Sævar Skaptason hefur alla tíð verið mikið fyrir útivist. Hann byrjaði að starfa við ferðaþjónustu árið 1981 og var þá skálavörður í skála Ferðafélags Íslands í Langadal, Þórsmörk, til ársins 1986. Yfir sumartímann árin 1989 og 1990 starfaði hann einnig sem skálavörður í Landmannalaugum.

Sævar fór síðan í Leiðsöguskólann og starfaði sem leiðsögumaður með þýska ferðamenn hér heima í fjögur sumur. Hann hefur búið í Þýskalandi og unnið þar á ferðaskrifstofu sem sérhæfði sig í ferðum til Íslands og talar reiprennandi þýsku.

Sævar hefur verið virkur félagi í Hjálparsveit Skáta í Kópavogi síðan 1975. Hans helstu áhugamál er útivist af ýmsu tagi, eins og fjallahlaup, götuhlaup, gönguferðir, skíðaferðir, hjólaferðir og fleira í þeim dúr. Hann hefur farið sem fararstjóri í hlaupaferðir, skíðaferðir og gönguferðir en auk þess hefur hann m.a. tekið þátt í maraþoninu á Kínamúrnum, Tíbetmaraþoninu í 3.800 m hæð yfir sjó og fjölmörgum maraþonum víða um heim.

Frá árinu 1998 hefur Sævar verið framkvæmdastjóri Ferðaþjónustu bænda.