Aðventutöfrar í Innsbruck

Eftir góðan morgunverð förum við í stutta göngu um miðaldabæ Innsbruck undir dyggri leiðsögn fararstjóra. Þessi hluti borgarinnar er mjög heillandi en Innsbruck var ein af borgum Habsborgaranna, einnar mikilvægustu konungsættar Evrópu. Blómatími borgarinnar var á 15. öld undir stjórn Maximilian I af Habsborg en hann lét byggja helstu kennileyti Innsbruck, húsið með gullþakinu, sem stendur við eitt fallegasta torgið í Tíról og Hofburg höllina. Eftir skemmtilega göngu verður frjáls tími til að kanna borgina á eigin vegum, fá sér hressingu og kannski örlítið jólaglögg á einhverjum af aðventumörkuðum borgarinnar. Hægt er að líta inn til kaupmanna á göngugötunni Maria-Theresien-Straße ásamt því að dást að seiðmögnuðum skreytingum borgarinnar. Skemmtilegt er að ganga um Ævintýra- og Risagöturnar (Märchen- & Riesengasse) en þar tengjast jólaskreytingarnar mörgum þekktum ævintýrapersónum, t.d. nokkrum af söguhetjum Grímsævintýranna. Við fallegar, steinlagðar götur borgarinnar er að finna ýmsar sérverslanir, kaffi- og veitingahús og þar ríkir fjörlegur jólaandi. Sameiginlegur kvöldverður á hótelinu.

Dagurinn verður tekinn rólega í Innsbruck fram yfir hádegi. Þá ökum við fagra leið um Inndalinn til Wattens þar sem við heimsækjum Swarovski kristalsheiminn sem Andre Heller listamaður, leikari og skáld var fenginn til að hanna á hundrað ára afmæli Swarovski verksmiðjunnar árið 1995. Einnig verður góður tími í verslun þeirra sem er glæsileg og alltaf gaman að skoða, sér í lagi á aðventunni. Það er sífellt verið að stækka kristalsheiminn, safnið og verslunina og alltaf eitthvað nýtt að sjá. Þessu næst ætlum við að sækja heim miðaldabæinn Hall í Tíról en þar er fallegt útsýni yfir Alpana og staðurinn á sér ríka sögu. Í Hall hafa fundist ummerki byggðar allt frá lokum steinaldar og á tímum Rómaveldis var svæðið hluti af Raetia héraði þar sem vegur Rómverja lá í gegn. Við upplifum jólamarkaðinn og dýrð bæjarins á aðventunni. Sameiginlegur kvöldverður á hótelinu.

Aðventustemning og rólegheit eru á dagskrá hjá okkur í dag. Nú er gott að njóta borgarinnar á eigin vegum og skoða sig betur um. Kjörið tækifæri til að gefa sér tóm til að njóta líðandi stundar og hafa það huggulegt. Ef veðrið er gott er upplagt að taka tannhjólalest upp á mjög lítinn jólamarkað í Hungerburg hverfinu en þaðan er stórkostlegt útsýni yfir borgina og fjöllin sem umvefja hana.

Nú er komið að heimferð eftir ljúfa ferð. Eftir morgunverð verður ekið til München. Brottför þaðan kl. 13:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum.