Aðventuferð 2

 

3. - 10. desember 2010    2 SÆTI LAUS!
Fararstjóri: Sigrún Valbergsdóttir

 

Aðventan er tími ljóss og friðar. Ilmurinn frá jólaglöggi og
hunangskökum liggur í loftinu og að sjálfsögðu er jólastemning í borg og bæ. Nú er upplagt að láta dekra við sig á heimilislegu hóteli í St. Wolfgang við vatnið Wolfgangsee í Austurríki. Ferðin hefst með flugi til Frankfurt en síðan verður ekið til München og gist þar í eina nótt. Þaðan verður ekið til St. Wolfgang þar sem gist verður í 4 nætur. Á leið okkar þangað verður stoppað við vatnið Chiemsee, siglt út í Frúareyjuna, þar sem er sannkölluð aðventustemning á hinum árlega jólamarkaði. Fallegt handverk og ljúfmeti í aðventubúningi. Frá St. Wolfgang verður farið í skoðunarferðir m.a. til Salzburg sem er ein af perlum landsins, ekið um Wolfgangsee til St. Gilgen og Strobl. Einnig verður ekið til Altötting í Bæjaralandi sem er einn elsti pílagrímsbær Þýskalands. Á leiðinni þangað stoppum við í „Stille-Nacht“-kapellunni, þar sem jólasálmurinn „Hljóða nótt, heilaga nótt“ varð til. Endum ferðina í hinni fallegu borg Bamberg þar sem gist verður síðustu 2 næturnar.

 

 

 
 
3. desember  Flug til Frankfurt og ekið áfram til München
Brottför frá Keflavík kl. 8.10. Mæting í Leifsstöð 2 klst. fyrir brottför. Lending í Frankfurt kl. 12.45 að staðartíma (+1 klst). Frá Frankfurt er ekið í áttina til München og gist fyrstu nóttina í nágrenni við borgina.

4. desember  München – St. Wolfgang
Eftir morgunverð verður ekin falleg leið til St. Wolfgang við Wolfgangsee. Á leiðinni þangað verður stoppað við vatnið Chiemsee, siglt út í Frúareyjuna, en þar er mjög skemmtilegur aðventumarkaður með fallegu handverki og svo er fegurðin ólýsanleg á þessum tíma við vatnið. Gist í fjórar nætur í St. Wolfgang.

5. desember  Hringferð um Wolfgangsee
Í dag verður ekið um vatnið, til St. Gilgen, sem er t.a.m. fæðingarbær móður Mozarts, og einnig til Strobl,en þetta eru aðal bæirnir við Wolfgangsee vatnið. Aðventustemning og ljósadýrð er mikil á þessu svæði, skemmtileg kaffihús og iðandi mannlíf.

6. desember  Salzburg
Nú verður ekið til fæðingarborgar Mozarts, Salzburg. Borgin er þekkt fyrir byggingar í barokkstíl og var skráð á heimsminjaskrá UNESCO árið 1996, en Salzburg er í hugum margra sannkölluð perla Austurríkis. Við byrjum á að fara í stutta skoðunarferð um borgina, skoðum Mirabellgarðinn og göngum eftir Getreidegasse sem er með elstu og þekktustu götum borgarinnar, en þar er mjög áhugavert Mozartsafn. Kastalinn Hohensalzburg setur einnig svip sinn á borgina, en þar var hluti kvikmyndarinnar Söngvaseiðs eða „Sound of Music“ tekinn upp. Ekki má gleyma aðventumarkaðinum sem er stolt þeirra á aðventunni.

7. desember  Altötting – Oberndorf
Altötting er einn elsti Pílagrímsbær Bæjaralands, glæsilegar byggingar og kirkjur í barokkstíl setja fallegan svip á borgina og er aðventumarkaðurinn talinn með þeim fallegustu í landinu. Á leiðinni þangað verður stoppað í Oberndorf við frægu kapelluna, „Stille Nacht“ þar sem jólasálmurinn „ Hljóða nótt, heilaga nótt“ varð til.

8. desember  St. Wolfgang - Bamberg
Kveðjum St. Wolfgang og ökum til gömlu keisaraborgarinnar Bamberg í Þýskalandi. Á leiðinni þangað verður stoppað í München þar sem hægt verður að fá sér hressingu og skoða sig um í borginni. Gist í Bamberg í 2 nætur.

9. desember  Dagur í Bamberg
Bamberg í Bæjaralandi er mjög skemmtileg og lífleg borg með um 71.000 íbúum. Hún státar af mörgum fallegum og frægum byggingum, eins og t.d. rómönsku dómkirkjunni, höll biskupsins, Karmelitaklaustrinu og gamla ráðhúsinu. Ekki má gleyma reykbjórnum sem ,,Schlenkerla“ kráin er fræg fyrir. Í dag verður frjáls dagur til að fara á jólamarkaðinn á ráðhústorginu og njóta alls þess sem borgin hefur upp á að bjóða.

10. desember   Heimferð
Nú er komið að heimferð. Eftir morgunverð verður ekið til Frankfurt. Brottför þaðan kl. 13.50 og lending í Keflavík kl. 16.20 að staðartíma.

Fararstjóri getur fært milli daga eftir því sem þörf þykir þegar komið er á staðinn.

Sjá allar upplýsingar um verð og innifalið á næsta flipa hér fyrir ofan.
 

Flýtileiðir

Skipta um leturstærð