Ari Trausti Guðmundsson er jarðeðlisfræðingur og hefur hefur starfað sem kennari, rithöfundur síðan 1980 og ráðgjafi í náttúruvísindum og umhverfismálum síðan 1993. Flestar bækur Ara Trausta fjalla um jarðfræði, eldfjallafræði, stjörnufræði, ferðaslóðir og fjallmennsku en einnig liggur eftir hann tugur skáldverka; smásögur, ljóðabækur og skáldsögur. 
 
Ari Trausti  hefur einnig starfað sem dagskrárgerðarmaður í útvarpi og sjónvarpi, m.a. að heimildarmyndum og þáttaröðum. Enn fremur er hann meðal reyndari fjallamanna landsins, kunnur fyrir ferðir á heimskautasvæðum og framandi slóðum, auk þess að hafa unnið að sýningum og söfnum heima og heiman.
 
Ari Trausti hefur ferðast níu sinnum til Ekvador, oftast með íslenska hópa, en einnig á eigin vegum, og er vel kunngur landi og þjóð, háfjöllum jafnt sem frumskógum. 

Guðrún G. Bergmann hefur starfað sem fararstjóri í sérferðum hjá Ferðaþjónustu bænda frá árinu 2005 og farið með hópa í nokkrar ferðir til Egyptalands, Perú og Bólivíu. Hún hefur opnað fyrir okkur spennandi markaði og nú eru það Ástralía og Nýja-Sjáland sem leiðin liggur til haustið 2011. Guðrún hefur víðtæka þekkingu af báðum löndum og þekkir vel til siða og menningar þar. Hún ferðaðist í tæplega 3 vikur um Nýja-Sjáland árið 2004 og árið 2009 varði hún rúmum mánuði í ferðalög um Ástralíu, með viðkomu í Singapore.
 
Guðrún hefur notið mikilla vinsælda sem fararstjóri, enda hafa góðir hæfileikar hennar í mannlegum samskiptum og skipulagshæfileikar hennar styrkt hana í því starfi. 

Ég heiti Íris Sveinsdóttir og er hárgreiðslumeistari að mennt.  Ég rek hárgreiðslustofur bæði á Íslandi og í Þýskalandi, en þar bjó ég í rúm 20 ár þangað til að ég ákvað að flytja aftur heim til Íslands fyrir rúmum tveimur árum.  Eftir heimkomuna hóf ég leiðsögunám í Endurmenntun Háskóla Íslands og útskrifast þar nú í desember. Frá því ég fyrst man eftir mér hef ég ferðast. Foreldrar mínir þeyttust með mig og systur mína um landið þvert og endilangt og ekki þótti mér það leiðinlegt. Búandi í Evrópu notaði ég hverja frístund til ferðalaga. Það eru mikil forréttindi að getað sameinað vinnu og áhugamál og ekki skemmir fyrir að eiginmaður minn, Jón Guðmundsson, er mikill fjallamaður og eru ferðalög og útivist okkar aðal áhugamál.