Aðventugleði í Tríer & Köln

Rólegur dagur er á dagskrá okkar og því er upplagt að njóta þess að vera í Tríer og skoða borgina betur á eigin vegum. Hægt er að rölta um verslunargötur og fara í skemmtilega vínsmökkun sem er víða í boði og hér má einnig heimsækja jólamarkaði borgarinnar. Einnig er upplagt að nota glæsilega heilsulind hótelsins.

Eftir góðan morgunverð verður stefnan tekin á menningarborgina Köln. Á leiðinni þangað verður einn fallegasti jólamarkaður Móseldalsins skoðaður en hann er í borginni Koblenz og einkennist af yfir hundrað skreyttum smáhýsum. Borgin Koblenz stendur við ármót Mósel og Rín og þar sem árnar renna saman heitir Deutsches Eck eða þýska hornið og er oft nefnt fallegasta horn Þýskalands. Við förum í stutta skoðunarferð um þessa sögufrægu, rúmlega 2000 ára gömlu borg, Koblenz. Gaman er að skoða gamla miðaldabæinn sem prýddur er glæstum byggingum, fallegum kirkjum, þröngum litlum götum og gömlum bindingsverkshúsum. Eftir skoðunarferð gefst frjáls tími til að kanna borgina á eigin vegum, rölta um gömul stræti og torg og ekki má láta dýrð jólamarkaðsins fram hjá sér fara. Komum seinni hluta dags til Köln þar sem gist verður í þrjár nætur.

Farið verður í ljúfa gönguferð um borgina en Köln er yndisleg borg sem var nánast jöfnuð við jörðu í lok seinni heimsstyrjaldarinnar. Eftir mikla endurbyggingu, þar sem gamli miðborgarhlutinn var látinn halda sér, iðar nú hjarta miðborgarinnar af lífi og skemmtilegri menningu. Ekki síst á þessum árstíma þar sem einn af fallegustu aðventumörkuðum Evrópu er hér í borg en nokkuð margir aðventumarkaðir eru dreifðir um borgina. Í Köln er m.a. að finna sögulega ráðhúsið, mörg áhugaverð söfn og eitt af meistaraverkum hágotneska tímans, dómkirkjuna sjálfa, kirkju Péturs postula með þekktu gotnesku turnspírunum. Eftir skoðunarferðina gefst frjáls tími til að fá sér hádegishressingu og skoða sig um í borginni á eigin vegum. Sameiginlegur kvöldverður.

Í dag gefst tími til að kanna borgina enn betur á eigin vegum, líta t.d. í verslanir en borgin er einnig þekkt fyrir skemmtileg kaffi- og veitingahús. Auðvitað er líka hægt að fá sér jólaglögg og hressingu á jólamörkuðum borgarinnar. Þeir sem vilja draga sig frá ys og þys miðbæjarins og komast í notalega stemningu geta farið í skemmtilega aðventusiglingu á ánni Rín þar sem boðið er upp á lifandi tónlist og heitan drykk að eigin vali. Báturinn fer frá Konrad Adenauer bakkanum og hér er hægt að njóta þess að horfa á dýrð borgarinnar á siglingu.

Það er komið að heimferð eftir ljúfa daga. Við ökum til Frankfurt en brottför þaðan er kl. 13:05. Lent í Keflavík kl. 15:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.