökum við það frekar rólega, hefjum daginn á staðgóðum morgunverði og höldum síðan í stutta skoðunarferð um Seefeld, sem er með eftirsóttustu ferðamannabæjum Tíról. Bærinn er umkringdur þverhníptum fjöllum en áður fyrr var hér mikið vatnasvæði og ber nafn bæjarins það með sér. Eftir stutta göngu með fararstjóranum er frjáls tími það sem eftir lifir dags. Hér er margt hægt að gera, fara með hestvagni um bæinn, ganga hringinn í kringum vatnið eftir þægilegri gönguleið eða fara með kláfi upp í Rosshütte sem er í 1.784 m hæð. Þar er að finna gott veitingahús og er upplagt að fá sér kaffi og svo sem eina tertusneið. 

15. maí | Heimferð frá München

Nú er komið að heimferð eftir þessa skemmtilegu ferð. Ekið verður út á flugvöllinn í München, brottför er þaðan kl. 14:05 og áætluð lending í Keflavík kl. 16:00 að staðartíma. 


Fararstjóri og skipafélagið geta fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Skip

MS Mischelangelo

MS Mischelangelo tilheyrir frönsku skipafyrirtæki Prestige Class Croisi Europe og var tekið í notkun árið 2000. Þar er að finna glæsilega innréttaða setustofa með bar og veitingastað, þar sem boðið verður upp á hlaðborð á morgnana, en þjónað til borðs í hádegis- og kvöldverði. Allir drykkir eru innifaldir meðan á siglingu stendur, vín, bjór, sterkir drykkir, vatn, gos, kokteilar, kaffi og kökur. Klefarnir eru allir með sér baðherbergi, útsýnisglugga, hárblásara, sjónvarpi og öryggishólfi. Loftræstikerfi er í öllum klefunum.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir