Aðventutöfrar í Tíról

29. nóvember - 4. desember 2017 (6 dagar)

Í faðmi fjallanna er dýrðin einstök á aðventunni og er Tíról í Austurríki alger ævintýraheimur út af fyrir sig.

Við hefjum ferðina í heimsborginni München á aðal jólamarkaði borgarinnar en höldum svo til Seefeld, sem er yndislegur bær í fjöllum Austurríkis. Bærinn hvílir í sal Wetterstein, Mieminger og Karwendelfjalla og verður hann okkar samastaður í þessari aðventuferð. Við höldum í dagsferð til bæjarins Mittenwald sem státar af litlum, myndskreyttum húsum, bæjarlæk og skemmtilegum verslunum. Skíðabærinn Garmisch Partenkirchen í Þýskalandi, sem er einstaklega heillandi á aðventunni, verður sóttur heim, ásamt Innsbruck, sem er ein af ævintýraborgum aðventunnar, en sérstaklega gaman er að upplifa iðandi mannlíf hennar og dýrðina í Swarovski kristalsheiminum í Wattens. Við heimsækjum einnig borgina Kufstein, upplifum einstakan jólamarkað þar, förum í miðaldakastalann sem gnæfir yfir borginni með hetjuorgelið svokallaða, stærsta útiorgel í heimi.

Verð á mann 149.900 kr.

Aukagjald fyrir einbýli 23.800 kr.


Innifalið

  • 6 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allir drykkir á bar hótelsins og einnig með kvöldverði
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Hádegisverðir.
  • Þjórfé.

Valfrjálst

  • Swarovski heimar ca. € 17.
  • Kufstein kastalinn ca. € 8.

Kort af ferðinni

Ferðalýsing

Prenta ferðalýsingu

29. nóvember | Flug til München & Seefeld

Brottför frá Keflavík kl. 7:20. Mæting í Leifsstöð um 2 klst. fyrir brottför. Lending í München kl. 12:05 að staðartíma. Við byrjum á því að aka inn í miðborg München. Helsta kennileiti borgarinnar er gotneska dómkirkjan með laukturnunum tveimur, Marienkirche. Á Marienplatz torginu er eitt fallegasta ráðhús landsins, en úr turni ráðhússins hljómar fagurt klukknaspil 2 sinnum á dag. Á torginu er einn aðal jólamarkaður borgarinnar en mikil aðventustemning um borgina alla. Góður tími gefst til að fá sér hressingu og upplifa aðeins ljósum prýdda aðventuna. Síðar verður ekið til Tíról í Austurríki eða nánar tiltekið til Seefeld sem er í 1.180 m hæð. Þetta er yndislegur bær inn á milli fjallanna og við gistum 5 nætur á góðu hóteli í miðbænum. 

30. nóvember | Mittenwald & Garmisch-Partenkirchen

Eftir góðan morgunverð förum við saman í göngutúr um bæinn og kynnum okkur umhverfið. Undir hádegi er lagt af stað til bæjarins Mittenwald sem á sér engan líka, með litlum, myndskreyttum húsum, bæjarlæk og skemmtilegum verslunum. Bærinn er frægur fyrir smíði strengjahljóðfæra og stendur minnisvarði fyrir Matthias Klotz, upphafsmanns fiðlusmíði í Mittenwald, fyrir utan fiðlusafn bæjarins. Frá Mittenwald förum við til Garmisch-Partenkirchen í Þýskalandi sem er einn þekktasti skíðabær landsins. Bærinn er töfrandi á aðventunni og ilmur jólanna svífur yfir aðventumarkaði hans. Hér er upplagt að fá sér hressingu, en það tilheyrir að fá sér heitt jólaglögg á göngu um jólamarkaðinn. Einnig er hægt að fara með hestvagni um bæinn, sem er mjög huggulegur á þessum árstíma, og njóta um leið náttúrufegurðarinnar allt um kring.

1. desember | Aðventudýrð í Swarovski & Innsbruck

Við njótum þess að snæða góðan morgunverð í rólegheitum og ökum svo til Wattens þar sem Swarovski kristalssafnið og verslun eru til húsa, en þar glitrar á ýmis djásn. Áfram höldum við til Innsbruck, höfuðborgar Tíról, sem er umvafin fjöllum og tindrandi náttúrufegurð. Innsbruck var ein af borgum Habsborgaranna, einnar mikilvægustu valdaættar Evrópu. Blómatími hennar var á 15. öld undir stjórn Maximilian I af Habsborg. Hann lét byggja helsta kennileiti borgarinnar, húsið með gullþakinu, sem stendur við eitt fallegasta torgið í Tíról. Farið verður í stutta göngu með fararstjóranum en eftir það verður frjáls tími til að kanna borgina á eigin vegum og fá sér jólaglögg á aðventumarkaði borgarinnar. Borgin er sérstaklega heillandi og ævintýraleg á aðventunni því borgarbúar nota gjarnan Grimmsævintýrin sem þema í skreytingunum. Gefinn verður góður tími til að líta inn til kaupmanna í Maria-Theresien-götunni en þar er einnig mikil jólastemming. 

Opna allt

2. desember | Kufstein & Kufstein kastalinn

Bærinn Kufstein er sérlega spennandi bær með jólamarkað í almenningsgarði borgarinnar. Miðaldakastalinn Kufstein trónir yfir borginni, en kastalinn er frægur fyrir tilkomumikið útiorgel, svokallað Hetjuorgel, sem tilvalið er að hlýða á. Á hverjum degi í hádeginu er leikið á orgelið til minningar um þá sem féllu í heimstyrjöldunum tveimur og óma orgelhljómarnir frá turni kastalans og endurkastast í þverhníptum fjöllunum í kring. Mögulegt er að fara í skoðunarferð um kastalann og hverfa um hríð aftur í aldir. Í kastalagarðinum má sjá skapandi handverk sem verið er að vinna þar á aðventunni en við kastalann er einnig skemmtilegur og sérstakur jólamarkaður. 

3. desember | Aðventumarkaður & kósý dagur í Seefeld

Í dag höfum við það notalegt í fjalladýrðinni í yndislega bænum Seefeld. Áður fyrr var þetta mikið vatnasvæði eins og nafn bæjarins ber með sér. Þennan dag er aðventumarkaður í bænum, lifandi tónlist og mikið um dýrðir. Hér er margt hægt að gera, t.d. fara með hestvagni í rómantíska ferð um nágrennið eða ganga hringinn í kringum vatnið eftir góðum göngustíg. Mögulegt er að fara upp á Rosshütte fjallið með kláfi sem fer upp í 1.784 m hæð. Þarna uppi er gott veitingahús og upplagt að fá sér kaffi og tertusneið. 

4. desember | Heimferð frá München

Nú er komið að heimferð eftir ljúfa ferð. Eftir morgunverð verður ekið til München. Brottför þaðan kl. 13:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Inga Ragnarsdóttir

Inga hefur starfað fyrir Ferðaþjónustu bænda - Bændaferðir frá árinu 2004. Síðan þá hefur hún farið í fjölda ferða um mið-Evrópu og til Egyptalands. Hún hefur sérhæft sig í Asíu og ferðast um lönd eins og  Indland, Nepal, Tíbet. Víetnam, Cambódíu, Búrma og Japan. Til Kína hefur hún heimsótt á hverju ári, stundum oftar en einu sinni,  í yfir 10 ár og segir töfra Kína vaxa eftir því sem maður kynnist landinu nánar og býr hún yfir mikilli þekkingu um land og þjóð enda hefur Kína heillað hana frá því á unglingsárunum.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00