Svæðið
Áfangastaður þessarar nýju ferðar er bærinn Gerlos en um hann liggja fjallkambar Kitzbühel Alpanna í norðri og Zillertaler Alpanna í suðri. Bærinn liggur í 1250 m hæð í hinum heillandi Zillerdal. Elstu heimildir um Zillerdal eru frá 889 þar sem sagt frá því þegar Arnulf frá Carinthiu gaf erkibiskupinum í Salzburg land í dalnum. Notuðu landeigendur í dalnum ánna Ziller til að afmarka eignarskiptinguna og má enn greina merki þessarar skiptingar, því kirkjur við hægri bakka árinnar hafa flestar græna turna og tilheyra biskupadæmi Salzburgar en kirkjur á vinstri bakkanum eru með rauða turna og tilheyra biskupadæmi Innsbruck. Dalurinn teygir sig frá bænum Strass til Mayerhofen þar sem hann skiptist í fjóra minni dali: Tux-dalinn, Gründe-Samsergrund, Zillergrund og Stilluppgrund. Gerlos liggur hæst allra bæja í Zillerdalum en á þessu fallega alpasvæði má finna tignarlega tinda, tær vötn, ár, skóga og Gerlos hásléttuna, sem er sannkölluð útivistarparadís.
Gönguferðirnar
Náttúruunnendur fá svo sannarlega eitthvað fyrir sinn snúð á svæðinu í kringum Gerlos því þeirra bíða 850 km af mismunandi gönguleiðum við allra hæfi. Frá bænum Gerlos liggja margar fallegar gönguleiðir en það er t.d. hægt að trítla meðfram Gerlosánni inn í dalinn
Schöntal, enda í Lackenalm og njóta þar dásamlegs útsýnis yfir dalinn og Schöntaljökul. Eins er dalurinn Wimmertal ákjósanlegur fyrir heilsusamlegar göngur og upplagt er að enda á því að láta vatnið í Wimmerbach læknum leika um fæturnar. Göngurnar eru skipulagðar frá hótelinu og mun austurrískur gönguleiðsögumaður leiða hópinn, ásamt íslenska fararstjóranum. Göngunum verður hagað eftir getu hópsins og mögleiki er á að skipta hópnum til að koma betur til móts við þarfir hvers og eins. Einnig er hægt að velja sér leiðir á eigin spýtur allt eftir því hvað hentar hverjum og einum. Eftir ánægjulega útivist er upplagt að slaka á í heilsulind hótelsins, láta þreytuna líða úr sér og dreyma alpadrauma!
Hótelið 
Hotel Tirolerhof er huggulegt þriggja stjörnu alpahótel í austurrískum stíl. Hótelið er heimilislegt með 40 herbergjum og eru öll herbergin með sturtu/baðkeri, sjónvarpi, öryggishólfi, hárþurrku og síma. Öll herbergin eru með svölum. Á hótelinu er einnig nýleg 300 m² heilsulind með mismunandi gufuböðum og svæði þar sem gott er að slaka á og fá sér te eða ávaxtasafa eftir gönguferðir. Einnig er þar hlýlegur veitingastaður ásamt bar og sólstofu. Hótelið er staðsett í bænum Gerlos sem liggur í 1250 m hæð yfir sjávarmáli. Stutt ganga er í bæinn þar sem finna má verslanir, pósthús og fleira.
Heimasíða hótelsins er:
www.tirolerhof-gerlos.at Flugið Flogið verður með Icelandair til München þann 30. ágúst. Brottför frá Keflavík kl. 7.20 en mæting í Leifsstöð í síðasta lagi 2 klst fyrir brottför. Lending í München kl. 13.05 að staðartíma (+2 klst), en flugið tekur um 4 klst. Frá flugvellinum í München eru um 200 km til Gerlos svo gera má ráð fyrir að rútuferðin taki um 3 klst. Þegar við förum aftur heim þá leggjum við af stað út á flugvöll eftir morgunverð og fljúgum heim kl. 14.05 frá München. Lending á Íslandi kl. 16.00 að staðartíma.
Verð: 163.800 kr. á mann í tvíbýli. Mikið innifalið – athugið sérstaklega!
Aukagjald fyrir einbýli 23.800 kr.
Innifalið:
• Flug með Icelandair og flugvallaskattar
• Ferðir á milli flugvallarins í München og hótelsins í Gerlos
• Gisting í tveggja manna herbergi með baði á þriggja stjörnu hóteli í Gerlos
• Morgunverðarhlaðborð
• Vel útilátinn kvöldverður ásamt salathlaðborði
• Aðgangur að öllu því sem heilsulindin hefur upp á að bjóða
• Leiðsögn staðarleiðsögumanns í gönguferðum
• Íslensk fararstjórn
Ekki innifalið: Aðgangseyrir inn á söfn og kirkjur. Kláfar eða stólalyftur upp á fjöll, leigubílaakstur, hádegisverður og þjórfé. Forfalla- og ferðatrygging.