Flórens & Toskana

19. - 26. maí 2018 (8 dagar)

Borgin Flórens eða La Bella eins og hún er oft nefnd, er ein glæsilegasta lista- og menningarborg Ítalíu. Suðræna Toskana héraðið, pálmum prýdd Versilíaströndin og töfrandi klettaströndin Cinque Terre, heilla okkur líka í þessari spennandi ferð. Hún hefst í Brixen í Suður-Tíról, þaðan sem við ökum um gróðursæl héruð yfir til Flórens, höfuðborgar Toskanahéraðs. Í Flórens upplifum við skemmtilega daga á meðan við fræðumst um sögu, listir og mannlíf borgarinnar. Þessi menningarborg er einstök og hreint ótrúlegt að slíkur fjöldi listaverka sé varðveittur á einum og sama staðnum. Verk listamanna á borð við Leonardo da Vinci og Michelangelo, auk svo margra annarra, gæða borgina slíkum töfrum að enginn fer héðan ósnortinn. Af svo ótalmörgu er að taka og mælum við sérstaklega með heimsókn á Galleria deglia Uffezi listasafnið, sem er engu líkt. Úr menningunni í Flórens ökum við eftir Versilíaströndinni þar sem bærinn Forte dei Marmi bíður okkar, en ásamt honum munum við heimsækja San Gimignano borg hinna þúsund turna og sigla með Cinque Terra ströndinni með viðkomu í Porto Venere, Monterosso og Riomaggiore. Ferðin endar svo í heimsborginni Mílanó sem engan svíkur.

Verð á mann í tvíbýli 199.900 kr.

Aukagjald fyrir einbýli 31.300 kr.

 
Innifalið

  • 8 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgunverður allan tíman á hótelum.
  • Fjórir kvöldverðir.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Þrír kvöldverðir í Flórens.
  • Aðgangseyrir í söfn, hallir og kirkjur.
  • Siglingar og hádegisverðir.
  • Þjórfé.

Valfrjálst

  • Galleria deglia Uffizi listasafnið ca. € 18.
  • Sigling með Cinque Terra ströndinni ca. € 24.
  • Höllin Palazzo Pitti ca. € 10.

Kort af ferðinni

Ferðalýsing

Prenta ferðalýsingu

19. maí | Flug til München & Brixen

Brottför frá Keflavík kl. 7:20. Mæting í Leifsstöð um 2 klst. fyrir brottför. Lending í München kl. 13:05 að staðartíma. Þaðan verður ekin fögur leið yfir Alpafjöllin og Brennersskarðið til Suður-Tíról á Ítalíu og gist eina nótt í Brixen.

20. maí | Brixen & Flórens

Eftir góðan morgunverð verður ekið til borgarinnar Flórens sem staðsett er í hinu víðfræga héraði Toskana. Flórens eða La Bella eins og hún er oft nefnd, er með glæsilegustu lista- og menningarborgum Ítalíu og ein af fjölsóttustu borgum veraldar. Lega borgarinnar er með eindæmum fögur, en hún stendur báðum megin fljótsins Arno. Í Flórens verður gist í 3 nætur á góðu hóteli í miðbænum og aðeins örfáum skrefum frá demöntum listasögunnar.

21. maí | Glæsileg skoðunarferð í Flórens

Í dag höldum við í glæsilega skoðunarferð um Flórens með heimamann í fararbroddi, sem mun leiða okkur í allan sannleikann um sögu og mannlíf borgarinnar og sýna okkur helstu staði hennar. Fáar borgir komast í hálfkvisti við Flórens, en ótrúlegt er að slíkur fjöldi fágætra listaverka finnist á jafn litlu svæði. Að skoðunarferðinni lokinni gefst hverjum og einum tími til að kanna borgina betur á eigin vegum og fá sér hressingu.

Opna allt

22. maí | Frjáls dagur í Flórens

Hver kannast ekki við snillinga á borð við Leonardo da Vinci, Michelangelo, Botticelli, Galileo Galilei, Dante og Machiavelli? Allir mörkuðu þeir spor sín í menningar- og listasögu borgarinnar. Í dag er upplagt að skoða sig betur um í töfrandi borginni og verja drjúgum tíma á Galleria deglia Uffezi listasafninu, sem er eitt glæsilegasta listasafn landsins. Það var áður stjórnsýsluhús en er nú málverkasafn með 4.500 myndum sem sýna þróun menningar í Flórens og málaralistar í Feneyjum. Svo má ekki gleyma glæsilegustu höll borgarinnar Palazzo Pitti sem Medici ættin lét stækka og yndislegum garði hennar. Kaupmenn borgarinnar eru á sínum stað og leggja sitt af mörkum til að gera þetta að ógleymanlegum degi.

23. maí | San Gimignano & Forte dei Marmi

Nú kveðjum við Flórens og ökum fagra leið um Toskanahéraðið með viðkomu í San Gimignano, borg hinna fínu turna. Áður fyrr voru turnar borgarinnar rúmlega 70 en í dag má sjá 13 til 14 þeirra. Borgin er ein af best varðveittu miðaldaborgum Ítalíu og mun okkur gefast tími til að skoða helstu staði hennar. Því næst er stefnan tekin á Versilíaströndina til Forte dei Marmi, sem verður okkar næsti áfangastaður. Þar munum við gista í 3 nætur á góðu hóteli í miðbænum. 

24. maí | Sigling um Cinque Terra ströndina

Í dag geta áhugasamir farið í ævintýralega siglingu úti fyrir Cinque Terre ströndinni, einu  stórfenglegasta svæði ítölsku rivíerunnar. Siglt verður til bæjanna Porto Venere, Riomaggiore, Manarola, Corniglia, Vernazza og Monterosso. Auðvitað verður stoppað til að fá sér hádegishressingu og kanna líf bæjarbúa í nokkrum þeirra.

25. maí | Frjáls dagur í Forte dei Marmi

Þennan dag er frjáls dagur í Forte dei Marmi, sem er yndislegur og skemmtilegur bær. Upplagt að ganga um bæinn, líta inn í fínar verslanir, á kaffihús eða veitingastaði. Einnig er hægt að fara í gönguferð eftir ströndinni eða taka það rólega og njóta glæsilegrar aðstöðu hótelsins.

26. maí | Dagur í Mílanó & heimferð

Nú kveðjum við Toskana eftir yndislega daga, það er komið að heimferð. Ekið verður til heimsborgarinnar Mílanó þar sem tími gefst til að líta inn hjá kaupmönnum borgarinnar og skoða sig um áður en farið verður út á flugvöll. Brottför með flugi kl. 20:40 og lent í Keflavík kl. 22:55 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir