Jólaferð til Birmingham

Jólaferð til Birmingham í Englandi, næst stærstu borgar Englands og einnar mestu verslunarborgar Evrópu. Þessi gamla iðnaðarborg hefur fengið algjöra andlitslyftingu síðastliðinn áratug. Gömlu iðnaðarhúsin hafa verið rifin og í dag státar miðbærinn af glæstum byggingum sem hýsa verslanir, söfn og leikhús á heimsmælikvarða. Á þessum tíma árs er jólastemningin í hámarki, þar sem borgin býr yfir stærsta jólamarkaði Bretlands með fjölda sölubása sem aðallega selja handverk og veitingar. Hótelið er vel staðsett miðsvæðis, steinsnar frá stærstu verslunarmiðstöðinni og í göngufæri við alla helstu staði. Í Birmingham kraumar fjölþjóðamenningin, en íbúar borgarinnar eru af ýmsum uppruna. Þess má sérstaklega njóta á kínverskum, pakistönskum og tælenskum  veitingastöðum borgarinnar sem bjóða kræsingar á hóflegu verði. Í borginni má finna ótalmörg skemmtileg söfn og tilvalið er að bóka sig á flotta leikhússýningu eða skella sér á fótboltaleik með Aston Villa eða Birmingham City, en sýningar þarf að bóka með góðum fyrirvara.

VisitBirmingham.com

Verð á mann 109.900 kr.

Aukagjald fyrir einbýli 29.600 kr.


Innifalið

  • 5 daga ferð.
  • Flug með Icelandair til Birmingham og flugvallaskattar.
  • Gisting í 2ja manna herbergi með baði í 4 nætur.
  • Morgunverðir.
  • Ferðir milli flugvallar og hótels í Birmingham.
  • Íslensk fararstjórn.

Ekki innifalið

  • Aðgangseyrir á söfn, í hallir og kirkjur.
  • Hádegis- og kvöldverðir.
  • Þjórfé.

Kort af ferðinni

Ferðalýsing

Prenta ferðalýsingu

23. nóvember | Flug til Birmingham & skoðunarferð um borgina

Brottför frá Keflavík kl. 7:50. Mæting í Leifsstöð í síðasta lagi 2 klst. fyrir brottför. Lending í Birmingham er kl. 10:25 að staðartíma. Á leið okkar frá flugvellinum lítum við nokkur af merkustu kennileitum borgarinnar og sjáum stórglæsilegar nýjar byggingar eins og verslunarmiðstöðina Bullring og Library of Birmingham, en þessar byggingar vekja svo sannarlega athygli fyrir óvenjulega hönnun. Við skiljum farangurinn eftir á hótelinu og förum svo fótgangandi í skoðunarferð um borgina með fararstjóra, þar til herbergin eru reiðubúin. Hótelið sjálft er umkringt kínverskum veitingastöðum og á næstu grösum er mikið um leikhús, bari og skemmtistaði, en Birmingham er þekkt fyrir öflugt tónlistarlíf. Héðan komu jú hljómsveitirnar Led Zeppelin, Black Sabbath, ELO og Duran Duran.

24. nóvember | Frjáls dagur, jólamarkaður & Birmingham Library

Í dag er tilvalið að njóta jólastemningarinnar og bregða sér á þýska jólamarkaðinn í Birmingham. Þessi markaður er tvískiptur, en sá hluti hans sem liggur eftir aðal verslunargötunni er af þýskri fyrirmynd frá vinaborginni Frankfurt. Þar má t.d. gæða sér á Glühwein og Bratwürst innan um ýmsar vörur. Hinn hluti markaðarinns við Birmingham Library hefur meira af handverki frá heimamönnum í bland við vörur frá ýmsum heimsins löndum. Hér má gæða sér á góðgæti af svæðinu, eins og ostum, sælgæti, öli og pylsum. Á þessu svæði er líka að finna parísarhjól og skautasvell. Birmingham Library er ein merkasta nýbygging borgarinnar og hefur hlotið fjölda alþjóðlegra verðlauna fyrir hönnun sína. Vert er að skoða þessa skemmtilegu byggingu, njóta útsýnisins frá þakgarðinum og jafnvel kíkja á kaffihúsið á staðnum.

25. nóvember | Frjáls dagur & Birmingham Rag Market

Aðeins steinsnar frá hótelinu er Birmingham Rag market og á þeim markaði er aldeilis líf í tuskunum á laugardögum. Á útimarkaðinum má finna fjölbreytta matvöru, aðallega grænmeti, ávexti og osta, en eins og nafnið bendir til er líka selt mikið úrval af fataefnum af ýmsu tagi. Við hlið útimarkaðarins er markaðshöll sem minnir um margt á Kolaportið. Þar gefur að líta allskonar muni og klæðnað á ótrúlegu verði. Bullring verslunarmiðstöðin stendur þarna á móti, en þessi glæsilega verslunarmiðstöð, þar sem finna má margvíslega nútímahönnun, er áfangastaður útaf fyrir sig. Framúrstefnuleg bygging járnbrautarstöðvarinnar hýsir einnig verslunarmiðstöð á efri hæðum, svo kaupglaðir ættu að vera kátir á þessu svæði.

Opna allt

26. nóvember | Frjáls dagur & litið inn á söfn

Fjölda glæsilegra safna er að finna í borginni. Við mælum sérstaklega með sædýrasafninu National Sea Life Center. Það er áhugavert safn fyrir unga sem aldna, með fjölmargar tegundir af sjávardýrum sem koma manni fyrir sjónir eins og gangi maður á sjávarbotni. Í umhverfi safnsins má sjá gömlu skipaskurðina sem áður fyrr voru notaðir til að flytja vörur og hráefni fyrir iðnaðarfyrirtækin. Í dag er gaman að rölta meðfram þessum huggulegu síkjum. Tilvalið er að rölta frá sædýrasafninu meðfram síkinu niður að Gas street basin og fara þar á kaffi- eða veitingahús. Óhætt er að mæla með Birmingham museum, sem er í senn listasafn, borgarminjasafn og iðnaðarsögusafn, en iðnaðarsaga borgarinnar er sérstaklega merkileg. Einnig má benda á Think Tank vísindasafnið, nú eða leikfangalestasafnið Wonderful World. 

27. nóvember | Heimferð frá Birmingham

Eftir skemmtilegar upplifanir undanfarinna daga verður ekið til flugvallar. Brottför þaðan kl. 12:25 og lending í Keflavík kl. 15:10 að staðartíma.

Myndir úr ferðinni

Fararstjórn

Þórhallur Vilhjálmsson

Þorhallur Vilhjálmsson er fæddur í Reykjavík 1963. Hann nam markaðsfræði við háskólann í San Francisco og útskrifaðist þaðan árið 1990. Hann hefur starfað að markaðsmálum hjá ýmsum fyrirtækjum bæði hérlendis og í Bandaríkjunum m.a. sem forstöðumaður sölu- og framleiðsluáætlana hjá ISAL í Straumsvík, markaðsstjóri hjá Nýsi hf og markaðsstjóri Portus hf (sem byggði tónlistar- og ráðstefnuhúsið Hörpuna í Reykjavík). 

Hótel

Ibis Hotel Birmingham City

Ibis Hotel Birmingham City er staðsett miðsvæðis í Birmingham, í göngufæri við Bullring verslunarmiðstöðina, jólamarkaðinn og útimarkaðinn, leikhús, söfn og veitingastaði. Á hótelinu, sem er 3ja stjörnu, eru 159 nútímaleg herbergi af hóflegri stærð með baði, sjónvarpi, síma, ókeypis nettengingu, hárþurrku og aðstöðu til að hita sér kaffi eða te á hverju herbergi.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir