7. – 14. júní 2012
Fararstjóri: Sævar Skaptason
Þjálfari: Julia Böttger
Fjallahlaup eru ekki bara hlaup heldur líka náttúruskoðun þar 
sem undur náttúrunnar fá hlauparann til að gleyma erfiðinu sem hlaupum um brött fjöll og djúpa dali fylgir. Höfuð markmið ferðarinnar er að njóta þess að hlaupa um Alpalandslag, um engi og tún, eftir skógarstígum, fjallastígum og upp á fjallatinda. Þessi ferð er því upplagður undirbúningur fyrir alla þá sem stefna á fjallahlaup á árinu og vilja kynnast leyndardómum fjallahlaupanna. Í skemmtilegum félagsskap þar sem sameiginleg áhugamál einkenna þátttakendur er hægt að miðla reynslu, verða betri í markmiðasetningu og fá leiðbeiningar hjá atvinnu fjallahlaupara sem hefur hlaupið um víða veröld og sérhæft sig í þjálfun fjallahlaupara. Hlaupaleiðir verða að sjálfsögðu valdar eftir getu og áhuga þátttakenda. Við dveljum á þægilegum alpahótelum við tvö af fallegustu vötnum Alpanna, Achensee og Tegernsee. Í lok dags er því hægt að slaka á í heilsulindum hótelanna og njóta góðrar máltíðar þar sem farið er yfir afrek dagsins, ásamt því að hlýða á áhugaverða fyrirlestra um m.a. fjallahlaup almennt, undirbúning og búnað.
