Georg Kári Hilmarsson fæddist í Reykjavík 1982. Hann er elstur þriggja sona Hólmfríðar Bjarnadóttur (Hófý) og Hilmars Arnars Agnarssonar. Georg fluttist með foreldrum sínum frá Þorlákshöfn til Hamborgar í Þýskalandi árið 1985, aðeins þriggja ára. Fjölskyldan bjó í Þýskalandi í 6 ár, fljótlega náðu þau tökum á málinu og Georg talaði þýsku eins og innfæddur 6 ára gamall og hefur haldið því.
Hófý fór sem fararstjóri í stóra Bændaferð til Rínar ásamt tengdaföður sínum, Agnari Guðnasyni, árið 1988 og þá var Georg aðeins 6. ára. Hann naut sín að vera með í þessari ferð og síðan þá hefur Georg oft verið með móður sinni í Bændaferðum. Síðast liðið vor var hann aðstoðarfararstjóri með afa sínum þar sem hann stóð sig með ágætum.

Hlín Gunnarsdóttir fæddist árið 1956 í Reykjavík en á ættir að rekja bæði vestur á firði og í Mýrdalinn. Hún lærði leikmynda og búningahönnun i Tórínó á Ítalíu á árunum 1978 - 82 og bjó þar alls í 12 ár eða til ársins 1987.

Hlín starfaði í sjö sumur sem fararstjóri á Rimini á vegum Samvinnuferða-Landsýnar og þegar hún fluttist heim skellti hún sér í Leiðsöguskólann og starfaði eftir það sem leiðsögumaður á sumrin með erlenda ferðamenn, aðallega ítalska ferðamenn á Íslandi.

Ég heiti Íris Sveinsdóttir og er hárgreiðslumeistari að mennt.  Ég rek hárgreiðslustofur bæði á Íslandi og í Þýskalandi, en þar bjó ég í rúm 20 ár þangað til að ég ákvað að flytja aftur heim til Íslands fyrir rúmum tveimur árum.  Eftir heimkomuna hóf ég leiðsögunám í Endurmenntun Háskóla Íslands og útskrifast þar nú í desember. Frá því ég fyrst man eftir mér hef ég ferðast. Foreldrar mínir þeyttust með mig og systur mína um landið þvert og endilangt og ekki þótti mér það leiðinlegt. Búandi í Evrópu notaði ég hverja frístund til ferðalaga. Það eru mikil forréttindi að getað sameinað vinnu og áhugamál og ekki skemmir fyrir að eiginmaður minn, Jón Guðmundsson, er mikill fjallamaður og eru ferðalög og útivist okkar aðal áhugamál.

Pétur Óli Pétursson hefur búið í mörg ár í Pétursborg, Rússlandi og er einn fárra Íslendinga á þessum slóðum. Hann á og rekur fyrirtæki í nágrenni Pétursborgar og byrjaði fyrir nokkrum árum, eiginlega fyrir tilviljun, að taka á móti íslenskum hópum og vinna sem fararstjóri. Þetta hefur vafið upp á sig og er Pétur Óli orðinn í dag líklega þekktasti íslenski fararstjórinn í Pétursborg. Hann er sérlega fróður um borgina, þekkir hreinlega hvern krók og kima og segir skemmtilega frá. Hann er skipulagður og skeleggur þegar á þarf að halda. Pétur er fæddur og uppalinn í Skagafirði, nokkuð sem hann er stoltur af og lætur gjarnan koma fram þegar tækifæri gefst.

Soffía Halldórsdóttir er fædd og uppalin í Svarfaðardal.  Hún lauk kennaraprófi í einsöng og tónmennt frá Tónlistarskólanum í Reykjavík á árunum 1991-92 og kenndi síðan tónmennt við grunnskóla Reykjavíkur í nokkur ár. Soffía hugðist taka sér frí frá kennslu í eitt ár og fór til Prag, þar sem hún stundaði nám í tékknesku við Karlsháskólann. Dvölin í Prag varð öllu lengri en áætlað var í fyrstu eða samtals ellefu ár, en Soffía flutti aftur heim til Íslands haustið 2009.

Þóra Björk Valsteinsdóttir er fædd árið 1962 í Reykjavík. Að loknu stúdentsprófi frá Menntaskólanum við Hamrahlíð lá leiðin  til Grikklands þar sem að hún festi rætur og býr ennþá eftir 28 ár, gift og á 2 börn. Í Grikklandi nam hún m.a grísku við háskólann í Aþenu, tók kennarapróf í ensku og fór á leiðsögumannanámskeið á vegum Aþenuháskóla.  Í dag er Þóra að láta gamlan draum rætast og stundar fjarnám í sagnfræði við Háskóla Íslands.

Þórhallur Vilhjálmsson er fæddur í Reykjavík 1963. Hann nam markaðsfræði við háskólann í San Francisco og útskrifaðist þaðan árið 1990. Hann hefur starfað að markaðsmálum hjá ýmsum fyrirtækjum bæði hérlendis og í Bandaríkjunum m.a. sem forstöðumaður sölu- og framleiðsluáætlana hjá ISAL í Straumsvík, markaðsstjóri hjá Nýsi hf og markaðsstjóri Portus hf (sem byggir tónlistar- og ráðstefnuhúsið Hörpuna í Reykjavík). 
 
Þórhallur starfaði um árabil sem leiðsögumaður í gönguferðum um hálendi Austurlands fyrir bresku ferðaskrifstofuna High Places en er nú fararstjóri hjá Bændaferðum.  Þess má geta að Þórhallur er eineggja tvíburabróðir Arinbjarnar Vilhjálmssonar arkitekts sem hefur verið fararstjóri í hinum ýmsu ferðum fyrir Bændaferðir síðan 1997.