Frændþjóðin Færeyjar

21. – 25. maí 2018 (5 dagar)

Í þessari frábæru ferð um nágrannaland okkar Færeyjar munum við fá góða yfirsýn yfir eyjarnar og allt það helsta sem þar er að sjá. Gist verður i Þórshöfn á Straumey á góðu 3* hóteli í hjarta bæjarins. Við skoðum litla bæi, fallegar hafnir og njótum einstaks landslags eyjanna. Farið verður til Saksunar en þar skoðum við fyrrum bóndabýlið Dúvugarð, sem nú er minjasafn. Við dáumst að náttúrufegurð og fræðumst um húsakynnin, en margar nýbyggingar á eyjunum skarta hlýlegu torfþaki. Vinalega þorpið Tjörnuvík, bíður okkar en þaðan er útsýni yfir til Risans og Kellingarinnar, sem eru tveir drangar yst á flóanum milli Austureyjar og Straumeyjar. Við heimsækjum Klakksvík á Borðey sem var einkar afskekkt áður en Norðureyjagöngin komu til sögunnar. Á Austurey höldum við á slóðir Þrándar í Götu, sem var ein aðalpersóna í Færeyingasögu. Síðast en ekki síst förum við til Kirkjubæjar, helsta sögustaðar eyjanna með sínum fornfrægu kirkjum og íbúðarhúsi kóngsbændanna og á Tinganesi kynnum við okkur 1100 ára gamlan þingstað Færeyinga. 

Verð á mann í tvíbýli 168.600 kr.

Aukagjald fyrir einbýli 18.300 kr.

 
Innifalið

  • 5 daga ferð
  • Flug með Air Iceland Connect og flugvallaskattar.
  • Gisting í 2ja manna herbergi með baði.
  • Morgunverður á hótelinu.
  • Þrír kvöldverðir.
  • Einn hádegisverður.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn á söfn, í kirkjur og í siglingar.
  • Hádegisverðir.
  • Þjórfé.

Fróðleikur

Við viljum benda farþegum sérstaklega á tvær áhugaverðar bækur um Færeyjar:

  • Eyjarnar átján, dagbók úr Færeyjarferð 1965 eftir Hannes Pétursson. Útgefandi Menningarsjóður 1965.
  • Lönd og lýðir eftir Gils Guðmundsson. Útgefandi Bókaútgáfu Menningarsjóðs 1968.

Kort af ferðinni

Ferðalýsing

Prenta ferðalýsingu

21. maí | Flug til Færeyja & ekið til Þórshafnar

Brottför frá Reykjavíkurflugvelli kl. 17:05. Mæting í síðasta lagi klst. fyrir brottför. Lending í Vágum kl. 19:25 að staðartíma. Frá flugvellinum höldum svo til Þórshafnar þar sem gist verður fjórar nætur á Hótel Thorshavn sem staðsett er í hjarta miðbæjarins.

22. maí | Straumey & Austurey

Þórshöfn, höfuðstaður Færeyja, er staðsett á Straumey, en Straumey og Austurey teljast vera meginland Færeyja. Í dag heimsækjum við nyrstu byggðir eyjanna. Við ökum til Saksun, en þar var áður fyrr góð höfn með þrönga aðkomu milli ægifagurra, þverhníptra fjalla. Í Saksun munum við skoða fyrrum bóndabýlið Dúvugarður sem í dag er minjasafn. Að loknum góðum tíma í Dúvugarði höldum við yfir til Tjörnuvíkur. Á góðum degi er þaðan einstakt útsýni til Risans og Kerlingarinnar, dranganna tveggja sem rísa hátt upp úr sjónum yst á flóanum milli Austureyjar og Straumeyjar. Um þau er til skemmtileg þjóðsaga sem tengist Íslandi. Við höldum áfram yfir Sundini um Eiði til Gjógv sem er lítil byggð nyrst á Austurey. Þar snæðum við hádegisverð í Gjárgarði sem er afar fallegt hótel með torfþaki eins og margar nútímabyggingar í Færeyjum. Höfnin og umhverfið allt er rómað fyrir náttúrufegurð. Á leið okkar aftur til Þórshafnar verður ekið um Funningsfjörð. Áhugasömum gefst færi á að skoða mannlífið í bænum síðdegis og um kvöldið velja gestir sér einhvern af hinum fjölmörgu spennandi veitingastöðum í Þórshöfn.

23. maí | Borðey, Klakksvík, Viðey & Viðareiði

Í dag förum við til Klakksvíkur á Borðey, næst stærsta bæjar Færeyja, sem stendur á mjóu eiði milli tveggja víka. Árið 2006 voru Norðureyjagöngin opnuð, en þau eru tæpir 6 km að lengd og tengja Borðey við Austurey. Við skoðum okkur um í gamla bænum og lítum m.a. inn í Christianskirkju, sem var vígð árið 1963 og þykir ein glæsilegasta kirkja Færeyja. Við ökum lengra norður til Viðeyjar, en þar er nyrsta byggð eyjanna, Viðareiði. Á leiðinni til Þórshafnar heimsækjum við Götu, en Þrándur í Götu, ein aðalpersóna Færeyingasögu bjó hér árið 1000. 

Opna allt

24. maí | Kirkjubær og Tinganes

Ekið verður til Kirkjubæjar sem er merkasti sögustaður eyjanna og verða miðaldakirkjurnar tvær, Magnúsarkirkja og Ólavskirkja, skoðaðar. Litið verður á Reykstovuna, sem er í grunninn elsta timburhús í heimi sem enn er búið í. Eftir hádegi skoðum við okkur um á þeim sögufræga stað Tinganesi þar sem Færeyingar stofnuðu þing árið 900 og færeyska landsstjórnin hefur nú aðsetur sitt. Eftir það er frjáls tími í Þórshöfn og gefst þá hverjum og einum tími til að skoða sig betur um. Áhugasamir geta farið með ferju út í Nólsey, sem er um 20 mín frá Þórshöfn.

25. maí | Heimferð

Nú er komið að leiðarlokum, en snemma dags kveðjum við Færeyjar og höldum út á flugvöll í Vágum. Brottför er með flugi kl. 8:00 og er áætluð lending í Reykjavík kl. 8:20 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Sigrún Valbergsdóttir

Sigrún Valbergsdóttir er fædd í Hafnarfirði og alin upp í Reykjavík. Sem barn dvaldi hún öll sumur í Svarfaðardal en á unglingsárunum rak móðir hennar sumarhótel í Grundarfirði og þar gekk hún um beina á daginn en upp til fjalla þegar kvöldaði. Sigrún hefur verið fararstjóri hjá Bændaferðum í aðventuferðum til Þýskalands og Austurríkis, einnig í Gardavatnsferðum og gönguferðum um Austurríki og Færeyjar. 

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir